南瓜西米焗布甸

袁太一向心情唔好或唔開心的時候 , 都會入廚房整下甜品蛋糕 , 整完之後心情會平復番晒 , 不過夜媽媽想整甜品 , 都要廚房有材料先得 , 幸好地之前買左條南瓜諗住煲湯 , 咁就用來整甜品喇 , 再加上花奶 , 椰漿 , 西米等等材料 , 整袁太最愛的西米焗布甸 ......

回想過去 , 有時係街食到既焗布甸 , 味道係超淡 , 直頭淡到連內餡的蓮蓉都係淡既 , 講開蓮蓉 , 其實袁太唔係咁鐘意食蓮蓉 , 永遠覺得"蓮蓉"係一樣好"流"的食物 , 所以如果俾我的話 , 自己整布甸 , 一係用紅豆餡 , 一係就唔整餡料 , 焗西米布甸不論材料或製作都簡單容易 , 一般會用鮮奶 , 不過袁太今次就用椰漿代替 , 椰漿袁太一向係東南亞材料店買呢款

其實煮西米焗布甸 , 先煮好個西米 , 再煮個布甸糊 , 布甸糊一路煮就一路散發出香味 , 未食都覺得甜甜 , 雖然今次都有用美的早餐機幫忙 , 不過只係用作蒸南瓜之用 , 皆因平時用的蒸鍋已經打柴了 , 今次就整南瓜布甸 , 下次袁太已經諗埋 , 會用紅豆蓉餡製作西米焗布甸 , 都一樣咁美味呢 ^^



材料 : 南瓜 , 椰漿 , 牛油 , 西米 , 花奶 , 吉士粉 , 雞蛋 , 砂糖 , 焗碗 / 焗盤 , 美的早餐機(MZ-DSY18A)(只用作蒸南瓜之用)

南瓜去皮去籽切粒 , 美的早餐機的煲仔加入2杯水 , 放上蒸架 , 放上南瓜粒 , 蓋上蓋按<蒸 / 煮>功能 , 時間調至30分鐘 , 蒸南瓜期間將西米放入煲內 , 加水浸過面 , 拌一拌勻西米以免黏底 , 用慢火煮至西米成透明狀 , 倒入隔篩內用水沖洗數分鐘 , 加入冰水浸過面靜待10分鐘

30分鐘後南瓜已蒸至軟身 , 盛起放入碗內壓成蓉 , 西米浸冰水10分鐘後瀝乾水份

雞蛋打入碗內 , 加入吉士粉 , 100ml椰漿及南瓜蓉拌勻待用 , 將牛油及砂糖放入煲內 , 加入餘下的100ml椰漿及50ml花奶 , 用慢火煮至牛油溶化 , 加入南瓜椰漿吉士 , 繼續用慢火一路煮一路拌勻煮至濃稠 , 熄火加入西米拌勻

將南瓜西米湖分別放入焗碗及焗盤內靜待10分鐘 , 期間將焗爐用200C預熱10分鐘 , 西米布甸放入焗盤內 , 加入100ml水於焗盤內 , 放入焗爐中層位置用200C上下火焗15分鐘 , 取出灑少許砂糖於布甸面 , 再入焗爐繼續用200C , 轉用上火焗5分鐘至表面成金黃色 , 取出靜待10分鐘即可

 
材料
南瓜1/2邊 , 椰漿200ml , 牛油1湯匙 , 西米80g , 花奶50ml , 吉士粉2湯匙 , 雞蛋2隻 , 砂糖45g , 焗碗 / 焗盤 , 美的早餐機(MZ-DSY18A)

做法

1. 南瓜去皮去籽切粒

2. 美的早餐機的煲仔加入2杯水 , 放上蒸架 , 放上南瓜粒 

3. 蓋上蓋按<蒸 / 煮>功能 , 時間調至30分鐘

4. 蒸南瓜期間將西米放入煲內 , 加水浸過面 , 拌一拌勻西米以免黏底 

5. 用慢火煮至西米成透明狀 , 倒入隔篩內用水沖洗數分鐘

6. 加入冰水浸過面靜待10分鐘

7. 30分鐘後南瓜已蒸至軟身 , 盛起放入碗內壓成蓉 

8. 西米浸冰水10分鐘後瀝乾水份

9. 雞蛋打入碗內 , 加入吉士粉 , 100ml椰漿及南瓜蓉拌勻待用 

10. 將牛油及砂糖放入煲內 , 加入餘下的100ml椰漿及50ml花奶 , 用慢火煮至牛油溶化

11. 加入南瓜椰漿吉士 , 繼續用慢火一路煮一路拌勻煮至濃稠

12. 熄火加入西米拌勻

13. 將南瓜西米湖分別放入焗碗及焗盤內靜待10分鐘 

14. 期間將焗爐用200C預熱10分鐘

15. 西米布甸放入焗盤內 , 加入100ml水於焗盤內 

16. 放入焗爐中層位置用200C上下火焗15分鐘 

17. 取出灑少許砂糖於布甸面 , 再入焗爐繼續用200C , 轉用上火焗5分鐘至表面成金黃色 

18. 取出靜待10分鐘即可 




賣相金金黃黃 , 又靚靚 , 又好味的南瓜西米焗布甸 , 有冇朋友仔要試下呢 ^^