蒜蓉萵苣炒椒鹽豬扒

前幾日袁太屋企對開馬路發生車禍

一輛私家車在迴旋處失控 , 撞爛圍欄後再摌上行人路

當時正值夜晚六點幾 , 絕對係放工時間 ......



平時呢條路都好多人放狗

而袁太平時買完餸都好喜愛行這條路回家

因我份人最怕兜路行呢

發生呢單車禍後 , 袁生好長氣日日提醒我

記得行商場天橋過 , 唔好再行個條行人路喇

如果妳有咩事 , 叫我點算呀 , 當我開始有少許感動之際



袁生就話 : 咁以後冇妹仔俾我用喇

~哼~ 雖然聽完呢句說話有少許唔順氣

但我知袁生一定係關心我呢



最近每次去街市都見到好多太太們買萵苣

袁太都買左條回家 , 想簡簡單單蒜蓉炒

不過又發現百寶箱有兩塊大豬扒肉

將豬扒拍鬆兩面再醃好 , 沾上麵粉煎一煎

再加椒鹽調味 , 好香口



而且加埋洋蔥 , 辣椒 , 萵苣炒埋一碟

絕對好好送飯呢 ^^



材料 : 萵苣 , 梅頭豬扒肉 , 黃洋蔥 , 紫洋蔥 , 辣椒 , 雞蛋 , 五香粉 , 蒜頭

萵苣去皮切條 , 蒜頭剁成細粒 , 辣椒切粒 , 黃洋蔥 , 紫洋蔥分別去皮切幼條 , 雞蛋打出備用

豬扒肉洗淨拍鬆兩面後切細塊 , 加入醃料拌勻 , 蓋上保鮮紙醃2-3小時

燒紅鑊 , 爆香蒜粒 , 加入萵筍快手炒至軟身 (約5分鐘) , 加少許鹽拌勻調味盛起

 

將醃好的豬扒肉沾上麵粉 , 放入鑊中煎至兩面金黃色後 , 盛起用廚紙吸取過多油份 , 原鑊放入辣椒粒及洋蔥炒至有香味及洋蔥軟身 , 將豬扒肉回鑊 , 灑上適量椒鹽調味拌勻炒幾分鐘

最後將蒜蓉萵苣回鑊拌勻快手約1分鐘即可

材料
萵苣1條 , 梅頭豬扒肉2大塊 , 黃洋蔥1個 , 紫洋蔥1個 , 辣椒1條 , 雞蛋1隻 , 五香粉1茶匙 , 蒜頭



做法
1. 萵苣去皮切條 , 蒜頭剁成細粒 , 辣椒切粒

2. 黃洋蔥 , 紫洋蔥分別去皮切幼條 , 雞蛋打出備用

3. 豬扒肉洗淨拍鬆兩面後切細塊 , 加入醃料拌勻 , 蓋上保鮮紙醃2-3小時

4. 燒紅鑊 , 爆香蒜粒 , 加入萵筍快手炒至軟身 (約5分鐘)

5. 加少許鹽拌勻調味盛起

6. 將醃好的豬扒肉沾上麵粉 , 放入鑊中煎至兩面金黃色後

7. 盛起用廚紙吸取過多油份

8. 原鑊放入辣椒粒及洋蔥炒至有香味及洋蔥軟身 , 將豬扒肉回鑊

9. 灑上適量椒鹽調味拌勻炒幾分鐘

10. 最後將蒜蓉萵苣回鑊拌勻快手約1分鐘即可 




如果加埋炸蒜就更完美呢 , 不過剛巧用完了 ^^