自家製茄汁豆拌雞蛋豆腐

 

唔知大家兒時喜唔喜愛食茄汁豆呢 ???

仲記得袁太當時還是小朋友的時候 , 媽咪多數會買"是蜜味"茄汁豆

回來加餸 , 簡簡單單蒸熱佢都可以送到幾碗飯 ......

自從十幾年突然喜愛入廚之後 , 就同罐頭好少接觸了

(除午餐肉同五香肉丁除外 ^^)

何況今朝訓醒唔知痴左邊條筋好想好想食茄汁豆

大家可能會想 , 超市一罐細SIZE都唔駛10大元 , 就算突然想食

只要落街買就可以 , 絕對非常方便

但大家估錯了 , 袁太會自製茄汁豆 , 皆因廚房有黃豆

用來做茄汁豆就啱晒 , 當去街市買餸的時候 

袁生就打來叫我記得買茄汁豆

我的回應只係 ~我冇諗過買茄汁豆 , 我今朝已經浸左黃豆 , 會自己整喎~

點知電話中的袁生傳來幾句話

~黐左線咩 , 超市有罐頭唔買 , 咁辛苦自己整 , 傻架~

超 ... 你咪理喇 , 而家係我整姐 , 又唔係叫你幫手整 , 咁多聲氣做咩呢

以前會用茄汁豆配雞翼或腩肉 , 雖然好味 , 但我今次又唔想食肉

想簡簡單單配豆腐 , 應該都會好好味

見雪櫃有無糖豆漿 , 又來整雞蛋豆腐

將雞蛋豆腐沾上麵粉煎香再淋上茄汁豆又可以開餐呢 ^^

材料 : 黃豆 , 蕃茄 , 洋蔥 , 雞蛋 , 無糖豆漿 , 茄汁 , 鹽 , 胡椒粉 , 保鮮紙

黃豆放入大碗內 , 加水浸過面3小時後倒去水份 , 蕃茄洗淨切粒 , 洋蔥去皮切粒

燒紅鑊 , 放入洋蔥爆至微軟後加入蕃茄爆香至出茄油 , 加入黃豆及水 (水蓋過黃豆面就可以) , 用中火煮滾後蓋上蓋轉慢火煮30分鐘

加入茄汁 , 鹽 , 胡椒粉拌勻蓋上蓋繼續用慢火煮1小時至黃豆腍身 , 熄火焗30分鐘就可以

雞蛋打入碗中拌勻成蛋液 , 加入無糖豆漿及鹽拌勻

器皿放上保鮮紙 , 將豆漿蛋液用篩網隔去多餘泡沫及雜質

放入鑊中蓋上蓋用大火蒸2分鐘後 , 將鑊蓋留縫隙 , 轉慢火再蒸25分鐘

取出待涼後切成粒 , 放入器皿內蓋上保鮮紙放入雪櫃靜待10分鐘 

豆腐從雪櫃取出後每粒沾上麵粉 , 放入鑊中用慢火慢慢煎至兩面金黃色後放上碟

最後將茄汁豆用慢火煮熱 , 盛起淋在豆腐上即可

材料
黃豆 , 蕃茄3個 , 洋蔥1個 , 雞蛋3隻 , 無糖豆漿250ml , 茄汁1湯匙 , 鹽 , 胡椒粉 , 保鮮紙



做法
1. 黃豆放入大碗內 , 加水浸過面3小時後倒去水份

2. 蕃茄洗淨切粒 , 洋蔥去皮切粒

3. 燒紅鑊 , 放入洋蔥爆至微軟後加入蕃茄爆香至出茄油

4. 加入黃豆及水 (水蓋過黃豆面就可以) , 用中火煮滾後蓋上蓋轉慢火煮30分鐘

5. 加入茄汁 , 鹽 , 胡椒粉拌勻蓋上蓋繼續用慢火煮1小時至黃豆腍身

6. 熄火焗30分鐘就可以

7. 雞蛋打入碗中拌勻成蛋液 , 加入無糖豆漿及鹽拌勻 

8. 器皿放上保鮮紙 , 將豆漿蛋液用篩網隔去多餘泡沫及雜質 

9. 放入鑊中蓋上蓋用大火蒸2分鐘後 , 將鑊蓋留縫隙 , 轉慢火再蒸25分鐘

10. 取出待涼後切成粒 , 放入器皿內蓋上保鮮紙放入雪櫃靜待10分鐘 

11. 豆腐從雪櫃取出後每粒沾上麵粉

12. 放入鑊中用慢火慢慢煎至兩面金黃色後放上碟 

13. 最後將茄汁豆用慢火煮熱 , 盛起淋在豆腐上即可 
 



自家製茄汁豆絕對唔難 , 而且味道好味過罐頭好多呢 ^^