芒果椰奶凍

最近天氣一時陽光普照 , 熱到爆 , 焗到暈 , 一時又落下大雨 , 身體差d都好容易病 , 大家要多多保重身體 , 某日袁生命令袁太要整冰凍的甜品佢嘆 , 大家冇睇錯 , 係命令 , 即係冇得say no , 見街市腰芒唔錯 , 因腰芒比較甜 , 袁生就最喜歡 , 而且腰芒價錢便宜 , 如果要用芒果整甜品 , 袁太一定會配上椰漿吧 ......



唔知點解 , 袁太永遠覺得芒果 + 椰漿係一個完美的組合 , 呢款甜品所需材料好簡單 , 製作亦都好簡單 , 不過就需要破壁機或攪拌機打成芒果蓉 , 唔需要好多時間已經可以完成 , 下層係椰奶凍 , 上層係芒果蓉 + 芒果粒 , 雙重滋味 , 袁生好滿意呢個甜品 , 仲話芒果好甜好香好好味 , 不過如果怕濕熱的朋友仔就唔好食咁多呢 ^^



材料 : 腰芒(可轉用呂宋芒或水仙芒) , 魚膠粉 , 椰漿 , 白砂糖 , 美的破壁機(BL1188) 

魚膠粉 , 白砂糖 , 椰漿放入煲內拌勻 , 用慢火慢慢拌勻煮至魚膠粉及白砂糖溶掉 , 溶掉就可熄火備用 , 不需要煮滾 , 倒入耐熱杯或其他器皿內至半滿 , 先放入雪櫃靜待1小時

期間將芒果去皮起肉 , 1/3份量的芒果肉放入美的破壁機或攪拌機內 , 蓋上蓋按1速將15秒打成芒果蓉(如芒果唔夠甜 , 可加少許砂糖一同打成蓉) , (如家中沒有機器 , 就辛苦少少用叉慢慢壓成蓉) , 餘下1/3份量的芒果肉切粒

椰奶凍雪1小時凝固後 , 加入芒果蓉在椰奶凍上 , 再放入適量芒果肉 , 蓋上蓋或保鮮紙入雪櫃雪1小時至凍即可

材料
腰芒2磅(可轉用呂宋芒或水仙芒) , 魚膠粉7g , 椰漿300g , 白砂糖30g , 美的破壁機(BL1188) 



做法
1. 魚膠粉 , 白砂糖 , 椰漿放入煲內拌勻 , 用慢火慢慢拌勻煮至魚膠粉及白砂糖溶掉 

2. 溶掉就可熄火備用 , 不需要煮滾 

3. 倒入耐熱杯或其他器皿內至半滿 , 先放入雪櫃靜待1小時

4. 期間將芒果去皮起肉 

5. 1/3份量的芒果肉放入美的破壁機或攪拌機內 

6. 蓋上蓋按1速將15秒打成芒果蓉(如芒果唔夠甜 , 可加少許砂糖一同打成蓉) , (如家中沒有機器 , 就辛苦少少用叉慢慢壓成蓉) 

7. 餘下1/3份量的芒果肉切粒 

8. 椰奶凍雪1小時凝固後 , 加入芒果蓉在椰奶凍上 , 再放入適量芒果肉 

9. 蓋上蓋或保鮮紙入雪櫃雪1小時至凍即可 




椰奶凍 + 芒果蓉芒果粒 , 雙重滋味 , 好鬼好味 , yummy yummy , 雪到凍一凍透心涼呢 ^^