雞蛋豆腐蒸滑滑水蛋

哈 ... 袁太又整雞蛋豆腐喇 , 起初整雞蛋豆腐只因袁生喜愛 , 但慢慢亦變成了袁太的至愛 , 喜愛它滑滑的口感 , 喜愛它有雞蛋的香味 , 喜愛它可以多元化烹調 , 可以加入湯內煮 , 可以用作火鍋 , 可以拎去炸成小食 , 點煮都得 ......

之前袁太就試過用來煮粟米羹 , 試過用來整椒鹽豆腐 , 用作火鍋就更加試過無數次 , 今次就比較簡單少少 , 用來蒸水蛋吧 , 天氣炎熱冇咩胃口 , 食湯飯或水蛋就最適合 , 而且最近日日都落雨 , 亦因為上次覆診腰痛關係 , 袁生下左禁制令唔俾袁生落街 , 話落雨地面濕滑危險喎 , 袁太足足係屋企坐左四日監 , 已經四日冇落街 , 好悶呢 , 呢幾日所有早餐同買餸都係袁生一手包辦 , 真的辛苦晒



大家都知蒸水蛋真的好鬼簡單 , 將雞蛋加水或雞湯拌勻 , 蓋上保鮮紙蒸就食得 , 一般蒸水蛋袁太多數會整三色蛋 , 粉絲肉碎蒸蛋或豆腐蒸蛋 , 以往會買超市一盒盒的蒸煮滑豆腐回家切片或切粒配蛋液蒸 , 而家只係將一盒盒的豆腐換上自製的雞蛋豆腐 , 做法完全一樣 , 水蛋絕對係一道好拌飯的小菜 , 每次都可以食到幾碗飯 , 今次整雞蛋豆腐的時候 , 見仲有無糖豆漿剩 , 唔想浪費的情況下 , 又整多一兜雞蛋豆腐 , 大家又估唔估到呢兜雞蛋豆腐 , 袁太又會用來炮製咩美食 ??? 遲幾日再同大家分享呢 ^^

材料 : 雞蛋 , 凍熟油 , 無糖豆漿 , 水 , 胡椒粉 , 隔篩 , 鹽 , 保鮮紙 , 蔥

三隻雞蛋打入碗中 , 加入鹽及無糖豆漿拌勻 , 器皿放上保鮮紙 , 將豆漿蛋液用篩網隔去多餘泡沫及雜質 , 先放入蒸鍋內蓋上蓋蒸2分鐘 , 再蒸25分鐘 , 用筷子將鑊蓋留縫隙(可避免蒸出來的豆腐過老或變火山口) 

蒸好的雞蛋豆腐稍為待涼切件 , 放入蒸盆內

餘下三隻雞蛋打入大碗內 , 加少許胡椒粉調味拌勻 , 再加入1倍半水的份量(225ml)拌勻 , 用隔網去雜質放入雞蛋豆腐的蒸盆內 , 再蓋上保鮮紙 , 放入電蒸鍋內蓋上蓋蒸15分鐘 , 期間將蔥切粒及切幼絲 , 蒸15分鐘後再焗5分鐘 , 最後淋上少許麻油 , 凍熟油及豉油 , 再灑上蔥粒及蔥絲即可

材料 
雞蛋6隻 , 凍熟油 , 無糖豆漿300ml , 水225ml , 胡椒粉 , 隔篩 , 鹽 , 保鮮紙 , 蔥

做法
1. 三隻雞蛋打入碗中 , 加入鹽及無糖豆漿拌勻 

2. 器皿放上保鮮紙 , 將豆漿蛋液用篩網隔去多餘泡沫及雜質 

3. 先放入蒸鍋內蓋上蓋蒸2分鐘 

4. 再蒸25分鐘 , 用筷子將鑊蓋留縫隙(可避免蒸出來的豆腐過老或變火山口) 

5. 蒸好的雞蛋豆腐稍為待涼切件 , 放入蒸盆內

6. 餘下三隻雞蛋打入大碗內 

7. 加少許胡椒粉調味拌勻 , 再加入1倍半水的份量(225ml)拌勻 

8. 用隔網去雜質放入雞蛋豆腐的蒸盆內 , 再蓋上保鮮紙 

9. 放入電蒸鍋內蓋上蓋蒸15分鐘 

10. 期間將蔥切粒及切幼絲 

11. 蒸15分鐘後再焗5分鐘 , 最後淋上少許麻油 , 凍熟油及豉油 , 再灑上蔥粒及蔥絲即可 




清清淡淡的豆腐蒸水蛋 , 無論雞蛋豆腐或水蛋都同樣滑滑溜溜 , 好好拌飯呢 ^^