脆炸豆腐鯪魚餅

某日經過小食店 , 見到熱辣辣的炸魚蛋新鮮出爐 , 個刻真係有衝動想買番包 , 點知 ... 見到好多爬蟲類的物體周圍行來行去 , 即場有點反胃的感覺 , 立刻縮沙唔買了 , 心想自己整其實都好容易 , 就向住街市的方向走去 ......

不過去到街市又突然唔想食炸魚蛋 , 心思思想食鯪魚球 , 仲要係炸個隻 , 大家有睇開袁太廚房既 , 都知我同袁生都係炸物怪 , 如果我買鯪魚肉番去整炸鯪魚球的話 , 袁生一定好歡迎 , 好喜愛



以往整炸鯪魚球都係用冬菇或者用豆腐烹調 , 兩者之間袁生就比較喜愛用豆腐製作 , 將鯪魚肉配上豆腐及芫茜 , 拌勻好沾上麵粉 , 蛋液及麵包糠做成吉列模樣 , 再放入AF至金黃色 , 一個個金金黃黃的鯪魚餅就完成 , 熱辣辣真係好鬼好味 , 可以令妳食到唔停口 , 食完一個又一個 , 加入豆腐一齊炸的鯪魚球 , 外面炸得脆脆 , 內裡的豆腐魚肉就滑滑 , 非常美味

炸好的鯪魚球可以當小食 , 唔夠鹹可以沾上甜豉油同食 , 又或者沾雞醬都同樣美味 , 仲可以配湯麵 , 湯瀨或湯米 , 加多幾條菜又得 , 不過我同袁生都係喜愛即炸即食多D , 呢款鯪魚餅真係又熱氣又美味呢 ^^

材料 : 板豆腐(硬豆腐) , 鯪魚肉 , 芫茜 , 麵粉 , 雞蛋 , 麵包糠 , 胡椒粉 , 美的免油氣炸鍋(MF20B)

硬豆腐弄碎放入大碗內 , 加入鯪魚肉 , 鹽 , 胡椒粉及調味料拌勻 , 用手將材料來回撻廿多下 , 蓋上保鮮紙放入雪櫃冷藏30分鐘 , 期間將芫茜洗淨切碎 

豆腐鯪魚肉冷藏30分鐘後取出 , 加入芫茜碎拌勻 , 雞蛋拌勻成蛋液 , 用手唧出魚球後 , 逐一沾上麵粉 >> 雞蛋液 >> 麵包糠 , 放上碟後再灑上少許麵包糠 , 蓋上保鮮紙放入冰箱冷藏1小時 , 1小時後取出靜待10分鐘

放入AF炸籃內 , 用180C 12~15分鐘至金黃色即可 (如沒有AF , 可放入油鑊內 , 用筷子拌勻防黏埋一團 , 先用慢火慢慢炸至浮面及微黃色 , 盛起靜待10分鐘 , 10分鐘後將鯪魚球回鑊 , 轉中火慢慢炸至金黃色即可)

材料
板豆腐(硬豆腐)1磚 , 鯪魚肉$15 , 芫茜 , 麵粉 , 雞蛋2隻 , 麵包糠 , 胡椒粉 , 美的免油氣炸鍋(MF20B)

調味料 
糖 , 生粉 , 生抽 , 少少水



做法
1. 硬豆腐弄碎放入大碗內 , 加入鯪魚肉 , 鹽 , 胡椒粉及調味料拌勻 

2. 用手將材料來回撻廿多下 , 蓋上保鮮紙放入雪櫃冷藏30分鐘 

3. 期間將芫茜洗淨切碎 

4. 豆腐鯪魚肉冷藏30分鐘後取出 , 加入芫茜碎拌勻 

5. 雞蛋拌勻成蛋液 

6. 用手唧出魚球後 , 逐一沾上麵粉 >> 雞蛋液 >> 麵包糠 , 放上碟後再灑上少許麵包糠 

7. 蓋上保鮮紙放入冰箱冷藏1小時 

8. 1小時後取出靜待10分鐘

9. 放入AF炸籃內 , 用180C 12~15分鐘至金黃色即可
   (如沒有AF , 可放入油鑊內 , 用筷子拌勻防黏埋一團 , 先用慢火慢慢炸至浮面及微黃色 , 盛起靜待10分鐘 , 10分鐘後將鯪魚球回鑊 , 轉中火慢慢炸至金黃色即可) 




每個都炸到金金黃黃 , 剛剛炸起熱辣辣最美味 , 外脆內軟 , 我唔客氣呢 ^^