香蕉蛋糕

之前整香蕉糕時剩下兩隻香蕉 , 起初只想簡單用來當飯果 , 不過放左幾日後 , 見餘下的兩隻香蕉已經熟透 , 其實袁太唔太喜歡食熟到爛的香蕉 , 所以 ......



就決定將咁熟 , 出晒黑點的香蕉用來做袁太至愛之一的香蕉蛋糕 , 以往曾經係街買過一次香蕉蛋糕 , 不過味道簡直甜到嘔 , 食少少已經唔想食 , 如果自己整一定要控制甜度 , 將糖份減半 , 如果整得甜 , 一定又會俾袁生投訴 , 又投訴我整咁甜既野 , 一定會攪到佢糖尿病



其實整呢個香蕉蛋糕都好容易 , 將香蕉壓蓉 , 其他材料放入大碗內拌勻就可以拎去焗 , 焗大約40分鐘就食得 , 一路焗的時候 , 成間屋散發香噴噴的香蕉味 , 不過可惜今次只有兩隻熟香蕉 , 只可以焗得一底蛋糕 , 係最美中不足的地方 , 而呢個蛋糕就奉獻俾袁太媽咪 , 拎去工作的地方同朋友仔一齊分享 , 希望大家都喜歡呢款香蕉蛋糕的味道呢 ^^



材料 : 熟到爛的香蕉 , 雞蛋 , 麵粉 , 黃糖 , 牛奶 , 泡打粉 , 鹽 , 刮刀 , 牛油 , 錫紙盆 , 隔篩

香蕉去皮切片放入大碗內 , 加入牛油拌勻成蓉 , 盛起備用 , 雞蛋打入大碗內 , 逐一加入糖 , 鹽 , 牛奶拌勻 , 再篩入麵粉及泡打粉 , 用刮刀拌勻至冇粉粒 , 加入香蕉蓉再拌勻

將蛋糕糊倒入錫紙焗盆內 , 焗爐用180C預熱10分鐘 , 將錫紙盆放在焗盆上 , 再加入熱水至半滿

放入焗爐中間位置 , 用150C上下火焗30分鐘 , 見蛋糕經已脹起 , 取出將蛋糕放上焗爐最低層 , 轉用200C上火焗多10分鐘 , 取出靜待片刻後切件即可

材料
熟到爛的香蕉2隻 , 雞蛋2隻 , 麵粉200g , 黃糖130g , 牛奶60ml , 泡打粉1茶匙 , 鹽 , 刮刀 , 牛油 , 錫紙盆 , 隔篩



做法
1. 香蕉去皮切片放入大碗內 , 加入牛油拌勻成蓉 , 盛起備用 

2. 雞蛋打入大碗內 , 逐一加入砂糖 , 鹽 , 牛奶拌勻 

3. 再篩入麵粉及泡打粉 , 用刮刀拌勻至冇粉粒 , 加入香蕉蓉再拌勻 

4. 將蛋糕糊倒入錫紙焗盆內 

5. 焗爐用180C預熱10分鐘 

6. 將錫紙盆放在焗盆上 , 再加入熱水至半滿

7. 放入焗爐中間位置 , 用150C上下火焗30分鐘 , 見蛋糕經已脹起 

8. 取出將蛋糕放上焗爐最低層 , 轉用200C上火焗多10分鐘 

9. 取出靜待片刻後切件即可




雖然整蛋糕絕對唔係袁太的強行 , 不過今次的香蕉蛋糕我非常滿意呢 ^^