梅菜准山煎肉餅

前幾日同袁生睇中醫的時候 , 醫師話袁生脾虛又多胃氣

而且袁生經常性腸胃唔多好

唔知係咪因為食得煙多兼唔夠訓所致 , 身體機能又差

腸胃唔好袁生隻腳又會覺得痛 , 唔知兩者有冇關連呢 ......


  
我知鮮准山有補脾胃 , 益肺腎的功效

但袁生平時絕對唔喜愛准山

無論乾准山 , 鮮准山佢統統不愛 , 所以就要諗諗計逼佢食

最好方法就係將准山剁碎連同其他材料拌勻再處理

袁生平時愛食肉餅 , 就向肉餅埋手



肉餅呢款家常菜一向係袁生最愛

無論土魷蒸 , 鹹魚蒸 , 鹹蛋蒸都無任歡迎

今次就選擇梅菜做材料 , 再加上袁生討厭的准山

與肉餅一同拌勻 , 不過唔係蒸而係放入鑊煎香

大家都知我同袁生愛吃香口食物 , 煎到金金黃黃好拌飯



最大問題係究竟袁生食唔食得出有准山呢 ???

個蠢人當然食唔出 , 食完飯後我先同袁生講

~肉餅裡面有你討厭的准山喎~

袁生冇出聲 , 因為已經不經不覺食左落肚 ~哈~



材料 : 梅頭瘦肉 , 鮮准山 , 梅菜 , 薑汁 , 魚露 , 蔥

梅菜放入大碗內洗淨再加水浸30分鐘 , 蔥切幼絲 (用來裝飾 , 可省略) , 浸好的梅菜再沖洗一次後切粒 , 放入白鑊中加入糖及麻油拌勻炒至乾身備用

鮮准山去皮切厚片再剁碎 (處理鮮准山時記得帶手套呀~~~如果唔係隻手會痕到爆 ^^)

梅頭瘦肉切條再切粒後剁成肉餅狀 , 放入大碗內加入少許鹽及2湯匙水拌勻

再加入醃料拌勻靜待10分鐘後加入薑汁 , 鮮准山 , 梅菜及麻油拌勻 , 再將肉餅撻十餘下至起膠 , 蓋上保鮮紙放入雪櫃靜待1小時

   
1小時後將肉餅取出 , 將適量的肉餅用手搓圓再壓平 , 放入鑊中用慢火慢慢煎至兩面金黃色 ,
放上碟後加入蔥絲裝飾即可

材料 
梅頭瘦肉$30 , 鮮准山1/2條 , 梅菜1棵 , 薑汁2湯匙 , 蔥

醃料 
生抽 , 魚露 , 糖 , 胡椒粉 , 麻油



做法
1. 梅菜放入大碗內洗淨再加水浸30分鐘 , 蔥切幼絲 (用來裝飾 , 可省略)

2. 浸好的梅菜再沖洗一次後切粒

3. 放入白鑊中加入糖及麻油拌勻炒至乾身備用

4. 鮮准山去皮切厚片再剁碎 

   (處理鮮准山時記得帶手套呀~~~如果唔係隻手會痕到爆 ^^)

5. 梅頭瘦肉切條再切粒後剁成肉餅狀 , 放入大碗內加入少許鹽及2湯匙水拌勻 

6. 再加入醃料拌勻靜待10分鐘後加入薑汁 , 鮮准山 , 梅菜及麻油拌勻

7. 再將肉餅撻十餘下至起膠 , 蓋上保鮮紙放入雪櫃靜待1小時

8. 1小時後將肉餅取出 , 將適量的肉餅用手搓圓再壓平

9. 放入鑊中用慢火慢慢煎至兩面金黃色 , 放上碟後加入蔥絲裝飾即可




金金黃黃香口的煎肉餅 , 自己剁肉來整比起買現成豬肉碎好味得多呢 ^^