香蒜蝦米辣菜甫

大家喜歡菜甫嗎 ??? 袁太好喜歡架 , 可能因為袁太呀爹係潮州人的關係 , 菜甫真係由細食到大 , 最愛簡單的菜甫煎蛋及甜菜甫 , 配飯拌粥都好好味 , 不過可惜我家袁生唔太愛食菜甫 , 所以平時都好少烹調菜甫菜式 , 但是發現雪櫃還有好多菜甫 , 應該係之前媽咪拎俾袁太 , 要想辦法清左佢 ......

用來煮餸袁生唔食 , 簡單洗淨拌粥食袁生又係唔食 , 咁究竟點處置好呢 ??? 突然想起兒時同家人出外潮州菜館食飯的時候 , 一定會有碟辣菜甫做前菜 , 好懷念的味道 , 咁就一於整辣菜甫吧

辣菜甫坊間好多只會切碎菜甫再加辣椒粉拌勻 , 不過袁太當然唔會咁簡單喇 , 會再加入蝦米及蒜蓉 , 令味道再提升 , 好幸運地廚房現在有破壁機 , 十幾秒就可以將菜甫 , 蒜頭 , 蝦米打碎 , 唔駛剁到手殘廢 , 好方便 , 打碎晒材料後就先將菜甫入白鑊炒至乾身 , 再加糖拌勻 , 再爆香蒜蓉 , 蝦米及辣椒粉 , 再將菜甫回鑊熄火再拌勻就完成 , 待涼後就可以入樽放入雪櫃保存 , 自家製可以保存兩個月左右 , 起初諗住放入雪櫃慢慢嘆 , 閒時就用來拌粥或剪炒蛋 , 雖不知袁生居然好喜歡 , 話味道好好 , 可能有佢喜愛的蝦米 , 食食下已經俾袁生食左好多 , 看來袁太過幾日又要重新做過呢 ^^

材料 : 菜甫 , 蒜頭 , 辣椒粉 , 蝦米 , 白砂糖 , 膠樽 , 油 , 美的破壁機(BL1188) 

菜甫用水沖一沖洗及瀝乾 , 用廚房紙抹乾水份 , 1/3份量菜甫用刀切細粒 , 餘下2/3份量的菜甫放入美的破壁機內蓋上蓋按1速打碎後盛起 , 蝦米預先浸水10分鐘再瀝乾 , 同樣放入破壁機內 , 連同去衣蒜頭 , 蓋上蓋按1速打碎 , 盛起備用 (如沒有破壁機 , 可用攪拌機或全人手剁碎代替)

將打碎的菜甫碎放入白鑊中 , 加入切細粒的菜甫粒拌勻 , 用慢火慢慢炒至乾身(菜甫份量有半斤 , 約炒5分鐘)  , 菜甫乾身後加入白砂糖拌炒數分鐘 , 先盛起

鑊中加入4湯匙油燒熱 , 加入蝦米蒜蓉用慢火慢慢拌炒至蒜蓉成金黃色 , 加入辣椒粉拌勻 , 再加入菜甫後熄火拌炒數分鐘 , 稍為待涼15分鐘後入樽蓋上蓋就可放雪櫃冷藏即可

材料

菜甫半斤 , 蒜頭1個 , 辣椒粉1.5湯匙 , 蝦米 , 白砂糖1湯匙 , 膠樽 , 油4湯匙 , 美的破壁機(BL1188) 

做法
1. 菜甫用水沖一沖洗及瀝乾 , 用廚房紙抹乾水份 

2. 1/3份量菜甫用刀切細粒 

3. 餘下2/3份量的菜甫放入美的破壁機內蓋上蓋按1速打碎後盛起 

4. 蝦米預先浸水10分鐘再瀝乾 , 同樣放入破壁機內 , 連同去衣蒜頭 , 蓋上蓋按1速打碎 

5. 盛起備用 (如沒有破壁機 , 可用攪拌機或全人手剁碎代替)

6. 將打碎的菜甫碎放入白鑊中 , 加入切細粒的菜甫粒拌勻

7. 用慢火慢慢炒至乾身(菜甫份量有半斤 , 約炒5分鐘) 

8. 菜甫乾身後加入白砂糖拌炒數分鐘 , 先盛起

9. 鑊中加入4湯匙油燒熱 , 加入蝦米蒜蓉用慢火慢慢拌炒至蒜蓉成金黃色

10. 加入辣椒粉拌勻  , 再加入菜甫後熄火拌炒數分鐘 

11. 稍為待涼15分鐘後入樽蓋上蓋就可放雪櫃冷藏即可 




惹味的香蒜蝦米辣菜甫 , 蝦米香 , 菜甫爽脆 , 而且有少許微辣的感覺 , 用來配飯 , 拌粥 , 甚至做小食都相當唔錯呢 ^^