<美的早餐機MZ-DSY18A食譜> 蒸粉果(XO醬芹菜豬肉餡)

平時出街食粉果就食得多 , 自己係包粉果都係第一次 , 其實未整之前都覺得應該會幾難整 , 同埋一定會包得好樣衰 , 因此始終搓麵糰唔係袁太強項 ......

事關有一日袁太突然想包粉果做早餐 , 點知隔離的袁生就撥冷水 , 只係講~妳邊整到呀 , 出街買好過喇~ 就係因為袁生呢句說話 , 我就更加要自己試下包 , 唔可以衰俾佢睇 , 我知整粉果的皮除左澄麵同生粉外 , 仲要木薯粉 , 木薯粉我係東南亞材料店賣

通常出面食的粉果 , 入面餡料一般為沙葛 , 冬菇 , 蝦米 , 花生 , 韭菜同豬肉碎 , 不過由於袁生唔喜愛韭菜的關係 , 所以就飛起韭菜 , 轉用芹菜 , 袁生又唔喜愛花生 , 所以亦會飛起花生 , 調味方面會加上XO醬拌炒 , 皆因袁生愛 , 而且加入XO醬 , 餡料變得微辣 , 惹味得多 , 辣椒油 , 辣椒醬都可以唔駛用 , 袁太係唔曉包的情況下 , 包到好似餃子咁 , 包好就即刻蒸幾個俾袁生食 , 袁太一直留意袁生的表情 , 當袁生咬左一啖後 , 既然話OK , 話好味 , 話個皮雖然厚左少少 , 但都夠滑 , 夠煙UN , 而且仲話估唔到我會整得到 , 只係賣相好似差左少少呢 ......

材料 : 木薯粉 , 澄麵 , 生粉 , 冬菇(預先浸軟) , 豬肉碎 , 沙葛 , 蝦米 , 芹菜 , 胡椒粉 , 鹽 , 糖 , XO醬 , 麵棍 , 刮刀 , 牛油紙 , 美的早餐機(MZ-DSY18A)

豬肉碎放入大碗內加入醃料拌勻靜待30分鐘 , 期間將蝦米浸水至軟身切碎 , 冬菇切細粒 , 沙葛去皮切細粒 , 芹菜莖切細粒

美的早餐機放上煎pan , 按<煎餅>功能加少許油燒熱 , 放入芹菜粒 , 冬菇粒及蝦米粒拌勻炒香 , 加入沙葛粒拌炒數分鐘 , 加入豬肉碎炒至轉色 , 加入XO醬及調味料拌勻炒至豬肉熟透 , 盛起材料待涼備用

木薯粉 , 澄麵 , 生粉放入大碗內 , 加少許鹽用膠刮拌勻 , 加入500ml熱水快手拌勻成麵糊 , 枱上灑上木薯粉 , 將麵糊稍為放涼後搓成麵糰 , 逐少加入油再搓成圓球 , 麵糰搓成長條型 , 平均切出小麵糰 , 將每個小麵糰用手壓扁 , 再用麵棍整成圓餅形 , 將適量餡料放在麵皮上包成粉果形 , 美的早餐機的煲仔加入2杯水 , 放上蒸架 , 再放上牛油紙 , 放上粉果 , 蓋上蓋按<蒸 / 煮>功能 , 時間調至15分鐘 , 蒸至粉果皮變得透明即可

材料
木薯粉200g , 澄麵160g , 生粉50g , 冬菇3隻(預先浸軟) , 豬肉碎$5 , 沙葛1個 , 蝦米 , 芹菜1/2扎 , 胡椒粉 , 鹽 , 糖 , XO醬1湯匙 , 麵棍 , 刮刀 , 牛油紙 , 美的早餐機(MZ-DSY18A)

醃料
生抽 , 糖 , 生粉 , 雞粉 , 鹽 , 胡椒粉 , 麻油 

調味料
糖 , 蠔油 , 胡椒粉 ,  水80ml




做法
1. 豬肉碎放入大碗內加入醃料拌勻靜待30分鐘

2. 期間將蝦米浸水至軟身切碎 , 冬菇切細粒 , 沙葛去皮切細粒 , 芹菜莖切細粒

3. 美的早餐機放上煎pan , 按<煎餅>功能加少許油燒熱 , 放入芹菜粒 , 冬菇粒及蝦米粒拌勻炒香 

4. 加入沙葛粒拌炒數分鐘 , 加入豬肉碎炒至轉色 

5. 加入XO醬及調味料拌勻炒至豬肉熟透

6. 盛起材料待涼備用

7. 木薯粉 , 澄麵 , 生粉放入大碗內 , 加少許鹽用膠刮拌勻 

8. 加入500ml熱水快手拌勻成麵糊 

9. 枱上灑上木薯粉 , 將麵糊稍為放涼後搓成麵糰 

10. 逐少加入油再搓成圓球 , 麵糰搓成長條型 , 平均切出小麵糰

11. 將每個小麵糰用手壓扁 , 再用麵棍整成圓餅形 

12. 將適量餡料放在麵皮上包成粉果形

13. 美的早餐機的煲仔加入2杯水 , 放上蒸架 , 再放上牛油紙 , 放上粉果 

14. 蓋上蓋按<蒸 / 煮>功能 , 時間調至15分鐘 

15. 蒸至粉果皮變得透明即可 




雖然未蒸時的賣相不討好 , 但好彩蒸完都靚靚仔仔 , 冇爆開 , 而且味道超好呢 ^^