素蔬菜高湯 ... 冰

 

大家有印象之前袁太第一次自己煲雞湯 , 整成雞湯冰嗎 ???

感覺健康又方便後 , 相反現在已經唔想再依賴現成上湯

所以一有時間就會煮定一煲高湯

又整成冰冰 , 閒時用幾粒來浸菜 , 炆餸都容易得多 ......



自從我家豬豬上年走了 , 為豬豬食素積福德後

現在每逢初一 , 十五都食素的我們 , 開始對素菜感覺良好

因袁生本身係一位食肉獸 , 以為佢一定對素菜好反感

但居然完全沒有向袁太投訴過 , 仲話食多左素菜

腸胃好似好左 , 去大大都暢順左喎 , 其實佢有冇想過 , 如果可以戒埋煙

身體自然會好得多呢



所以今次煲高湯唔再用雞 , 亦唔用牛 , 唔用豬

只用多多蔬菜煲成一煲素高湯

平時浸冬菇時一定會留起冬菇蒂的我 , 用來煲高湯就最適合

高湯的顏色雖同雞湯顏色差不多 , 但味道就比較清澈

待涼後又放入製冰格內冷藏成高湯冰



多左份量的高湯可放入玻璃樽內 , 放入雪櫃下層備用

~不過大家要留意~

已冷藏成高湯冰的冰粒 , 放入冰箱冷藏可保存2-3個月

如果簡單將高湯放入玻璃樽 , 放入雪櫃下層的話

只可以保存3-4天的時間



同時大家如果唔喜愛大豆芽或甘旬的話

可將大豆芽轉用黃豆 , 甘旬轉用白蘿蔔 , 都一樣沒有問題呢 ^^



材料 : 冬菇蒂 , 粟米 , 椰菜 , 甘旬 , 大豆芽 , 紅棗 , 芹菜 , 薑 , 製冰器 , 隔篩

大豆芽去尾 , 用水沖洗乾淨後浸水10分鐘 , 盛起隔去水份 , 粟米洗淨切段 , 留起粟米鬚及粟米皮 , 將粟米皮撕成細條 , 甘旬去皮切片 , 薑去皮切片 , 紅棗洗淨去核 , 椰菜洗淨切大片 , 芹菜莖切段 , 芹菜葉留起裝飾

 


將大豆芽放入鑊中用慢火乾烘至乾身及微黃色(約20分鐘)盛起

煲內加入薑片及芹菜莖炒香 , 再加入甘旬片 , 粟米 , 大豆芽 , 冬菇蒂及紅棗拌勻 , 加入熱水用中火煲15分鐘

再加入椰菜 , 粟米外皮及粟米鬚拌勻 , 用中火煲30分鐘後轉慢火(不需加蓋) 煲1 1/2小時 , 煲好後熄火才蓋上蓋焗30分鐘

高湯焗30分鐘後將湯渣用篩隔去 , 待高湯待涼後逐一放入製冰格器內 , 蓋上保鮮紙放入冰箱冷藏一晚至硬身成高湯冰 , 取出放入保鮮袋封口可保存2-3個月

材料
冬菇蒂 , 粟米1條 , 椰菜1個 , 甘旬1條 , 大豆芽1/2斤 , 紅棗3粒 , 芹菜1扎 , 薑 , 製冰器 , 隔篩



做法
1. 大豆芽去尾 , 用水沖洗乾淨後浸水10分鐘 , 盛起隔去水份

2. 粟米洗淨切段 , 留起粟米鬚及粟米皮 , 將粟米皮撕成細條

3. 甘旬去皮切片 , 薑去皮切片 , 紅棗洗淨去核

4. 椰菜洗淨切大片 , 芹菜莖切段 , 芹菜葉留起裝飾

5. 將大豆芽放入鑊中用慢火乾烘至乾身及微黃色(約20分鐘)盛起

6. 煲內加入薑片及芹菜莖炒香

7. 再加入甘旬片 , 粟米 , 大豆芽 , 冬菇蒂及紅棗拌勻 , 加入熱水用中火煲15分鐘

8. 再加入椰菜 , 粟米外皮及粟米鬚拌勻

9. 用中火煲30分鐘後轉慢火(不需加蓋) 煲1 1/2小時

10. 煲好後熄火才蓋上蓋焗30分鐘

11. 高湯焗30分鐘後將湯渣用篩隔去

12. 待高湯待涼後逐一放入製冰格器內 , 蓋上保鮮紙放入冰箱冷藏一晚至硬身成高湯冰

13. 取出放入保鮮袋封口可保存2-3個月

自家製高湯健康美味無添加 , 大家都快快試下呢 ^^