辣辣五香肉丁

五香肉丁我家袁生非常愛吃 , 閒時鐘意買幾罐回家 , 煎個午餐肉 , 煮個米粉 , 落幾舊肉丁就一餐 , 不過經常感覺罐頭冇咩益處 , 所以見袁生前幾日又話想食肉丁的時候 , 我就選擇用梅頭肉 , 實行自家製 ......



買梅頭整肉丁一定要選擇半肥瘦 , 咁煮出黎就唔會硬到連牙都咬崩埋 , 如果大家唔怕肥 , 亦可以用腩肉代替 , 在家整肉丁都唔駛用好多時間 , 只係浸肉丁的時候用上45分鐘 , 再將上左色的肉丁 , 連調味料用慢火炒幾分鐘就得 , 自己整可以唔落咁多辣椒油 , 咁食落就唔駛辣到噴火呢 , 如果唔鐘意食辣的朋友 , 都可以將辣椒油的份量刪除 , 唔辣版的五香肉丁都唔錯架



當袁太整好個肉丁後 , 袁生已急不及待用黎拌公仔麵 , 食唔晒的肉丁放入雪櫃 , 下次可以用來炒飯或者拌白粥都得呢 ^^



材料 : 梅頭豬肉 , 京蔥 , 五香粉 , 辣椒粉 , 蒜頭 , 薑 , 酒 , 鹽 , 糖 , 辣椒油 , 油 , 水 , 芫茜(裝飾用可省略)

梅頭肉切粒 , 京蔥切段 , 薑去皮切絲 , 蒜頭去衣切細粒 , 將梅頭肉放入鑊中 , 加入京蔥 , 薑絲 , 酒 , 五香粉 , 老抽 , 加入500ml水拌勻 , 用中火煮滾後蓋上蓋轉慢火煮45分鐘 , 煮45分鐘後肉粒已經上晒色 , 盛起肉粒備用

鑊中加入蒜粒 , 五香粉 , 辣椒粉 , 辣椒油 , 鹽 , 糖拌勻炒至有香味 , 將肉粒回鑊用慢火炒數分鐘至慢慢發出辣味即可

材料
梅頭豬肉 , 京蔥1條 , 五香粉 , 辣椒粉 , 蒜頭1/2個 , 薑 , 酒 , 鹽 , 糖 , 辣椒油 , 油 , 水500ml , 芫茜(裝飾用可省略)



做法
1. 梅頭肉切粒 , 京蔥切段 , 薑去皮切絲 , 蒜頭去衣切細粒 

2. 將梅頭肉放入鑊中 , 加入京蔥 , 薑絲 , 酒 , 五香粉 , 老抽 , 加入500ml水拌勻 

3. 用中火煮滾後蓋上蓋轉慢火煮45分鐘 

4. 煮45分鐘後肉粒已經上晒色 , 盛起肉粒備用

5. 鑊中加入蒜粒 , 五香粉 , 辣椒粉 , 辣椒油 , 鹽 , 糖拌勻炒至有香味 

6. 將肉粒回鑊用慢火炒數分鐘至慢慢發出辣味即可




自家製肉丁的味道 , 絕對唔會差得過街買的罐頭 , 而且勝在夠健康 , 冇防腐劑 , 加個公仔麵及幾條菜 , 當早餐 , 午餐 , 晚餐同宵夜都得呢 ^^