金銀蛋蒜子浸菠菜

好耐好耐冇食過菠菜 , 突然間腦海裡浮現金銀蛋浸菠菜呢個小菜 , 以往唔多煮菠菜一來袁生唔太鐘意食 , 二來總覺得菠菜經常好多泥 , 洗極都洗唔晒d泥 , 不過剛巧見到菠菜幾乾淨 , 就買了一斤回家用金銀蛋來煮 ......



其實只不過係廚房仲有兩隻鹹蛋同兩隻皮蛋 , 唔整又唔知幾時先會整 , 所以最方便就用來浸菜 , 鹹鹹地味道唔錯 , 以往煮菠菜都會切去根部才煮 , 不過後來發現 , 菠菜的根部係好有營養同益處 , 所以今次就連根部一同放入鑊中炒 , 又唔會浪費呢 , 而且浸菜做法絕對簡單 , 又可以拌飯 , 不過最估唔到原來簡單的小菜袁生都會有要求 , 就係要求加埋蒜子一齊煮



雖然我唔太鐘意食一粒粒的蒜頭 , 但都唔太抗拒 , 用炸蒜頭的油去炒番個菠菜 , 咁就唔會浪費咁香的蒜香油呢 ^^

材料 : 菠菜 , 鹹蛋 , 皮蛋 , 蒜頭 , 自家清雞湯 (也可用現成雞湯代替) , 鹽 , 胡椒粉

菠菜洗淨根部去泥 , 加2茶匙鹽將菠菜葉洗淨 , 再加水浸過面靜待10分鐘 , 10分鐘後將菠菜用手撕成段再洗淨 , 盛起瀝乾水份備用

皮蛋及鹹蛋去除表面污衊 , 用水沖一沖洗表面及瀝乾水份 , 蒜頭去衣保持完整粒 , 將1隻份量的鹹蛋白留起 , 1隻鹹蛋及1隻鹹蛋黃放入電蒸鍋內隔水蒸15分鐘 , 期間細鑊加約3湯匙油燒熱 , 放入蒜頭用慢火慢慢煎至兩面金黃色後盛起 , 炸蒜頭的油亦盛起 , 蒸好的鹹蛋黃切粒 , 另一隻鹹蛋及皮蛋分別去殼切粒

將炸蒜油放入鑊中燒熱 , 加入菠菜及少許鹽拌勻炒至菠菜熟透 , 盛起放上碟備用

原鑊放入皮蛋粒及鹹蛋粒(留少許鹹蛋黃粒最後放面用) , 加入200ml清雞湯及200ml水拌勻用中火煮滾 , 加入鹹蛋白拌勻後蓋上蓋用中火煮3分鐘 

最後加入炸蒜頭及少許胡椒粉調味拌勻 , 盛起淋在菠菜上 , 再放上餘下的鹹蛋黃粒即可

材料 
菠菜1斤 , 鹹蛋2隻 , 皮蛋2隻 , 蒜頭1個, 自家清雞湯200ml (也可用現成雞湯代替) , 鹽 , 胡椒粉


做法
1. 菠菜洗淨根部去泥 , 加2茶匙鹽將菠菜葉洗淨 , 再加水浸過面靜待10分鐘 

2. 10分鐘後將菠菜用手撕成段再洗淨 , 盛起瀝乾水份備用

3. 皮蛋及鹹蛋去除表面污衊 , 用水沖一沖洗表面及瀝乾水份 

4. 蒜頭去衣保持完整粒 , 將1隻份量的鹹蛋白留起 

5. 1隻鹹蛋及1隻鹹蛋黃放入電蒸鍋內隔水蒸15分鐘 

6. 期間細鑊加約3湯匙油燒熱 , 放入蒜頭用慢火慢慢煎至兩面金黃色後盛起

7. 炸蒜頭的油亦盛起 

8. 蒸好的鹹蛋黃切粒 , 另一隻鹹蛋及皮蛋分別去殼切粒

9. 將炸蒜油放入鑊中燒熱 , 加入菠菜及少許鹽拌勻炒至菠菜熟透 , 盛起放上碟備用 

10. 原鑊放入皮蛋粒及鹹蛋粒(留少許鹹蛋黃粒最後放面用) 

11. 加入200ml清雞湯及200ml水拌勻用中火煮滾 

12. 加入鹹蛋白拌勻後蓋上蓋用中火煮3分鐘 

13. 最後加入炸蒜頭及少許胡椒粉調味拌勻 , 盛起淋在菠菜上 , 再放上餘下的鹹蛋黃粒即可

簡單美味的浸菠菜 , 無論拌飯 , 拌麵都一樣咁正呢 ^^