[早餐系列] 沙爹牛肉麵

平時早餐多數都係求其買個麵包俾袁生做早餐 , 自從上次整鹹牛肉玉子燒三文治俾袁生後 , 就經常問袁太幾時會再整早餐俾佢食 , 所以就繼續為袁生煮個美味早餐俾佢嘆下 , 好過買麵包 , 買點心俾佢食呢 ......



閒時袁生好喜愛食茶餐廳的沙爹牛肉麵做早餐 , 不過而家茶記的早餐實在越來越貴 , 而且份量又唔多 , 見袁生又話想食沙爹牛肉麵 , 所以袁太決定唔幫襯茶記 , 自己買材料煮 , 自家製絕對足料 , 多多牛肉多多麵 , 不過茶記多數配通粉 , 公仔麵 , 一丁麵 , 米粉等等 ... 袁太經過雜貨店見有排骨麵 , 就買左幾個配沙爹牛肉 

其實袁太一向都怕怕買牛肉 , 去牛肉店買親牛肉 , 回家後經過烹調後必然硬過我條命 , 今次就嘗試去街市買已切片的牛柳片 , 拿拿臨回家醃醃醃 , 炒炒炒 , 煮煮煮 , 幸好趕得切俾袁生做早餐 , 袁生對呢碗沙爹牛肉麵相當滿意 , 有讚冇彈 , 仲話沙爹味香濃 , 牛肉嫩滑呢 ^^



材料 : 排骨麵 , 牛柳片 , 上湯 , 沙爹醬 , 蒜頭 , 乾蔥頭 , 油 , 糖 , 生粉 , 胡椒粉 , 美的早餐機(MZ-DSY18A) 

牛柳片用水沖一沖洗及瀝乾 , 抹乾水份放入碗內加入醃料拌勻靜待15分鐘 , 15分鐘後加入生粉 , 油 , 胡椒粉及水拌勻靜待30分鐘 , 上湯放入美的早餐機的煲內 , 蓋上蓋按<蒸 / 煮>功能 , 時間調至10分鐘加熱備用 , 蒜頭 , 乾蔥頭去衣切粒

燒紅鑊先爆香一半蒜粒及乾蔥粒 , 加入牛柳片用中火炒至8成熟盛起 , 原鑊爆香餘下蒜粒及乾蔥粒 , 加入沙爹醬及糖爆香 , 將牛柳片回鑊拌勻炒至牛柳熟透

排骨麵放入煲內加水 , 用中火拌勻慢慢煮至麵散及軟身 , 盛起放入大碗內 , 加入之前已加熱的上湯 , 放上沙爹牛肉即可

材料
排骨麵2個 , 牛柳片$15 , 上湯300ml , 沙爹醬2湯匙 , 蒜頭1/2個 , 乾蔥頭2粒 , 油 , 糖 , 生粉 , 胡椒粉 , 美的早餐機(MZ-DSY18A) 

醃料
生抽 , 糖



做法
1. 牛柳片用水沖一沖洗及瀝乾 , 抹乾水份放入碗內加入醃料拌勻靜待15分鐘 

2. 15分鐘後加入生粉 , 油 , 胡椒粉及水拌勻靜待30分鐘 

3. 上湯放入美的早餐機的煲內 , 蓋上蓋按<蒸 / 煮>功能 , 時間調至10分鐘加熱備用 

4. 蒜頭 , 乾蔥頭去衣切粒

5. 燒紅鑊先爆香一半蒜粒及乾蔥粒 

6. 加入牛柳片用中火炒至8成熟盛起 

7. 原鑊爆香餘下蒜粒及乾蔥粒 , 加入沙爹醬及糖爆香 

8. 將牛柳片回鑊拌勻炒至牛柳熟透

9. 排骨麵放入煲內加水 , 用中火拌勻慢慢煮至麵散及軟身 

10. 盛起放入大碗內 , 加入之前已加熱的上湯 , 放上沙爹牛肉即可 




自家製沙爹牛肉麵 , 多多牛肉多多麵 , 沙爹味香濃 , 牛肉嫩滑 , 我都好想食呢 ^^