煙肉粟米天使麵拌南瓜湯

有袁生鍾意的天使麵,有袁太鍾意的南瓜湯,煮埋一碟,味道可以好夾架!

呢幾日天氣唔係潮濕,就鬼死咁凍
攪到個人都冇咩胃口
偶然晚餐唔煮飯,煮下麵都唔錯架
不過就算煮麵都要考慮煮咩麵
因為袁生唔係款款麵都食
等我睇睇雪櫃有咩材料先
~Oh~發現雪櫃仲有半包天使麵
咁啱晒喇,袁生至鍾意天使麵
同埋如果唔煮埋就過期
然後發現冰箱有煙肉,有粟米粒
咁又可以放埋落去煮
初時諗住用白汁既
但成日都用白汁煮麵,好似冇咩新意
咁不如用南瓜湯喇
因為我鍾意
自己煮個湯用黎拌麵一齊食
味道應該會冇得彈
決定左後就拿拿臨去街市買材料
最重要係買蝦,袁生鍾意食蝦
煮好後一人一碟
份量啱啱好,味道仲好好添!

~煙肉粟米天使麵拌南瓜湯~


材料:

天使麵-半包/煙肉-4條/粟米粒-1包(之前係急凍店買,細細包既)基圍蝦-半斤/南瓜-半邊/急凍海鮮-1包/清雞湯-500ml

做法:
<1>
南瓜去皮去籽切件,基圍蝦連殼洗淨備用.

<2>
急凍海鮮解凍後用少許麻油,胡椒粉,鹽醃30分鐘後飛水.

<3>
煲內加入雞湯及適量的水,待滾後加入南瓜用大火煲1小時,再加入,基圍蝦(連殼),海鮮煲30分鐘,下少許鹽調味,基圍蝦撈起去殼,將蝦仁放入湯中.

<4>

天使麵放入滾水煮至軟身後加入南瓜湯中.

<5>
燒紅鑊,將煙肉,粟米粒炒香,放在天使麵上一同享用即可.

香蕉蛋糕

~香噴噴的香蕉蛋糕出爐喇~

記得幾年前整過一次香蕉蛋糕，已經俾濃濃的香蕉味所吸引

但由於平時太忙，都好耐冇焗蛋糕了

所以袁太就係幾年後的今日再次焗一個香蕉蛋糕

初時都驚驚會冇以前整得咁好，但好好彩仍然好成功

蛋糕柔軟度剛剛好，香蕉味亦都好香

不過美中不足係蛋糕面過鹹了，可能奔鹽的時候拌勻得唔好

但整體上個蛋糕都冇咩缺點

等到袁生回家的時候，立刻切一件俾袁生試下

估唔到袁生居然話好味，仲叫我留番件俾佢明天做早餐添

真係多謝捧場 !

10年前的邪留丸糖果

今日又黎post袁生約10年前買俾袁太既一set邪留丸糖果

記得以前第一次睇呢套卡通的時候
就愛上了邪留丸
因為覺得好得意,好可愛
個時袁生袁太仲係拍拖的時候
袁生好好架
會成日買我鍾意的物品俾我
但而家就...唉唔好提喇
呢set邪留丸係袁生以前番工途中係北角見到
就即刻買俾我
我仲記得袁太個時都不知幾開心
諗番轉頭
以前拍拖真係好多驚喜!

青紅蘿蔔椰子排骨湯

有椰子湯飲!

最近天氣成日時凍,時熱,仲潮濕添!

都唔知可以煲咩湯水飲
唉唯有去街市兜幾個圈睇下有咩材料買黎煲湯先
點知見到菜檔有椰子賣
係喎
煲椰子都唔錯喎
個賣菜姐姐話煲椰子的話
買青紅蘿蔔煲喇

就信你買青紅蘿蔔

再去買埋排骨
番到屋企煲左2個半小時就完成左喇
可能有椰子的關係
煲湯甜甜地,應該幾滋潤!

~青紅蘿蔔椰子排骨湯~

材料:

青蘿蔔-1條/紅蘿蔔-1條/椰子-1個/排骨-$20/瑤柱骨-2塊/無花果-2粒/南北杏-少許-蜜棗2粒

做法:
<1>
無花果浸水後切半,青,紅蘿蔔去皮切件備用.



<2>

排骨飛水,瑤柱骨洗淨後出水備用.

<3>煲內放入適量的水,放入蜜棗,南北杏,待滾後加入無花果,瑤柱骨,排骨用大火煲30分鐘.



<4>

再加入青,紅蘿蔔煲30分鐘,再加入椰子後轉慢火煲1 1/2小時,下少許鹽調味即可.

鮑汁花生鳳爪

整左多好好味的鮑汁花生鳳爪

平時花生鳳爪係酒樓就食得多
不過酒樓鳳瓜就得幾隻,花生就多多
都要成$28一碗
其實都幾貴下
所以袁太今次就決定自己整
買多幾隻鳳爪,再加多多花生
點計都係屋企整化算d
最緊要成本都唔駛$28
仲好好味添
袁生平時就最鍾意食鳳爪
我諗呢個鳳爪佢應該會好鍾意!

~鮑汁花生鳳爪~


材料:

鳳爪-1磅/花生$3/薑片,紹酒-適量

調味料:
鮑魚汁-3湯匙/蠔油-1湯匙,生抽,糖,生粉-少許



做法:
<1>
鑊中加入水,下薑片,紹酒,鳳爪(去甲)出水5分鐘,瀝乾水份備用.

<2>
花生浸水30分鐘後加水煮1小時熄火(蓋上蓋焗30分鐘).

<3>
燒紅鑊,加入鳳爪,花生(連水),調味料及適量的水(水的份量要蓋過所有材料).

<4>
用大火煮滾後,再轉慢火炆30分鐘,熄火後唔好開蓋焗約30分鐘,食時煮滾即可.

大咀鳥朱古力

大家記唔記得以前有大咀鳥的卡通呢

袁太仲係十幾廿歲的時候幾鍾意呢隻大咀鳥
但又唔知點解會鍾意
袁生以前仲買過一set大咀鳥朱古力俾我
我到而家仲keep住係屋企
點知前幾日係yahoo首頁見到circle k的士多啤梨系列
發現左有大咀鳥士多啤梨朱古力
價值$8.9一盒
梗係即刻去circle k買盒番屋企喇!

呢set係袁生大約10年前買俾袁太既
我到而家仲保存得好好架!