終於捨得去睇中醫

記得上年袁太結婚之後話要去睇中醫調理身體,
但拖下拖下結左婚年幾都未去睇,
唉...點解會咁架!
究竟呢一年我忙d咩呢?
袁太媽咪實在睇唔過眼,
因為成日話想生bb之前梗係睇中醫先喇!
袁太見前幾日得閒,
終於的起心肝去睇中醫,
一次煲左3杯藥,
當袁太攞藥的時候,
嘩...唔駛咁大杯呀!
未飲落肚都知一定苦,
梗係問藥房個呀姐俾多幾粒陳皮梅同埋山渣喇!
番到屋企之後,
袁生就梗係叫袁太乖乖地飲左杯藥佢喇!
嘩...真係好苦喎,
想收買人命咩!
飲完呢3杯之後,
星期日又要再去睇,
唔知到時又幾多杯藥呢?

芒果卷

前幾日係袁太爹地生日，本來諗住整爹地最鐘意的栗子蛋糕

但當買晒材料番屋企的時候，居然唔記得最重要的栗子蓉，咁點算呢 ???

咪整唔到囉，唯有睇下可以整咩蛋糕代替先

於是袁太就去吉吉島睇下有咩買，見到生果個邊有新鮮芒果賣

仲要已經切左片添，咁啱晒喇，一於轉整芒果卷俾爹 地，唔知呀爹鐘唔鐘意呢 ???

不過其實整芒果卷同整瑞士卷的做法差唔多，最緊要係捲的技巧

好彩今次整得好成功，一次就OK，不過最緊要係呀爹啱唔啱食

後來袁太打電話番屋企問好唔好食，雖然爹地話好味，但又話個芒果卷實左少少

不過整體上都唔錯，可能始終呀爹都係喜愛栗子蛋糕多d

咁下次等我再整栗子蛋糕番去俾佢地食先 !

Crabtree & Evelyn

平時一到11月-12月的時候,
Crabtree & Evelyn就一定會排晒長龍,
其實袁太都好想買黎試下,
因為平時經過都會覺得好香,
前幾日袁太睇中左一set的產品,
有沐浴露同護膚露,
減價到只係$556,真係好吸引,
不過因為之後仲要去其他地方,
所以費時拎住周圍走,
諗住過幾日先去買,
點知好運的事情就黎發生喇,
袁生做的公司放工的時候,
成班同事要去酒店開會,
點知去酒店開會都有野食,有野送,
居然係送我想買個set的Crabtree & Evelyn產品,
真係咁啱得咁橋,
袁生開完會都冇同袁太講呢件事,
番屋企先話俾袁太聽,
袁太仲以為袁生自己去買俾我的添,
不過冇所謂喇,
可以慳番五百幾蚊,真係超開心~~~~~

12.06袁太生日

袁太係12.06生日架!
今年要同2字頭講bye bye,
迎接3字頭的來臨,
今日因為袁太有少許唔舒服,
所以唔打算慶祝喇!
但生日點可以冇蛋糕呢?
袁生放工居然靜雞雞去左袁太鍾意的餅店,
買左袁太至愛的栗子蛋糕,
居然細細個,
但袁太真係好感動,
因為之前叫袁生唔駛特登去買蛋糕喇,
同你一齊過已經好開心,
何況袁生都有少少作病,
但估唔到真係會去買,
袁太真係冇嫁錯呢個好老公!

兒時回憶~雪糕蛋糕~

之前睇"月兒"Blog的時候,

居然有個post話有雪糕蛋糕賣,

咁開心,袁太細細個成日食,

但又搵唔到邊度有得賣,

原來就遠在天邊,近在眼前,

居然係惠x超市有得賣,

所以就第二日去樓下睇下有冇得賣,

居然真係有,

但得番一盒,仲要個盒變晒形,

袁太梗係唔買喇!

咁又上網睇下仲有邊度有得買,

見到其他blog友話原來"Market Place"都有,

咁啱袁生袁太去旺角行街街,

梗係去Market Place睇下有冇喇!

好野,有呀!

終於俾我搵到你喇!

就即刻買左一盒番屋企,

好期待,好想快d食,

袁生同袁太都係80年代的人,

但原來居然袁生一次都未食過,

第二晚食完飯之後就切左兩件,

袁生一件,袁太一件,

係喇!係呢種味,細細個的回憶番晒黎喇!

好開心呀!

袁生今次係第一次食雪糕蛋糕,都話好食,

食完一件,再切多一件黎食,

睇黎袁生真係好鍾意食咁喎!

粟米鬚紅蘿蔔栗子瘦肉湯

點解袁太今次會用粟米鬚煲湯,
其實係菜檔的呀姐介紹煲的,
話粟米鬚有利尿作用,
同埋食得煙多的人飲呢個湯都幾好個喎,
咁啱袁生平時食煙又多,
煲呢個湯俾佢飲咪好啱!



初初諗住就咁用粟米鬚,栗子,瘦肉一齊煲,
清清地應該會幾好味,
但個呀姐話如果咁煲會好淡冇味喎,
就建議袁太加埋紅蘿蔔,粟米一齊煲,
袁太番屋企煲左3小時,
試味的時候果然真係好好味,
呀姐果然冇介紹錯,
但袁太又擔心另一個問題,
就係驚袁生唔鍾意,
因為又有粟米,又有紅蘿蔔,
驚甜得滯袁生唔鍾意飲,
但居然袁生意外地鍾意,
仲飲左兩碗咁多添!真開心...




~粟米鬚紅蘿蔔栗子瘦肉湯~食譜

材料 : 粟米鬚-適量 / 紅蘿蔔-1條 / 栗子-12粒 / 蜜棗-2粒 / 瘦肉-$10 / 粟米-1條

做法:

1.將瘦肉飛水,撈起切件備用.

2.紅蘿蔔去皮切件.

3.煲內放入適量的水,凍水落蜜棗,開大火,待水滾後,放入栗子,瘦肉,粟米煲30分鐘.

4.再加入粟米鬚,紅蘿蔔煲30分鐘,再轉慢火煲2小時,下少許鹽調味,即可.

又黎媽咪靚湯

袁太又番去同爹地媽咪飲茶,
媽咪又煲左湯俾袁太拎番屋企,
雖然媽咪煲的湯真係唔知點解成日都好多油,
但媽咪煲的湯永遠都係最好既,
不過唔記得個湯叫咩名,
淨係記得有花膠,圓肉,准山,雞肉...
總知用左好多材料一齊煲,

好夠火喉,好味道!
同埋有好多湯渣,
食晒湯渣兼飲埋湯都好飽!