豬橫脷粟米節瓜湯

平日街市差不多關門的時候 , 才有一份份的生果 , 蔬菜出現 , 之不過前幾日下午時份行街市 , 居然見有一份份節瓜 , 六蚊一份有成四個咁多 , 袁太當然唔執輸買一份 , 第一時間聯想到首選一定用來煲湯 , 因節瓜湯係麻煩友最愛的湯水系列之一 ......



今次的節瓜究竟用豬展煲 ??? 瘦肉煲還是雞腳煲好呢 ??? 袁生二話不說已選擇 , 不過唔係袁太建議個三款 , 而係用豬橫脷煲 , 其實豬橫脷以前只煲過一次 , 不過係配霸王花煲 , 而唔係配節瓜煲



仲有我唔知點解袁生真係好鬼鐘意食節瓜 , 愛的程度無論用來炆 , 用來煲 , 用來炒 , 佢多多都食得落 , 而煲節瓜湯我最愛配鱆魚 , 眉豆一齊煲 , 呢款節瓜湯又係湯渣夠多 , 最近天氣熱熱地 , 落下雨又感覺少許涼風 , 唔想煮飯 , 煲一大煲節瓜湯 , 唔再煮其他野只飲湯都夠飽飽呢 ^^

材料 : 節瓜 , 粟米 , 紅蘿蔔 , 鱆魚(切細條預先加水浸軟) , 眉豆 , 生薏米 , 花生 , 豬橫脷 , 蜜棗 , 南北杏 , 鹽

豬橫脷撕去白色筋模 , 用水沖一沖洗放入煲內加水 , 用中火煮滾出水 , 盛起豬橫脷用水沖洗乾淨切件 , 節瓜用匙羹刮去外皮 , 紅蘿蔔去皮 , 將節瓜切去頭及尾部切半 , 紅蘿蔔切件 , 粟米切段 , 眉豆 , 花生 , 生薏米用水沖一沖洗及瀝乾 , 鱆魚用水沖一沖洗

煲內逐一加入粟米 , 紅蘿蔔 , 鱆魚 , 眉豆 , 生薏米 , 花生 , 蜜棗 , 南北杏及適量水拌勻 , 用中火煲至滾起後加入節瓜 , 繼續用中火煲15分鐘 , 蓋上蓋轉慢火煲1 1/2小時  

1 1/2小時後加入豬橫脷拌勻 , 蓋上蓋繼續用慢火煲30分鐘 , 最後加少許鹽調味拌勻 , 轉用大火煲滾 , 熄火焗30分鐘即可

材料 
節瓜2個 , 粟米1條 , 紅蘿蔔1條 , 鱆魚1/2塊(切細條預先加水浸軟) , 眉豆 , 生薏米 , 花生 , 豬橫脷1條 , 蜜棗3粒 , 南北杏 , 鹽



做法

1. 豬橫脷撕去白色筋模 , 用水沖一沖洗放入煲內加水 , 用中火煮滾出水 

2. 盛起豬橫脷用水沖洗乾淨切件 

3. 節瓜用匙羹刮去外皮 , 紅蘿蔔去皮 

4. 將節瓜切去頭及尾部切半 , 紅蘿蔔切件 , 粟米切段

5. 眉豆 , 花生 , 生薏米用水沖一沖洗及瀝乾 , 鱆魚用水沖一沖洗

6. 煲內逐一加入粟米 , 紅蘿蔔 , 鱆魚 , 眉豆 , 生薏米 , 花生 , 蜜棗 , 南北杏及適量水拌勻 

7. 用中火煲至滾起後加入節瓜 , 繼續用中火煲15分鐘 

8. 蓋上蓋轉慢火煲1 1/2小時   

9. 1 1/2小時後加入豬橫脷拌勻 , 蓋上蓋繼續用慢火煲30分鐘 

10. 最後加少許鹽調味拌勻 , 轉用大火煲滾 , 熄火焗30分鐘即可

湯水味道濃濃又多湯渣 , 飲碗湯都飽飽地 , 飯都可以唔駛煮 , 唔駛食呢 ^^