苦瓜煎魚餅

由於要陸續開始整客廳 , 飯廳同廚房

呢幾日都不停執野 , 掉野 , 唔執唔知原來間屋好多垃圾

所謂垃圾都唔知係咪真係垃圾

總知唔用既就掉左佢 , 兩日時間計計數都差不多掉左30袋咁多

我同袁生都覺得好誇張 ......


  
雖然掉左好多物品 , 但亦開心地找到好多豬豬的事物

豬豬三歲幾時做手術照的X光片

豬豬的狗帶 (係袁生最愛的姆明家族圖案)

豬豬的覆診卡 , 沖涼的寵物店卡店 , 袁生印的豬豬圖案衫仔

N年前即影即有的相片 , 全部都好珍貴

不過可惜豬豬已不在家了 , 又想流淚 , 真係好掛住豬豬

這幾天雖然執屋執到傻咁滯

但都要煮飯俾袁生補充體力 , 就來個簡單煎魚餅做晚餐

夏天離不開會煮好多瓜類 , 苦瓜係袁太夏天最常用的材料

因為其他瓜類例如冬瓜同勝瓜袁生唔食架

好簡單地買了一條苦瓜 , 鯪魚肉 , 豬肉拌勻放入雪櫃眠一眠

一粒鐘後叫醒d材料 , 用手搓圓再放入鑊中煎至金黃

完成 , 絕對簡單又好味



唔喜愛苦瓜的朋友們 , 這個魚餅就唔太適合了

不過可以轉用蓮藕或鹹魚都好好味道呢 ^^



材料 : 長型苦瓜 , 芫茜 , 鯪魚肉 , 豬肉碎 , 雞蛋

苦瓜洗淨去囊後切薄片放入大碗內 , 加入鹽拌勻靜待20分鐘

用水沖洗苦瓜後放入大碗 , 加入熱水浸3分鐘渣乾水份 , 芫茜洗淨切碎 , 雞蛋打出備用

大碗內加入鯪魚肉及豬肉拌勻 , 加入醃料拌勻靜待10分鐘 , 再放入雞蛋 , 苦瓜及芫茜拌勻 , 蓋上保鮮紙入雪櫃1小時

取出用手搓圓放入鑊中壓平 , 再用中火慢慢煎至兩面金黃色即可

材料 
長型苦瓜1條 , 芫茜 , 鯪魚肉$10 , 豬肉碎 , 雞蛋1隻

醃料 
生抽 , 糖 , 胡椒粉 , 麻油 , 油 , 生粉 , 水



做法
1. 苦瓜洗淨去囊後切薄片放入大碗內 , 加入鹽拌勻靜待20分鐘

2. 用水沖洗苦瓜後放入大碗 , 加入熱水浸3分鐘渣乾水份

3. 芫茜洗淨切碎 , 雞蛋打出備用

4. 大碗內加入鯪魚肉及豬肉拌勻 , 加入醃料拌勻靜待10分鐘

5. 再放入雞蛋 , 苦瓜及芫茜拌勻 , 蓋上保鮮紙入雪櫃1小時

6. 取出用手搓圓放入鑊中壓平

7. 再用中火慢慢煎至兩面金黃色即可 




金金黃黃的煎魚餅 , 簡單又好味呢 ^^