燕麥粟米斑塊

袁太有時都有煩惱晚餐究竟煮咩好 , 皆因有時都會毫無頭緒 , 又要諗袁生鐘意食咩 , 袁生究竟食唔食呢 ??? 所以有時去街市行幾個圈都決定唔到買咩餸 , 真糟糕 ......



不過好彩經過急凍店見龍脷柳做特價 , 快快手買定兩條 , 就決定整魚柳 , 再加多個菜就可以解決晚餐問題 , 講番今日的主角~魚柳~ , 無論早餐 , 晚餐都愛食魚柳的袁生袁太 , 袁太就最愛沾沙律醬 , 袁生比較喜愛淋粟米汁 , 即係粟米斑塊個類 , 不過其實我都鐘意既 , 所以就煮埋個粟米汁 , 整成粟米斑塊



煮粟米汁的時候我靜雞雞落左少少燕麥片 , 點解我要靜雞雞 , 好簡單 , 因為袁生係唔鐘意食呢類型的健康食物 , 所以我偷偷地加入粟米汁同煮 , 咁就可以令袁生食左落肚都唔發覺 , 呢個粟米斑塊真係好鬼好味 , 攪到袁太都食左兩碗飯呢 ^^



材料 : 龍利柳 , 粟米蓉 , 雞蛋 , 即食燕麥片 , 鹽 , 黑胡椒粒 , 胡椒粉 , 生粉 , AF炸鍋(MF20B)

雞蛋打成蛋液 , 急凍魚柳解凍後切件 , 用水沖一沖洗及瀝乾 , 抹乾水份後放入大碗內 , 加少許鹽 , 胡椒粉及少許蛋液拌勻靜待30分鐘 

每塊魚柳兩面沾上薄薄一層粉 , 放入AF炸鍋內 , 用140C 10分鐘至微黃色及硬身 , 先靜待20分鐘 

粟米蓉放入煲內 , 加入即食燕麥片及200ml水拌勻 , 用慢火慢慢拌勻煮滾後熄火 , 加少許鹽及黑胡椒碎調味 , 再加入蛋液拌勻拌勻成粟米汁 , 魚塊靜待20分鐘後再用160C 5分鐘成金黃色即可

材料
龍利柳2條 , 粟米蓉1盒 , 雞蛋2隻 , 快熟燕麥片1湯匙 , 鹽 , 黑胡椒粒 , 胡椒粉 , 生粉 , AF炸鍋(MF20B)



做法
1. 雞蛋打成蛋液 

2. 急凍魚柳解凍後切件 , 用水沖一沖洗及瀝乾 

3. 抹乾水份後放入大碗內 , 加少許鹽 , 胡椒粉及少許蛋液拌勻靜待30分鐘  

4. 每塊魚柳兩面沾上薄薄一層粉 

5. 放入AF炸鍋內 , 用140C 10分鐘至微黃色及硬身 , 先靜待20分鐘 

6. 粟米蓉放入煲內 , 加入即食燕麥片及200ml水拌勻 , 用慢火慢慢拌勻煮滾後熄火

7. 加少許鹽及黑胡椒碎調味 

8. 再加入蛋液拌勻拌勻成粟米汁 

9. 魚塊靜待20分鐘後再用160C 5分鐘成金黃色即可 




脆卜卜又香口的魚柳 , 簡單又美味 , 淋上粟米汁更美味 , 兩碗飯都唔夠食呢 ^^