2018年8月10日 星期五

[白蘑菇雜豆炒飯底] 多多芝士蕃茄焗豬扒飯




我家袁生平時好喜愛 ... 好喜愛去"大大活"或者"大快樂"食焗豬扒飯 , 但袁太經常有疑問 , 點解一位唔太喜愛食蕃茄的人(因袁生平時會嫌蕃茄酸味太重) , 反而會喜歡豬扒飯 ...... 



因我覺得連鎖快餐店的焗豬扒飯 , 蕃茄的酸味都比較重 , 但見袁生成日食 , 又唔見佢有投訴 , 剛巧俾我發現冰箱有豬扒 , 雪櫃又有芝士同冷飯 , 嘻 ... 嘻 ... 大家應該都知我想點喇 , 就係自己整個焗豬扒飯俾袁生食 , 快快手去街市買蕃茄同其餘材料 , 為左預防袁生有所挑剔 , 我就盡量唔整太酸 , 因茄膏的酸味本身都幾重 , 又或者轉個比喻 , 出街食少許酸佢就接受得到 , 反而如果我整得酸 , 佢就一定會嘈嘈閉 , 袁生的性格就是這樣



整芝士焗飯或焗意粉 , 袁太都喜愛用呢款芝士 , 好簡單可以係超市搵到




不過以我印象中街既焗豬扒飯的炒飯底裡面會有蘑菇或者雜豆 , 咁袁太就一於照用呢兩樣整個炒飯底 , 平時袁生對於炒粉麵一定會多多要求 , 不過今次的焗豬扒飯他只有一個要求 , 就係要有多多芝士碎 , 唔多芝士佢絕對唔會收貨



今次整左兩大盆 , 一盆就加多多芝士做晚餐 , 另一盆就走芝士 , 普通的蕃茄豬扒飯俾袁生做翌日午餐 , 焗豬扒飯熱辣辣焗起當然係最好味 , 無論芝士 , 豬扒或者炒飯都出晒煙 , 好鬼正 , 連袁生都讚不絕口 , 下次一定要再encore呢 ^^
 


材料 : 冷飯 , 有骨豬扒 , 蕃茄 , 白蘑菇 , 雜豆 , 雞蛋 , Mozzarella&Cheddar芝士碎 , 茄膏 , 蒜頭 , 洋蔥 , 上湯 , 糖 , 生粉 , 黑胡椒碎 , 麵粉 , 焗盤




有骨豬扒用刀背拍鬆兩面 , 放入大碗內加入醃料拌勻靜待30分鐘 , 白蘑菇切片 , 雜豆用水沖一沖洗及瀝乾 , 兩隻雞蛋打成蛋液 
















白蘑菇及雜豆放入鑊中 , 加少許鹽拌勻用中火炒數分鐘至微軟先盛起 , 將一半份量蛋液放入鑊中拌勻炒成蛋粒 , 加入冷飯 , 少許鹽調味拌勻炒散 , 將餘下份量蛋液加入 , 用中火快炒拌勻至冷飯乾身 , 加入之前盛起的白蘑菇及雜豆2/3份量拌勻 , 盛起放入焗盤內 , 餘下的兩隻雞蛋拌勻成蛋液



























將醃好的豬扒逐一沾上蛋液及麵粉 , 放入鑊中用慢火慢慢煎至金黃色 , 盛起原塊豬扒放上炒飯面










洋蔥及蒜頭去衣 , 洋蔥切幼條 , 蒜頭切粒 , 蕃茄洗淨切件 , 燒紅鑊加入蒜粒及洋蔥爆香 , 再加入茄膏 , 少許鹽及黃糖調味 , 加入蕃茄拌勻炒數分鐘至蕃茄軟身 , 再加入上湯拌勻用中火煮幾分鐘至滾起 , 加入麵粉拌勻煮至汁稍為杰身 , 再將餘下份量的白蘑菇及雜豆加入拌勻成汁料
















將汁料淋在豬扒上 , 再灑多多Mozzarella&Cheddar芝士碎 , 放入焗爐先用上下火220C焗15分鐘 , 再轉用180C上火焗5分鐘至芝士成金黃色 , 焗好後取出靜待10分鐘即可















材料
冷飯3碗 , 有骨豬扒4塊 , 蕃茄3個 , 白蘑菇 , 雜豆 , 雞蛋4隻 , Mozzarella&Cheddar芝士碎 , 茄膏2湯匙 , 蒜頭1/2個 , 洋蔥1個 , 上湯300ml , 糖 , 生粉 , 黑胡椒碎 , 麵粉 , 焗盤

醃料
生抽 , 生粉 , 糖 , 麻油 , 黑胡椒碎



做法
1. 有骨豬扒用刀背拍鬆兩面 , 放入大碗內加入醃料拌勻靜待30分鐘 

2. 白蘑菇切片 , 雜豆用水沖一沖洗及瀝乾 

3. 兩隻雞蛋打成蛋液   

4. 白蘑菇及雜豆放入鑊中 , 加少許鹽拌勻用中火炒數分鐘至微軟先盛起 

5. 將一半份量蛋液放入鑊中拌勻炒成蛋粒 , 加入冷飯 , 少許鹽調味拌勻炒散 

6. 將餘下份量蛋液加入 , 用中火快炒拌勻至冷飯乾身 

7. 加入之前盛起的白蘑菇及雜豆2/3份量拌勻 , 盛起放入焗盤內 

8. 餘下的兩隻雞蛋拌勻成蛋液

9. 將醃好的豬扒逐一沾上蛋液及麵粉 , 放入鑊中用慢火慢慢煎至金黃色 

10. 盛起原塊豬扒放上炒飯面 

11. 洋蔥及蒜頭去衣 , 洋蔥切幼條 , 蒜頭切粒 , 蕃茄洗淨切件 

12. 燒紅鑊加入蒜粒及洋蔥爆香 

13. 再加入茄膏 , 少許鹽及黃糖調味 , 加入蕃茄拌勻炒數分鐘至蕃茄軟身

14. 再加入上湯拌勻用中火煮幾分鐘至滾起 , 加入麵粉拌勻煮至汁稍為杰身 

15. 再將餘下份量的白蘑菇及雜豆加入拌勻成汁料 

16. 將汁料淋在豬扒上 , 再灑多多Mozzarella&Cheddar芝士碎 

17. 放入焗爐先用上下火220C焗15分鐘 , 再轉用180C上火焗5分鐘至芝士成金黃色 

18. 焗好後取出靜待10分鐘即可 




新鮮焗出來熱辣辣超好味 , 豬扒好淋身又夠juicy , 絕對唔鞋口 , 而且芝士又夠多 , 好味道 , 另外走芝士版的蕃茄豬扒飯 , 超多蕃茄汁 , 一定好濃味呢 ^^







16 則留言:

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......