豉油雞翼雞蛋

袁太以前還食得雞的時候 , 好喜愛食雞翼 , 久唔久就會買幾磅雞翼做存貨 , 閒時就從冰箱取出解凍用來煎下炆下又一個餸 , 喜愛雞翼煮法多多 , 煎蒸炆炒煮炸樣樣得 , 而且點煮都一樣咁好味 ......



雖然現在唔食得雞 , 但都依然會買雞翼回家做存貨 , 皆因現在袁生已變得喜愛食雞翼 , 本應想用雞翼再encore整咖哩雞 , 不過平時用開個款咖哩汁缺貨 , 製作不到 , 咁就一於將雞翼轉換成宵夜餐 , 最近袁生晚晚開夜車趕圖 , 夜晚佢一定會肚仔餓 , 所以預防萬一要整定宵夜俾佢 , 袁生宵夜系列首選一定係零食 , 即係薯片 , 花生 , 芝士圈或福字麵小食等等 ...



呢類零食久唔久食下就冇所謂 , 日日食的話好似對身體唔太好 , 就決定用雞翼整宵夜俾佢 , 一來可以清清冰箱的雞翼 , 二來雞翼做宵夜絕對夠飽肚 , 早上整好一直浸焗 , 想食時只要煮番熱就食得 , 方便又美味 , 呢道雞翼菜式就係~豉油雞翼雞蛋~ , 做法簡單將雞翼出水抹乾 , 雞蛋煮至熟透去殼 , 用煲仔煮好豉油汁 , 再加入雞翼 , 雞蛋煮片刻 , 熄火一直浸焗至入味 , 越浸得長時間就越入味 , 袁太浸下浸下都浸左約十粒鐘 , 入晒味~yummy yummy呢~



材料 : 雞中翼 , 八角 , 月桂葉 , 冰糖 , 薑絲 , 酒 , 蔥絲 , 雞蛋 , 水 , 美的早餐機(MZ-DSY18A)

雞翼洗淨抹乾水份 , 放入煲內加水 , 用中火待煮滾 , 期間將雞蛋放入早餐機的煲仔內加水 , 蓋上蓋按<蒸 / 煮>功能 , 時間調至15分鐘 , 雞翼煮約5分鐘至大滾後盛起用水沖一沖洗及瀝乾 , 雞蛋煮至熟透後用水沖一沖洗至涼 , 去殼備用

早餐機的煲仔加入八角 , 月桂葉 , 薑絲及冰糖 , 逐一加入豉油汁材料 , 加入600ml水(或水的份量要蓋過雞翼)拌勻 , 蓋上蓋按<蒸 / 煮>功能 , 時間調至10分鐘 , 煮至冰糖溶掉 , 放入雞翼蓋上蓋按<蒸 / 煮>功能 , 火力調低至300 , 時間調至10分鐘 , 10分鐘後再加入雞蛋 , 再按<蒸 / 煮>功能 , 火力繼續調至300 , 時間調至5分鐘(如用明火 , 將雞翼加入豉油汁內蓋上蓋用慢火煮10分鐘後 , 加入雞蛋繼續用慢火煮5分鐘

5分鐘後將所有材料連汁料轉放入另一煲仔內浸焗至入味(浸的時間越耐越入味 , 不過最少要浸焗1小時) , 食時再煮滾即可

 

材料
雞中翼10隻 , 八角3粒 , 月桂葉5-6片 , 冰糖 , 薑絲 , 酒 , 蔥絲 , 雞蛋3隻 , 水600ml , 美的早餐機(MZ-DSY18A)

豉油汁
生抽4湯匙 , 老抽3湯匙 , 酒1湯匙



做法
1. 雞翼洗淨抹乾水份 , 放入煲內加水 , 用中火待煮滾 

2. 期間將雞蛋放入早餐機的煲仔內加水 , 蓋上蓋按<蒸 / 煮>功能 , 時間調至15分鐘

3. 雞翼煮約5分鐘至大滾後盛起用水沖一沖洗及瀝乾 

4. 雞蛋煮至熟透後用水沖一沖洗至涼 , 去殼備用

5. 早餐機的煲仔加入八角 , 月桂葉 , 薑絲及冰糖 

6. 逐一加入豉油汁材料 , 加入600ml水(或水的份量要蓋過雞翼)拌勻

7. 蓋上蓋按<蒸 / 煮>功能 , 時間調至10分鐘 , 煮至冰糖溶掉 

8. 放入雞翼蓋上蓋按<蒸 / 煮>功能 , 火力調低至300 , 時間調至10分鐘 

9. 10分鐘後再加入雞蛋 , 再按<蒸 / 煮>功能 , 火力繼續調至300 , 時間調至5分鐘 (如用明火 , 將雞翼加入豉油汁內蓋上蓋用慢火煮10分鐘後 , 加入雞蛋繼續用慢火煮5分鐘

10. 5分鐘後將所有材料連汁料轉放入另一煲仔內浸焗至入味 (浸的時間越耐越入味 , 不過最少要浸焗1小時) 

11. 食時再煮滾即可 




早上整好的豉油雞翼雞蛋 , 浸到入晒味 , 無論晚餐或宵夜 , 加餸還是肚仔餓 , 只要煮熱就食得 , 真係好方便呢 ^^