嘩...叉燒呀~好好味的叉燒呀~ <附日式叉燒食譜>

今次係袁太第二次整日式叉燒，之前第一次因為時間不夠的關係，叉燒雪得唔夠硬切到散晒
，所以今次就等放假的時候，晨早訓醒就去街市買舊梅頭肉，有足夠的時間整呢個日式叉燒做晚餐，不過既然有叉燒做晚餐(成功的話)，咁當然唔煮飯，煮拉麵

再加粟米粒，木耳絲做配料，仲有一樣相當重要的配料，就係糖心蛋，袁太一向都好鐘意食雞蛋，亦都好彩雞蛋呢種材料經醫生診斷過，可以解禁，如果唔係只可以睇住袁生食糖心蛋，都幾殘忍，而拉麵方面，我係759阿信屋到買，好似係黑麻油豚骨味

講真我一向對拉麵都係麻麻，我比較鐘意烏冬多D，不過呢款拉麵我又覺得好好味，大家有機會都去阿信屋買黎試下，晚餐除左拉麵外，冰箱仲有以前買既廣島蠔，加雞蛋加麵包糠，然後拎去炸，咁又完成一道酥炸廣島蠔，今晚袁生放工回來就有日式晚餐食

今次有相當足夠的時間去烹調日式叉燒，完成後我都好滿意，不過就比起出面餐廳的鹹左少少，下次如果再整的話，可以再切薄D，袁太有個問題想問下大家，因為袁生話碗拉麵同出面餐廳的拉麵賣相好相似喎，咁大家又覺得呢碗拉麵的賣相評價有幾多分呢 ???

日式叉燒
材料(日式叉燒) : 梅頭肉<$40>，料理棉繩<適量>，八角<1粒>，蔥段<適量>，蒜頭<2粒>
汁料 : 日式醬油<2杯>，味琳<1杯>，水<3杯>，蔥段<適量>，酒<少許>，冰糖<1粒>


做法 :
1. 梅頭肉用棉繩扎好後出水備用

2. 爆香八角，蒜頭，蔥段後，放入豬肉煎至兩面金黃色盛起

3. 將汁料拌勻後放入滾內煮至微熱後熄火放涼，將豬肉放入汁料內浸4小時

4. 豬肉連汁料放入煲內用慢火炆2小時熄火唔好開蓋待涼

5. 放涼後將豬肉用保鮮紙包實放入雪櫃，因雪硬後叉燒先會容易切

糖心蛋做法 : 將雞蛋放入水中煮滾，當水大滾時起計煮3分鐘，然後放入冰水冷卻去殼，再放入炆叉燒的汁料內浸約10分鐘即可




呢碗日式叉燒糖心蛋豚骨拉麵完成

雖然望落去好似瘦多過肥，但一D都唔硬，好好味架

另外當然唔少得袁生至愛的酥炸廣島蠔