黃金蝦

上次睇電視見到有節目教整呢個黃金蝦,
袁生第一時間叫袁太第日整俾佢食,
袁太第一個反應就係,要用好多鹹蛋黃個喎!
好多膽固醇架,你又話要減肥?
點知袁生個答案係,偶然食一次姐,食埋先算喇!
一時一樣,真係俾佢激死!
不過袁生開到聲,袁太當然照做喇!



第日就去街市買蝦,
其實整呢個黃金蝦最重要梗係買d大蝦喇!
但行完成個街市都冇大隻的蝦賣,
咁為由買d中蝦代替,
再去買埋鹹蛋,咁就攪掂喇!
不過呢個黃金蝦都相當易整,
話咁快就攪掂,
但美中不足係買的蝦唔夠多,
亦唔知係咪袁太整得太好食的關係,
兩個人都好似唔夠食,
下次再去買多d蝦,再整過!

~黃金蝦~食譜

材料 : 新鮮蝦-大半斤 / 鹹蛋黃-6隻 / 牛油-適量
 

 

1.將新鮮蝦洗淨後加少許鹽,胡椒粉略醃.

2.鹹蛋黃隔水蒸15分鐘,壓碎,備用.
3.燒紅鑊,將每隻蝦沾少許生粉,落鑊炒香,熟透後,盛起.
4.落適量牛油於鑊中,加入己壓碎的鹹蛋黃,待兜勻後,放入蝦,將所有材料撈勻後,即可.

老公整的雜扒餐

袁太終於用左2日幾的時間,
將blog的食譜全部整番好喇!
所以而家要將之前未post的食譜post番上黎同大家分享,
由於前幾日袁太唔想煮飯,
所以就去左街市d牛扒呀...豬扒番屋企,
諗住今晚煎黎食,
當然梗係唔少得袁太至愛的雜豆喇!
不過袁生就話今晚等佢煎,
因為成日話袁太煎到好硬,唔好食喎!
咁仲好,可以抖番下!

袁太的Blog終於轉左新版喇!

袁太今日終於決定將個Blog轉新版喇!
雖然之前聽到好多Blog友話新版好麻煩兼唔好用,
但冇辦法喇!
就算而家唔轉遲d都要轉架喇!
不過轉左新版之後真係好唔慣!
好多食譜都走晒位,
要續個續個整番好先得,
雖然袁太個Blog唔係話算太多野!
但重新整過都幾麻煩!
唔知要幾多時間先可以整得晒,
另外仲有好多食譜都仲未post上黎!
唉...
俾心機,
一定要快快手攪掂晒佢!

冬菇臘腸粒煎鯪魚餅

今日又買左鯪魚肉,
但唔係炆,唔係滾湯,而係用黎煎,
煎到香香地,脆脆地,味道一流!
但無理由就咁將鯪魚肉醃好就攞去煎架!
咁普通!
不過通常煎鯪魚餅,離不開都會加埋冬菇一齊煎,
但袁太嫌唔夠,
仲想煎香d,本來想加蔥粒架!
但因為
袁生唔鐘意食蔥,
所以就轉左加臘腸粒落去,
加左臘腸粒之後,真係香好多!
不過最估唔到的係袁生超鐘意食,
以前煎鯪魚餅,袁生多數食幾舊就算,
但今次食左超過一半,
好彩袁太買鯪魚肉的時候,比平時買多左,
如果唔係今次分分鐘袁太都冇得食!

~冬菇臘腸粒煎鯪魚餅~食譜

材料 :  冬菇-4粒 / 臘腸(短)-2條 / 鯪魚肉-$15

                      醃料 : 生粉 , 糖 , 生抽 , 麻油 , 水 - 少許

 
 1.冬菇浸軟後切粒,臘腸切粒備用.

 

 2.鯪魚肉加入醃料醃30分鐘後,再加冬菇粒,臘腸粒拌勻.
 3.燒紅鑊,用匙羹將鯪魚肉放入油鑊,用慢火煎至微黃後,反轉鯪魚餅,用鑊鏟輕輕壓成餅形至兩面煎至
    金黃色,即可.

 

冬瓜豆卜炆火腩

炆火腩係街就食得多,
自己入廚咁耐好似一次都未煮過喎!
咁今晚一定要煮下喇!
同埋夏天唔煮冬瓜點得架!
不過我記得做女的時候,婆婆同媽咪就成日煮!
仲好好食添!
而平時袁生就鐘意食肉同埋豆卜,
咁呢個餸就啱晒佢喇!又有豆卜,又有火腩!
而火腩梗係買d半肥瘦的就最好食喇!
一層肥,一層瘦絕對啱晒袁太胃口,
不過袁太最鐘意食火腩的皮,脆脆地,好味道!
但呢個餸係炆的,所以d火腩連皮都會炆到腍晒!
袁太就唔係咁鐘意喇!
而袁太又確保驚袁生話冇咩味道,
所以就加左粒鮮雞濃湯寶一齊炆,冬瓜吸晒d味,好香!
袁生對呢個餸都好鐘意,仲話好好味添!

~冬瓜豆卜炆火腩~食譜

                                              

材料 : 冬瓜-1斤 / 豆卜-$3 / 火腩(燒肉)-約$20 / 薑-3片 / 鮮雞濃湯寶-1粒 / 蠔油-適量

 
 1.冬瓜去皮切厚件,備用.
 
 2.燒滾水,下豆卜煮約6分鐘,撈起搾乾水後切半.
 3.燒紅鑊,爆香薑片,火腩後,下冬瓜略炒,加水,鮮雞濃湯寶(水要蓋過冬瓜面),滾後轉慢火炆約10分鐘,視乎
    冬瓜厚度,炆冬瓜至透明色.
 4.將豆卜回鑊兜勻,加少許蠔油調味,再炆約5分鐘,即可.