蒜蓉豆豉醬拌雞蛋豆腐

袁生突然話好想食蒜蓉豆豉醬 , 以往豆豉醬我會去大孖醬園到買 , 不過屋企個包上次用完 , 又唔記得入貨 , 但又懶搭車出去買 , 所以就唯有自製簡單的豆豉醬 , 之但係整左豆豉醬後 , 唔知袁大爺今次想用豆豉醬來配什麼食物呢 ......



袁生好快地已經講要食雞蛋豆腐 , 雞蛋豆腐 ??? 咪又要我用黃豆整豆漿再加雞蛋蒸 , ~哈~你真係唔複雜既野都唔會叫我整喎 , 不過你開到口我一定會整俾你食 , 但我有一個問題 , 點解你咁鐘意食雞蛋豆腐呢 ??? 袁生只好簡單地答 : 喜愛滑滑的感覺 , 完全唔似妳塊面咁 "鞋烚烚" , ~頂~ 好心問下點解鐘意食豆腐姐 , 唔駛繞圈子話我塊面既 , 塊面鞋親你真係唔好意思囉



說回主題 , 雞蛋豆腐蒸好後切件放雪櫃雪一雪 , 然後再簡單炒香豆豉醬材料再攞去蒸 , 豆腐雪凍後沾上麵粉煎香 , 最後將豆豉醬淋上豆腐面就大功告成 , 濃濃的豆豉醬加上嫩滑的豆腐 , 俾碗白飯我都可以送到成碗飯架 ^^ 

材料 : 無糖豆漿 , 雞蛋 , 蒜頭 , 豆豉 , 蔥 , 薑 , 辣椒 , 鹽 , 麵粉 , 酒 , 保鮮紙

雞蛋打入碗中拌勻成蛋液 , 加入無糖豆漿及鹽拌勻 , 器皿放上保鮮紙 , 將豆漿蛋液用篩網隔去多餘泡沫及雜質 , 放入電蒸鍋內蓋上蓋先蒸2分鐘 , 再將蓋留縫隙 , 再蒸25分鐘

蒸好的豆腐待涼10分鐘後再切成件 , 放上碟再蓋上保鮮紙放入雪櫃靜待30分鐘 , 期間將蒜蓉去衣剁成細粒 , 薑去皮切細粒 , 辣椒切粒 , 蔥洗淨切粒及幼絲

燒紅鑊 , 先爆香豆豉醬及蒜粒 , 再加入薑粒及辣椒炒數分鐘 , 炒至有香味後熄火放入碗內 , 再加入蔥粒拌勻後放入另一碟內

將豆豉醬放入電蒸鍋內 , 蓋上蓋蒸10分鐘至出味 , 取出加入少許生抽 , 糖及熟油拌勻成豆豉醬備用

將雞蛋豆腐從雪櫃取出後每件沾上麵粉 , 放入鑊中用慢火慢慢煎至兩面金黃色放上碟 , 淋上豆豉醬 , 最後灑上蔥絲即可

材料 
無糖豆漿500ml , 雞蛋5隻 , 蒜頭1個 , 豆豉 , 蔥 , 薑 , 辣椒2隻 , 鹽 , 麵粉 , 酒 , 保鮮紙



做法

1. 雞蛋打入碗中拌勻成蛋液 , 加入無糖豆漿及鹽拌勻

2. 器皿放上保鮮紙 , 將豆漿蛋液用篩網隔去多餘泡沫及雜質 

3. 放入電蒸鍋內蓋上蓋先蒸2分鐘 , 再將蓋留縫隙 , 再蒸25分鐘

4. 蒸好的豆腐待涼10分鐘後再切成件 , 放上碟再蓋上保鮮紙放入雪櫃靜待30分鐘 

5. 期間將蒜蓉去衣剁成細粒 , 薑去皮切細粒 , 辣椒切粒 , 蔥洗淨切粒及幼絲

6. 燒紅鑊 , 先爆香豆豉醬及蒜粒 , 再加入薑粒及辣椒炒數分鐘 

7. 炒至有香味後熄火放入碗內 , 再加入蔥粒拌勻後放入另一碟內

8. 將豆豉醬放入電蒸鍋內 , 蓋上蓋蒸10分鐘至出味 

9. 取出加入少許生抽 , 糖及熟油拌勻成豆豉醬備用

10. 將雞蛋豆腐從雪櫃取出後每件沾上麵粉 

11. 放入鑊中用慢火慢慢煎至兩面金黃色放上碟 , 淋上豆豉醬 , 最後灑上蔥絲即可 




做法簡單又好味的豆豉醬 , 用剩的放入雪櫃留待下次用來拌雞翼呢 ^^