枝竹馬蹄羊腩煲

呢幾日天氣好凍 , 落街買餸都要著大褸頸巾保暖 , 咁凍的天氣除左火鍋外 , 食羊腩煲都可以好保暖 , 每當秋涼的天氣 , 朋友們會陸續叫袁太幫忙炮製火鍋湯底同羊腩煲 , 所以每逢秋冬季 , 我就可以賺下外快 , 朋友食得開心 , 而我又有錢落袋 , winwin雙嬴 , 不過話雖如此 , 其實袁太每次都冇打算收取任何費用 , 只要朋友們喜愛我煮既食物 , 呢樣滿足同成功感對我來說俾錢更為重要 ......



今次呢個羊腩煲係為一位好朋友製作的 , 她一家四口 , 不過小朋友還細 , 所以就只買磅半羊腩應該足夠 , 我曾記得媽咪經常說 , 食羊腩當然食有皮 , 不過我同袁生就比較唔正常 , 都喜歡去左皮的羊腩 , 其實應該話以往係附近街市買過有皮羊腩 , 炆好後完全冇味 , 肉質又硬 , 仲好似有陣雪味 , 非常難食



其實另一方面係因為上年試過買去皮的羊腩回家整羊腩煲 , 炆完再焗左幾粒鐘 , 肉質依然嫩滑 , 而且好入味 , 何況朋友們一家亦一樣 , 唔係太愛食羊腩的皮 , 所以今次就係同一間買了磅半的去皮羊腩 , 今年的羊腩都唔錯 , 肥瘦平平均均



另外整羊腩煲點少得炸枝竹 , 冬菇同馬蹄呢 , 仲有炆羊腩的調味料都好重要 , 袁太仲為朋友一家準備埋生菜 , 響鈴 , 烏冬同腐乳沾醬 , 仲叫佢地食時一路滾 , 烚下生菜 , 浸下響鈴 , 煮下烏冬 , 材料吸收羊腩汁的味道 , 絕對超正 , 之後過幾日收到呢位朋友的whatsapp , 話袁太整的羊腩煲 , 她全家都好喜歡 , 話味道啱啱好 , 仲感謝袁太好多次呢 ^^



材料 : 羊腩 , 炸枝竹 , 冬菇 , 馬蹄 , 薑 , 冰糖 , 柱侯醬 , 南乳 , 腐乳 , 蔥 , 酒 , 糖 , 水

炸枝竹剪段後放入煲內 , 加入水浸過面(用蓋或碟壓一壓枝竹 , 令枝竹完全浸於水中) , 靜待1小時 , 馬蹄去皮 , 連同冬菇用水沖一沖洗及瀝乾 , 薑去皮切幼絲 , 蔥洗淨切段及切幼絲

將一半份量的蔥段及薑片放入鑊 , 加入羊腩 , 酒及水 , 蓋上蓋用中火出水10分鐘 , 盛起將比較大件的羊腩剪成細件 , 用水沖一沖洗及瀝乾

燒紅鑊 , 爆香餘下一半份量的薑絲 , 加入羊腩 , 贊少許酒用中火拌炒數分鐘 , 加入調味料拌勻 , 再加入冰糖 , 冬菇 , 馬蹄及6杯水份量拌勻用中火煮滾 , 蓋上蓋轉慢火炆1小時

羊腩炆1小時後將炸枝竹放入拌勻 , 蓋上蓋繼續用慢火炆10分鐘 , 將全部材料連汁料放入另一煲內 , 蓋上蓋焗最少1小時至入味 , 期間將腐乳放入器皿內 , 加入浸腐乳的汁 , 少許糖及熟油拌勻至滑身成腐乳醬 , 羊腩煲食前加入蔥段再番熱即可

 

材料 
羊腩1磅半 , 炸枝竹1包 , 冬菇8隻 , 馬蹄10粒 , 薑 , 冰糖 , 柱侯醬 , 南乳 , 腐乳 , 蔥 , 酒 , 糖 , 水6杯
 
調味料 
柱侯醬3湯匙 , 南乳1/2磚 , 腐乳1湯匙 , 生抽 , 老抽
 


做法
1. 炸枝竹剪段後放入煲內 

2. 加入水浸過面(用蓋或碟壓一壓枝竹 , 令枝竹完全浸於水中) , 靜待1小時

3. 馬蹄去皮 , 連同冬菇用水沖一沖洗及瀝乾 

4. 薑去皮切幼絲 , 蔥洗淨切段及切幼絲

5. 將一半份量的蔥段及薑片放入鑊 , 加入羊腩 , 酒及水 , 蓋上蓋用中火出水10分鐘

6. 盛起將比較大件的羊腩剪成細件 , 用水沖一沖洗及瀝乾

7. 燒紅鑊 , 爆香餘下一半份量的薑絲 , 加入羊腩 , 贊少許酒用中火拌炒數分鐘 

8. 加入調味料拌勻 

9. 再加入冰糖 , 冬菇 , 馬蹄及6杯水份量拌勻用中火煮滾 

10. 蓋上蓋轉慢火炆1小時

11. 羊腩炆1小時後將炸枝竹放入拌勻 , 蓋上蓋繼續用慢火炆10分鐘 

12. 將全部材料連汁料放入另一煲內 , 蓋上蓋焗最少1小時至入味 

13. 期間將腐乳放入器皿內 , 加入浸腐乳的汁 , 少許糖及熟油拌勻至滑身成腐乳醬 

14. 羊腩煲食前加入蔥段再番熱即可 




寒冷的天氣 , 見到咁吸引的羊腩煲 , 無論配飯或當火鍋烚下烚下都唔錯呢 ^^