2018年12月26日 星期三

[派對小食] 脆脆炸薯波




剛過去的聖誕節 , 大家有冇過一個開心的聖誕節呢 , 每逢節日 , 我同袁生都好例牌地靜靜在家過 , 或者會出個街食個飯咁 , 始終我地兩條友都唔多鐘意人多濟迫的地方 ......



講開聖誕節呢個節日 , 袁太都會陸續收到好多朋友仔的電話或者whatsapp , 想麻煩袁太幫忙整派對小食 , 因為朋友仔家中有小朋友 , 自己又唔係好懂得入廚 , 所以近呢幾年都會叫我幫忙整小食俾小朋友開派對 , 我當然沒有問題呢 , 有人欣賞我煮的食物 , 我開心都黎唔切喇^^ 



第一款為朋友準備的係我同袁生都鐘意的炸物 , 不過我相信炸物冇人不愛 , 無論大朋友 , 小朋友都喜歡 , 只係怕熱氣唔敢食太多 , 呢款薯波好簡單 , 只係加入紫洋蔥同煙肉做配料 , 再沾上麵粉 , 蛋液及麵包糠炸成金黃色 , 袁太平時最愛用呢款麵包糠呢




炸起時熱辣辣脆卜卜 , 真係可以食到唔停口 , 不過剛巧冇芝士碎 , 如果加埋芝士一定仲好味 , 袁太係朋友開派對當日早上先買材料整 , 仲幫佢炸埋(朋友仔話唔想開鑊炸) , 食前用少少油整番熱就得 , 希望派對的每一位朋友都喜歡呢個炸薯波呢 ^^



材料 : 薯仔 , 紫洋蔥 , 煙肉 , 雞蛋 , 麵粉 , 麵包糠 , 鹽 , 黑胡椒碎 , 美的早餐機(MZ-DSY18A)




薯仔去皮切粒 , 放入美的早餐機的蒸架上 , 蓋上蓋按<蒸 / 煮>功能 , 時間調至30分鐘 , 期間紫洋蔥去衣切粒 , 煙肉切粒 , 放入鑊中用中火爆香至有香味 , 洋蔥成微黃色備用











薯仔蒸30分鐘後放入大碗內 , 加少許鹽及黑胡椒碎調味拌勻壓成蓉 , 將煙肉洋蔥粒加入拌勻靜待20分鐘 , 期間將雞蛋打成蛋液 , 將適量份量的薯蓉搓圓 , 逐一沾上麵粉 >> 蛋液 >> 麵包糠後放上碟 , 再灑上適量的麵包糠 , 蓋上保鮮紙放入冰箱冷藏1小時 

 


























薯波冷藏1小時後從雪櫃取出靜待10分鐘 , 早餐機煎pan放油燒熱 , 按<煎餅>功能 , 以半煎炸方式成每面金黃色 , 或放入美的免油健炸寶內 , 180C15分鐘成金黃色即可















材料
薯仔3個 , 紫洋蔥1個 , 煙肉3片 , 雞蛋2隻 , 麵粉 , 麵包糠 , 鹽 , 黑胡椒碎 , 美的早餐機(MZ-DSY18A)



做法
1. 薯仔去皮切粒 

2. 放入美的早餐機的蒸架上 , 蓋上蓋按<蒸 / 煮>功能 , 時間調至30分鐘 

3. 期間紫洋蔥去衣切粒 , 煙肉切粒 

4. 放入鑊中用中火爆香至有香味 , 洋蔥成微黃色備用

5. 薯仔蒸30分鐘後放入大碗內 , 加少許鹽及黑胡椒碎調味拌勻壓成蓉 

6. 將煙肉洋蔥粒加入拌勻靜待20分鐘 

7. 期間將雞蛋打成蛋液 

8. 將適量份量的薯蓉搓圓 , 逐一沾上麵粉 >> 蛋液 >> 麵包糠後放上碟 

9. 再灑上適量的麵包糠 , 蓋上保鮮紙放入冰箱冷藏1小時  

10. 薯波冷藏1小時後從雪櫃取出靜待10分鐘

11. 早餐機煎pan放油燒熱 , 按<煎餅>功能 , 以半煎炸方式成每面金黃色

12. 或放入美的免油健炸寶內 , 180C15分鐘成金黃色即可 




大大粒的炸薯波 , 剛剛炸起熱辣辣又脆卜卜 , 做派對小食絕對一流 , 無論大人或小朋友都一樣喜歡呢 ^^






12 則留言:

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......