椰糖麵包布甸

最近比較喜愛食甜野 , 大家係咪覺得袁太呢排多左上傳甜的食譜呢 , 之前有燉蛋 , 燉蛋白 , 西米焗布甸 , 今次就有佢 ~麵包布甸~ ......

麵包布甸過往會用玉桂粉 , 雞蛋 , 牛奶 , 糖 , 再加蜜桃去製作 , 不過袁生好似唔多鐘意呢款布甸 , 唔知佢係唔鐘意玉桂粉還是唔鐘意蜜桃呢 ??? 唉 ... 話之佢喇 , 之但係我今次又想用唔同的材料做布甸喎 , 今次選擇了用椰汁配椰糖去整 , 未整都知一定甜到漏 , 因為椰糖對於我來說係一樣好甜的野黎呢



有時見街的麵包布甸 , 都會將麵包完全浸係蛋糊內 , 我就唔太鐘意呢 , 我比較鐘意蛋糊只浸麵包的一半份量 , 咁焗的時候麵包就會變得脆脆 , 我覺得會好味d , 而且袁生都鐘意用椰汁椰糖做的麵包布甸呢 ^^



材料 : 雞蛋 , 白方包 , 椰漿 , 椰糖 , 牛奶 , 牛油 , 青提子乾 , 鹽 , 椰絲 , 焗爐紙 , 焗盤 , 隔篩

焗盤放上焗爐紙 , 將兩片白方包放上 , 放入焗爐用170C上下火焗5分鐘至脆身 , 用手撕成細塊備用

將牛奶放入煲內 , 加入椰糖拌勻 , 用慢火慢慢煮至椰糖溶 , 倒入大碗內再逐一加入椰漿 , 雞蛋及少許鹽拌勻 , 用隔篩將蛋糊篩入量杯內

焗盤用掃掃上牛油 , 放入麵包碎及青提子乾 , 再加入蛋漿至半分滿後靜待10分鐘 , 放入焗爐用170C上下火焗20分鐘至熟透 , 取出待涼10分鐘後灑上椰絲即可

 
材料
雞蛋2隻 , 白方包2片 , 椰漿130ml , 椰糖35g , 牛奶50ml , 牛油 , 青提子乾 , 鹽 , 椰絲 , 焗爐紙 , 焗盤 , 隔篩

做法

1. 焗盤放上焗爐紙 , 將兩片白方包放上 , 放入焗爐用170C上下火焗5分鐘至脆身

2. 用手撕成細塊備用

3. 將牛奶放入煲內 , 加入椰糖拌勻 , 用慢火慢慢煮至椰糖溶 

4. 倒入大碗內再逐一加入椰漿 , 雞蛋及少許鹽拌勻 , 用隔篩將蛋糊篩入量杯內

5. 焗盤用掃掃上牛油 , 放入麵包碎及青提子乾 

6. 再加入蛋漿至半分滿後靜待10分鐘 

7. 放入焗爐用170C上下火焗20分鐘至熟透 , 取出待涼10分鐘後灑上椰絲即可




用椰糖做的麵包布甸 , 雖然味道比較甜 , 但我同袁生都覺得味道唔錯呢 ^^