椰香葡國雞肉飯

某日袁太夜晚有飯局 , 晚餐就要袁生自己攪掂 , 不過袁太唔放心 , 因袁生要趕圖 , 佢一趕圖就進入忘我境界 , 真係驚佢掛住畫圖 , 連飯都唔食 , 所以袁太就朝早就去街市買材料 , 整袁生愛的葡國雞俾佢做晚餐 ......



其實袁生平時除喜愛食咖哩雞外 , 葡國雞亦係袁生的最愛 , 用葡汁送飯拌意粉都相當美味 , 以往煮葡雞會用樽裝的現成醬 , 雖然味道唔太差 , 但對我來說味道濃左少少 , 又鹹左少少 , 所以今次決定自己整葡汁 , 其實葡汁多數都係用黃薑粉 , 香葉 , 椰漿這類材料 , 味道雖沒有現成醬咁濃郁 , 但勝在味道比較清新 , 反而啱袁生口味



屋企附近商場的東南亞材料店有細細包的椰漿賣 , 好鬼方便

單單只係一碟葡國雞 , 袁生都可以食到好多飯 , 剩下的汁料放入雪櫃 , 翌日加入豬頸肉再煮 , 配上意粉俾袁生當午餐 , 佢同樣食到lam lam脷呢 ^^



材料 : 雞扒 , 洋蔥 , 甘旬 , 薯仔 , 雞蛋黃蕃薯 , 椰漿 , 黃薑粉 , 香葉 , 薑 , 鹽 , 糖 , 胡椒粉 , 蔥 , 水 , 上湯 , 雞蛋 , 美的早餐機(MZ-DSY18A)

雞扒用水沖洗乾淨 , 抹乾水份後切大件 , 放入大碗內加入黃薑粉及醃料拌勻靜待1小時 , 期間將洋蔥去衣 , 薯仔去皮 , 甘旬去皮 , 蕃薯去皮 , 洋蔥切塊 , 蔥切段及切幼絲 , 薑去皮蘑成薑汁蓉 , 薯仔切件 , 甘旬切件 , 蕃薯切件 , 蕃薯用水沖一沖洗及瀝乾 

雞蛋放入早餐機的煲內 , 加水浸過面 , 蓋上蓋按<蒸 / 煮>功能 , 時間調至20分鐘至雞蛋熟透 , 煮雞蛋期間將已靜待1小時的雞扒加入薑汁蓉拌勻靜待10分鐘

燒紅鑊 , 先爆香甘旬及洋蔥 , 加入雞肉 , 黃薑粉及糖用中火拌炒數分鐘至轉色 , 再加入香葉 ,水及上湯拌勻用中火煮滾 , 蓋上蓋轉慢火煮15分鐘 , 雞蛋放涼後去殼備用

 

15分鐘後加入薯仔及蕃薯拌勻 , 蓋上蓋繼續用慢火煮5分鐘 , 最後加入蔥段 , 椰漿拌勻轉用中火煮滾 , 熄火焗10分鐘 , 上碟時放上蔥絲即可

 

材料 
雞扒2塊 , 洋蔥1個 , 甘旬1條 , 薯仔2個 , 雞蛋黃蕃薯2個 , 椰漿 , 黃薑粉 , 香葉 , 薑 , 鹽 , 糖 , 胡椒粉 , 蔥 , 水150ml , 上湯150ml , 雞蛋2隻 , 美的早餐機(MZ-DSY18A)

醃料 
鹽 , 糖 , 胡椒粉 , 黃薑粉1茶匙



做法
1. 雞扒用水沖洗乾淨 , 抹乾水份後切大件 

2. 放入大碗內加入黃薑粉及醃料拌勻靜待1小時 

3. 期間將洋蔥去衣 , 薯仔去皮 , 甘旬去皮 , 蕃薯去皮 

4. 洋蔥切塊 , 蔥切段及切幼絲 , 薑去皮蘑成薑汁蓉 

5. 薯仔切件 , 甘旬切件 , 蕃薯切件 , 蕃薯用水沖一沖洗及瀝乾  

6. 雞蛋放入早餐機的煲內 , 加水浸過面 , 蓋上蓋按<蒸 / 煮>功能 

7. 時間調至20分鐘至雞蛋熟透 

8. 煮雞蛋期間將已靜待1小時的雞扒加入薑汁蓉拌勻靜待10分鐘 

9. 燒紅鑊 , 先爆香甘旬及洋蔥 

10. 加入雞肉 , 黃薑粉及糖用中火拌炒數分鐘至轉色 

11. 再加入香葉 , 水及上湯拌勻用中火煮滾 , 蓋上蓋轉慢火煮15分鐘 

12. 雞蛋放涼後去殼備用 

13. 15分鐘後加入薯仔及蕃薯拌勻 , 蓋上蓋繼續用慢火煮5分鐘

14. 最後加入蔥段 , 椰漿拌勻轉用中火煮滾 , 熄火焗10分鐘 , 上碟時放上蔥絲即可 




好味的葡國雞用來拌飯拌意粉 , 或者加上芝士碎放入焗爐焗都一樣咁好味道呢 ^^