<美的智能高速鍋MY-SS5033食譜> 雜菜牛肉濃湯

原來袁太已失蹤左一個星期冇上傳食譜 , 其實袁太唔係懶架 , 只係為家中的美的智能高速鍋(MY-SS5033)開封 , 大家都知 , 袁太一向煲湯 , 炆餸 , 煲粥等等都係用明火煮食 , 一下止叫袁太用高速鍋煮食 , 會唔會唔上手 ??? 會唔會唔習慣 ??? 答案係 ... 非常易上手 , 非常習慣 , 非常喜歡 ......



前幾日為家中的高速鍋開封 , 美的智能高速鍋(MY-SS5033)設備齊全 , 有兩個內鍋 , 飯勺 , 量杯 , 蒸架 , 好鬼齊全呢 , 而且美的智能高速鍋有多種功能選擇 , 可以煮出不同類型的美味食物 

開封後第一樣煮的食物係牛肉濃湯 , 袁太好開心話俾大家知 , 上次覆診醫生告知袁太可以食番牛喇 , 只要適可而止唔好過量就得 , 所以由如放監一樣 , 拿拿臨去街市買條靚牛展 , 煲牛肉湯袁太最愛加雜菜 , 都係離不開個幾樣主打材料~蕃茄 , 甘旬 , 西芹 , 薯仔~ , 不過呢款牛肉湯另加入燒烤大菇 , 啖湯煲出來除有濃濃的牛肉味外 , 還有香噴噴的菇菇味道 , 以往用明火煲需要大約2小時的時間 , 但用美的智能速鍋只需30分鐘就得 , 時間少左好多之餘 , 仲唔駛睇火 , 可以安心睇電視 , 整食譜相或休息一下



唔知係咪太耐冇食牛牛的關係 , 覺得啖湯好好味 , 味道好濃郁 , 而袁生試味後仲話俾明火煲既還要好味 , 高速鍋真係一個好幫手 , 袁太完全愛上了呢 ^^



材料 : 牛展 , 甘旬 , 西芹 , 洋蔥 , 蕃茄 , 薯仔 , 燒烤大菇 , 茄膏 , 鹽 , 黑胡椒粒 , 月桂葉 , 熱水 

牛展切大件放入煲內 , 加入水用中火煮滾 , 用水沖一沖洗 , 再瀝乾水份後切細件 , 西芹去纖維 , 甘旬去皮 , 洋蔥去衣 , 薯仔去皮 , 分別將西芹 , 甘旬 , 薯仔 , 洋蔥切粒 , 蕃茄洗淨切粒 , 燒烤大菇切粒

煲內加少許油燒熱 , 放入燒烤菇粒爆香 , 再加入西芹粒 , 甘旬粒 , 薯仔粒 , 洋蔥粒 , 蕃茄粒快炒拌勻 , 再加入2湯匙茄膏及牛展拌勻

將材料放入美的智能高速鍋的煲內 , 加入3杯水熱水份量 , 少許鹽調味及月桂葉拌勻 , 蓋上蓋先按<菜單> , 選擇煲湯功能 , 再按<烹飪模式> , 選擇標準模式 , 再按<開始> , 之後會有時間顯示需時多久

 

高速鍋煮完後會發出嗶嗶聲響 , 此時安全眼會凸出 , 用手向右排氣 , 當安全眼落下代表排氣完成 , 便可打開鍋蓋 , 將湯內的牛展盛起切粒 , 放回湯內再加少許鹽 , 黑胡椒碎調味拌勻即可

材料
牛展1條 , 甘旬1條 , 西芹1/2扎 , 洋蔥1個 , 蕃茄3個 , 薯仔1個 , 燒烤大菇2個 , 茄膏2湯匙 , 鹽 , 黑胡椒粒 , 月桂葉4-5片 , 熱水3杯



做法
1. 牛展切大件放入煲內 , 加入水用中火煮滾 , 用水沖一沖洗 , 再瀝乾水份後切細件 

2. 西芹去纖維 , 甘旬去皮 , 洋蔥去衣 , 薯仔去皮 

3. 分別將西芹 , 甘旬 , 薯仔 , 洋蔥切粒 , 蕃茄洗淨切粒 , 燒烤大菇切粒

4. 煲內加少許油燒熱 , 放入燒烤菇粒爆香

5. 再加入西芹粒 , 甘旬粒 , 薯仔粒 , 洋蔥粒 , 蕃茄粒快炒拌勻 

6. 再加入2湯匙茄膏及牛展拌勻  

7. 將材料放入美的智能高速鍋的煲內 

8. 加入3杯水熱水份量 , 少許鹽調味及月桂葉拌勻 

9. 蓋上蓋先按<菜單> 

10. 選擇煲湯功能 , 再按<烹飪模式> , 選擇標準模式 , 再按<開始> 

11. 之後會有時間顯示需時多久 

12. 高速鍋煮完後會發出嗶嗶聲響 

13. 此時安全眼會凸出 , 用手向右排氣 , 當安全眼落下代表排氣完成 , 便可打開鍋蓋 

14. 將湯內的牛展盛起切粒 

15. 放回湯內再加少許鹽 , 黑胡椒碎調味拌勻即可

 


又係足料炮製的美味雜菜牛肉濃湯 , 有香香濃濃的牛肉及烤菇香味 , 飲唔晒的牛肉湯翌日加入通粉俾袁生做早餐 , 又可以打斧頭慳早餐錢呢 ^^