蕃茄蛋花湯

某天袁生不在家 , 一人晚餐可以隨意一點 , 繼續清清廚房剩餘物資 , 發現有三個蕃茄 , 又有雞蛋 , 買菜時菜檔姐姐還送點蔥 , 可簡單來個湯飯做晚餐 ......



有蕃茄就當然煮蕃茄湯喇 , 蕃茄湯絕對係袁太的至愛 , 蕃茄魚湯 , 蕃茄薯仔湯 , 蕃茄豬骨湯我統統都愛 , 不過今次得蕃茄 , 雞蛋及蔥 , 所以只可以超簡單製作蕃茄蛋花湯 , 唔知大家喜愛邊類型的蛋花湯呢 ??? 袁太的意思係大家喜歡蛋花成碎狀還是塊狀 ??? 袁太就比較喜愛煮成塊狀的蛋花 , 食時層次感豐富些 



唔需要好多時間己完成美味的蕃茄蛋花湯 , 今次唔落鹽 , 用少許韓式麵豉醬調味 , 味道立刻變得濃郁 , 最愛灑多多蔥粒 , 加碗白飯做成湯飯 , 簡單得來又飽肚呢 ^^ 



材料 : 蕃茄 , 雞蛋 , 胡椒粉 , 蔥 , 韓式麵豉醬

一個蕃茄切件 , 兩個蕃茄切粒 , 蔥白切段 , 青蔥切粒 , 煲加油燒熱 , 先加入蔥白段及蕃茄件炒數分鐘 , 再加入蕃茄粒拌炒至出茄油 , 加入800ml熱水拌勻 , 蓋上蓋用中火煮10分鐘

期間將兩隻雞蛋拌勻成蛋液 , 將蛋液加入蕃茄湯內靜置數分鐘至蛋液成塊狀 , 再輕輕拌勻 , 最後加入韓式麵豉醬及胡椒粉調味拌勻 , 蓋上蓋焗5分鐘即可 (食時灑上蔥粒及配上白飯做成湯飯)

材料
蕃茄3個 , 雞蛋2隻 , 胡椒粉 , 蔥 , 韓式麵豉醬1茶匙



做法
1. 一個蕃茄切件 , 兩個蕃茄切粒 , 蔥白切段 , 青蔥切粒 

2. 煲加油燒熱 , 先加入蔥白段及蕃茄件炒數分鐘 , 再加入蕃茄粒拌炒至出茄油

3. 加入800ml熱水拌勻 , 蓋上蓋用中火煮10分鐘

4. 期間將兩隻雞蛋拌勻成蛋液 

5. 將蛋液加入蕃茄湯內靜置數分鐘至蛋液成塊狀 , 再輕輕拌勻 

6. 最後加入韓式麵豉醬及胡椒粉調味拌勻 , 蓋上蓋焗5分鐘即可 (食時灑上蔥粒及配上白飯做成湯飯) 




簡單美味的蕃茄蛋花湯 , 配上白飯做成午餐或晚餐 , 絕對夠飽肚 , 而且蕃茄有益 , 常常吃都好好呢 ^^