雙果山楂茶 (蘋果 + 羅漢果)

上次去花墟本應想買些少盆栽回家種植

大家知唔知袁太好喜歡種下小植物 , 不過以前在家種得太多

俾袁生話將間屋變成森林 , 從此唔俾我再種了 ......



之但係今次由袁生主動將間屋裝修

我同袁生都喜愛清清地的牆身配搭深色地板

木層或田園系列的裝飾或傢俱

從未如此咁鬼夾呢 , 所以就去花墟看看買什麼值物回家

裝飾下 , 點綴下 (難得袁生俾我再種 , 當然唔會放過咁好的機會)

不過可惜睇唔啱 , 又或者等間屋完全完工再買都未遲



雖然買唔到盆栽 , 但俾我見到有新鮮山楂

新鮮山楂聽就聽過 , 但未曾買過 , 亦未曾試過

檔主嬸嬸好落力推介 , 說山楂配蘋果羅漢果煲會好好味喎

袁太在猶疑買唔買之際

袁生已買了大半磅 , 叫我回家煲來飲飲

突然間咁快手 ??? 有d驚驚 , 其實只不過袁生比較喜愛酸的飲品或生果姐

回家後立刻煲 , 將材料放晒入煲內煲45分鐘再焗15分鐘

熱飲或凍飲都得

熱飲就比較酸 , 好似我咁唔太喜愛太酸的話

凍飲就會好些少 , 整體上味道唔錯



山楂的酸甜味 + 蘋果的甜味 + 羅漢果的甘苦味

味道複雜得來又幾好味 , 容易入口 , 大家有機會都煲來試下喇 ^^



材料 : 新鮮山楂 , 蘋果 , 羅漢果

新鮮山楂放入大碗內洗淨抹乾水份 , 蘋果洗淨去芯切薄片後浸入鹽水內5分鐘

煲內放入山楂及蘋果片 , 加入適量水 , 再放入整碎的羅漢果拌勻 , 用中火煲滾後蓋上蓋繼續用中火煲45分鐘

熄火再焗15分鐘即可 (冷熱皆宜)

材料
新鮮山楂大半磅 , 蘋果2個 , 羅漢果1個



做法
1. 新鮮山楂放入大碗內洗淨抹乾水份

2. 蘋果洗淨去芯切薄片後浸入鹽水內5分鐘

3. 煲內放入山楂及蘋果片 , 加入適量水

4. 再放入整碎的羅漢果拌勻 , 用中火煲滾後蓋上蓋繼續用中火煲45分鐘

5. 熄火再焗15分鐘即可 (冷熱皆宜)




閒時煲一大煲放雪櫃飲 , 好過飲汽水或紙包飲品呢 ^^