栗子蝦米飯

係街市買栗子煲湯的時候,

番到屋企先知買左成廿幾粒栗子,

煲湯都唔駛用咁多喇,

咁點解我又會買咁多番黎呢

但又唔想用剩放係屋企,

既然湯又唔駛要咁多栗子,

餸又之前諗好晒,

唯有行最後一步,

就係向飯入手喇!





咁啱最近天氣咁鬼凍!
整栗子飯都係一個唔錯的選擇,

最緊要係做法簡單,

再加少少蝦米,雞湯,

話咁快就整好一碗熱辣辣,香噴噴的栗子飯,

雖然今次袁太係第一次整,
但真係好好吃,
而且仲好暖胃添!




~栗子蝦米飯~食譜

材料 : 栗子-12粒 / 蝦米-適量 / 清雞湯(細)-1盒                                         

 

 

1.栗子浸熱水5分鐘,令栗子衣軟身,去衣後瀝乾備用.
 
2.蝦米浸軟備用.

3.米放入飯煲洗淨後,將清雞湯及少許水一同加入.
 
4.再平均放入栗子粒,蝦米.
5.待飯煮熟拌勻盛起即可.  

節瓜栗子排骨湯

袁太而家有好多湯都唔飲得,
但無理由因為自己冇湯飲而唔煲湯俾袁生架,
有咩湯可以煲呢
其實可以煲節瓜或者煲南瓜既,
但因為袁生唔鐘意飲南瓜湯,
所以只有節瓜可以選擇,
而煲節瓜湯離不開都係用眉豆花生,
但今次唔用鱆魚,雞腳,
就咁簡簡單單用栗子煲,
雖然味道就略為淡口左少少,
但都幾好飲架,
最緊要袁生冇話唔好咪得囉!



~節瓜栗子排骨湯~食譜

材料 : 節瓜-2個 / 眉豆花生-少許 / 栗子-12粒 / 排骨-$20 / 蜜棗-2粒

做法:                      

1.排骨先出水,栗子去皮備用.

2.節瓜刮乾淨,眉豆,花生洗乾淨.


3.煲內放入適量的水,落蜜棗,眉豆花生煲15分鐘.

4.加入栗子,排骨煲30分鐘,再加入節瓜煲30分鐘.
5.轉慢火煲1小時,下少許鹽調味,即可.

牛湯薯仔炆牛腩

今日本來諗住炆牛肋條,
點知去到吉吉島居然唔見有得賣,
咁唯有落番街市的牛肉檔買喇,
但袁太未試過去牛肉檔買牛腩,
因為驚俾人呃,
會俾d唔靚的牛腩我,
但都冇辦法,
因為之前已經同袁生講左話有炆牛腩做晚餐,
所以點都要買到番屋企,
咁就去牛肉檔話想買牛腩,
用黎炆既,
話兩個人食,唔駛咁多,
點知一切一磅都要$40,
嘩...好似多得滯喎,
會唔會食唔晒架,
唉...不過算喇,
叫左人切,唔通唔買咩!



番到屋企炆左個半鐘,
上枱前梗係要俾袁生試下味喇,
睇袁生個樣好似好滿意喎,
仲話一d都唔硬,好好味,
好彩姐,
買左$40牛腩,
如果炆得唔好食都唔知點算囉!



~牛湯薯仔炆牛腩~食譜

材料 :牛腩-$40 / 薯仔-1個 / 清雞湯(細)-1盒 / 冰糖-2小粒 / 牛肉味濃湯寶-1個

 

1.牛腩(不要切)用薑絲,蔥段出水10分鐘,薯仔去皮切件備用.
2.燒紅鑊,下薑片炒至金黃色,加入牛腩炒香,贊少許酒,再加入牛肉味濃湯寶,清雞湯,冰糖,水蓋過
   牛腩.
 
3.待滾後轉細火炆1小時,再加入薯仔炆30分鐘後,熄火焗30分鐘.
4.食時先將牛腩切件,再放回湯返滾,加少許鹽調味,即可.

   

媽咪靚湯-沙參玉竹蓮子百合豬展湯

今日又番屋企攞湯水,
媽咪話除左睇中醫之外,
每星期都會煲湯俾我拎番屋企飲喎,
而今個星期的湯水就係,
"沙參玉竹蓮子百合豬展湯"喇,
淨係聽個名都知煲湯又足料,又飽肚,
不過最麻煩的都係袁生,
以前媽咪話d湯較味,
叫袁太唔駛再加鹽的時候,
袁生就話淡,
當媽咪話煲湯有少少淡,
叫袁太煲番熱的時候,
落番少少鹽調味,
個時袁生就話煲湯鹹左少少,
究竟袁生個口點架,
咁難服侍既,
下次都係等袁生試左味先再決定落唔落鹽會好d!

終於捨得去睇中醫

記得上年袁太結婚之後話要去睇中醫調理身體,
但拖下拖下結左婚年幾都未去睇,
唉...點解會咁架!
究竟呢一年我忙d咩呢?
袁太媽咪實在睇唔過眼,
因為成日話想生bb之前梗係睇中醫先喇!
袁太見前幾日得閒,
終於的起心肝去睇中醫,
一次煲左3杯藥,
當袁太攞藥的時候,
嘩...唔駛咁大杯呀!
未飲落肚都知一定苦,
梗係問藥房個呀姐俾多幾粒陳皮梅同埋山渣喇!
番到屋企之後,
袁生就梗係叫袁太乖乖地飲左杯藥佢喇!
嘩...真係好苦喎,
想收買人命咩!
飲完呢3杯之後,
星期日又要再去睇,
唔知到時又幾多杯藥呢?

芒果卷

前幾日係袁太爹地生日，本來諗住整爹地最鐘意的栗子蛋糕

但當買晒材料番屋企的時候，居然唔記得最重要的栗子蓉，咁點算呢 ???

咪整唔到囉，唯有睇下可以整咩蛋糕代替先

於是袁太就去吉吉島睇下有咩買，見到生果個邊有新鮮芒果賣

仲要已經切左片添，咁啱晒喇，一於轉整芒果卷俾爹 地，唔知呀爹鐘唔鐘意呢 ???

不過其實整芒果卷同整瑞士卷的做法差唔多，最緊要係捲的技巧

好彩今次整得好成功，一次就OK，不過最緊要係呀爹啱唔啱食

後來袁太打電話番屋企問好唔好食，雖然爹地話好味，但又話個芒果卷實左少少

不過整體上都唔錯，可能始終呀爹都係喜愛栗子蛋糕多d

咁下次等我再整栗子蛋糕番去俾佢地食先 !