[蒸+煎] 冬菇椰菜雞肉餃

之前買左兩塊雞扒回家 , 一塊上次用左智能高速鍋整左雞肉餅飯 , 用剩一塊又放左係冰箱冬眠左成個月 , 超級冇記性的袁太又唔記得左佢的存在 , 直至前幾日開冰箱清一清理的時候先發現塊雞扒向我揮手 , 決定攞佢出黎解凍左先再算 ......



不過一塊雞扒可以用來做什麼呢 ??? 用來乾煎好似少得滯又唔夠袁生食 , 後來係冰箱又發現有餃子皮的蹤影 , 咁就不如用來包餃餃吧



係呀 , 大家冇睇錯 , 袁太亦冇打錯字 , 係雞扒呀 , 其實好似之前袁太上傳的蒸雞肉餅咁 , 蒸肉餅唔係一定要豬肉 , 換雞肉都一樣好味 , 咁餃子都唔一定要豬肉餡 , 換來雞肉餡都應該不會差 , 簡單配上椰菜同冬菇做餡料 , 其實大家可以自行配搭唔同的材料做餡料 , 只不過廚房仲有椰菜同冬菇姐 , 今次材料比較少 , 所以只包到12隻餃餃咁多



今次袁太想用蒸的方法俾袁生食 , 點知袁生又話想加埋煎喎 , ~得得得~ 咁蒸同煎兩樣都整 , 袁生覺得用雞肉做餡料同樣美味 , 可以話仲好味過用豬肉 , 味道較為清新一點 , 而且雞肉滑滑 , 非常juicy , 絕對唔難口 , 而且菇菇又夠香 , 大家絕對值得一試呢 ^^

材料 : 椰菜 , 雞扒 , 冬菇(預先浸軟) , 薑 , 水餃皮 , 冬菇水 , 糖 , 魚露 , 胡椒粉 , 黑芝麻粒 , 美的早餐機(MZ-DSY18A)

冬菇切粒 , 薑磨成薑汁 , 椰菜切絲 , 雞扒去皮洗淨切條再切粒及剁碎 , 放入大碗內先加入醃料拌勻靜待30分鐘

30分鐘後加入薑汁 , 冬菇水及冬菇粒拌勻 , 蓋上保鮮紙放入雪櫃靜待1小時 , 期間將椰菜絲放入美的早餐機的煎pan內 , 加少許鹽調味 , 接<煎蛋 / 煙肉>功能 , 拌勻炒至椰菜軟身 , 加入已醃1小時的雞肉內拌勻

   

將適量的餡料放在餃皮上 , 用水對摺封口 , 再由左至右摺成餃子形狀 , 包好的餃子再灑上適量麵粉

美的早餐機的煲仔加入2杯水份量 , 放上蒸架 , 放上幾隻冬菇雞肉餃 , 蓋上蓋按<蒸 / 煮>功能 , 時間調至20分鐘 , 蒸好餃子後另一邊將幾隻冬菇雞肉餃放入美的早餐機的煎pan內 , 按<煎蛋 / 煙肉>功能 , 火力調至680 , 煎至每面微黃或金黃色 , 食時灑上黑芝麻粒即可

材料 
椰菜1個 , 雞扒1塊 , 冬菇4隻(預先浸軟) , 薑 , 水餃皮 , 冬菇水1湯匙 , 糖 , 魚露2.5湯匙 , 胡椒粉 , 黑芝麻粒 , 美的早餐機(MZ-DSY18A)

醃料 
生抽 , 魚露 , 糖 , 麻油 , 胡椒粉 , 雞粉



做法
1. 冬菇切粒 , 薑磨成薑汁 , 椰菜切絲 

2. 雞扒去皮洗淨切條再切粒及剁碎 , 放入大碗內先加入醃料拌勻靜待30分鐘

3. 30分鐘後加入薑汁 , 冬菇水及冬菇粒拌勻 

4. 蓋上保鮮紙放入雪櫃靜待1小時 

5. 期間將椰菜絲放入美的早餐機的煎pan內 , 加少許鹽調味 

6. 接<煎蛋 / 煙肉>功能 , 拌勻炒至椰菜軟身 , 加入已醃1小時的雞肉內拌勻

7. 將適量的餡料放在餃皮上 , 用水對摺封口 

8. 再由左至右摺成餃子形狀 , 包好的餃子再灑上適量麵粉

9. 美的早餐機的煲仔加入2杯水份量 , 放上蒸架 , 放上幾隻冬菇雞肉餃

10. 蓋上蓋按<蒸 / 煮>功能 , 時間調至20分鐘

11. 蒸好餃子後另一邊將幾隻冬菇雞肉餃放入美的早餐機的煎pan內 

12. 按<煎蛋 / 煙肉>功能 , 火力調至680 , 煎至每面微黃或金黃色 

13. 食時灑上黑芝麻粒即可 




自家製的餃子永遠都係餡料多 , 而且肉餡超juicy , 雖然餡料係袁太愛的冬菇同椰菜 , 但可惜今次係雞肉餡 , 所以冇袁太份呢 ^^