五香魚露蒸炸雞翼

某日執雪櫃的時候 , 無意中係百寶箱發現雞中翼的蹤影 , 所以又來整雞翼俾袁生做宵夜 , 從前唔愛吃雞翼的麻煩友 , 為何突然對雞翼愛不釋手 ??? 但麻煩友又唔喜愛晚晚同一樣餸 , 有時諗晚餐煮咩餸真係頭大埋 , 好彩雞翼做法多 , 絕對難唔到我 ......


 
雞翼無論煎 , 蒸 , 炸 , 炆 , 焗 , 滷水樣樣得 , 睇開袁太廚房的朋友仔 , 一定知袁生袁太離不開最愛用炸的方式 , 炸到雞皮脆卜卜又香口的味道 , 真係好難抗拒 , 而且炸雞翼做法好簡單 , 將雞中翼加入五香粉 , 魚露一齊醃 , 本應醃佢幾粒鐘攞去炸就可以 , 不過我又想d雞翼入味少少 , 就將雞翼放入雪櫃醃足一日 , 到時炸的時候一定好夠味



不過炸炸下又覺得全部份量拎去炸會唔會好熱氣 , 所以決議將幾隻雞翼轉用蒸的方法 , 實行又蒸又炸 , 雙重滋味 , 唔知袁生喜愛蒸還是炸呢 ^^



材料 : 雞中翼 , 薑汁蓉(預先連皮磨成蓉) , 五香粉 , 魚露 , 鹽 , 糖 , 生粉 , 麵粉 , 酒 , 黑胡椒碎

雞翼用水沖洗及抹乾水份 , 用叉吉下雞翼兩面(令雞翼可以入味d) , 放入大碗內先加入五香粉 , 薑蓉及醃料拌勻靜待一晚(如冇時間,最少醃2小時)

醃一晚的雞翼從雪櫃取出 , 期間將麵粉 , 生粉 , 黑胡椒碎及鹽拌勻 , 適量份量的雞翼逐一沾上薄薄一層粉 , 放入油鑊中先用慢火半煎炸方式慢慢炸 , 期間拌一拌勻雞翼以免黏底 , 炸至微黃色後盛起靜待10分鐘

雞翼靜置期間將餘下份量的雞翼放入碟內 , 放入電蒸鍋內隔水蒸12分鐘再焗5分鐘 , 將炸雞翼回鑊用中火炸第二次 , 期間拌一拌勻雞翼 , 等雞翼可以炸得平均d , 炸至雞翼金黃色即可

材料
雞中翼10隻 , 薑汁蓉(預先連皮磨成蓉) , 五香粉1湯匙 , 鹽 , 糖 , 生粉 , 麵粉 , 酒 , 黑胡椒碎

醃料
魚露 , 生抽 , 酒 , 糖



做法
1. 雞翼用水沖洗及抹乾水份 , 用叉吉下雞翼兩面(令雞翼可以入味d) 

2. 放入大碗內先加入五香粉 , 薑蓉及醃料拌勻靜待一晚(如冇時間,最少醃2小時)

3. 醃一晚的雞翼從雪櫃取出 , 期間將麵粉 , 生粉 , 黑胡椒碎及鹽拌勻 

4. 適量份量的雞翼逐一沾上薄薄一層粉 

5. 放入油鑊中先用慢火半煎炸方式慢慢炸 , 期間拌一拌勻雞翼以免黏底 

6. 炸至微黃色後盛起靜待10分鐘

7. 雞翼靜置期間將餘下份量的雞翼放入碟內 

8. 放入電蒸鍋內隔水蒸12分鐘再焗5分鐘 

9. 將炸雞翼回鑊用中火炸第二次 , 期間拌一拌勻雞翼 , 等雞翼可以炸得平均d 

10. 炸至雞翼金黃色即可 




蒸同炸都同樣美味 , 不過袁生都係比較喜愛炸個邊呢 ^^