2019年2月14日 星期四

鹽焗雞翼 , 鵪鶉蛋(焗爐版)




廚房經常有剩餘物資的蹤影 , 今次剩餘物資的主角係雞翼 , 想盡快消滅 , 不過大家知喇 , 醫生依然叫袁太暫時唔好食雞 , 冇得食雞對袁太黎講其實真的好大鑊 , 皆因袁太平時好愛食雞 , 一想起白切雞 , 炸雞翼 , 煎雞扒 , 滷水雞翼/雞脾我就流晒口水 , 所以今次消滅雞翼的任務繼續留番俾袁生 , 又係袁太負責煮 , 袁生負責食 ......



唔知大家有冇印象 , 以前的袁生係唔多鐘意食雞翼 , 或者轉一轉個講法 , 佢又唔係完全唔食雞翼 , 只係用某幾種做法佢先會食 , 好似用豉油整 , 用蝦醬炸咁喇 , 另外仲一樣做法佢都會喜愛 , 就係用鹽焗的方法 , 用鹽焗整雞其實算簡單 , 而且今次用焗爐整 , 味道都好好 , 鹹鹹香香 , 雖然唔食得雞 , 但聞到香噴噴的鹽焗香味 , 真係好難抗拒 , 既然唔食得 , 咁唯有近距離聞下個香味 , 我都好滿足



今次一整就清晒冰箱個10隻雞翼 , 另外之前還剩下鵪鶉蛋 , 同雞翼一齊用鹽焗方法去烹調 , 袁生今次話味道好好 , 完全佢一個人都食得晒呢 ^^



材料 : 粗鹽 , 雞中翼 , 鵪鶉蛋 , 酒 , 五香粉 , 鹽焗雞粉 , 沙薑粉 , 熟油 , 雞粉 , 焗爐紙 , 錫紙




雞中翼及鵪鶉蛋用水沖一沖洗 , 分別抹乾水份 , 將雞中翼放入大碗內 , 加入雞粉 , 鹽焗雞粉及醃料拌勻靜待1小時














鑊中不需要加油 , 放入粗鹽及五香粉拌勻 , 用慢火慢慢炒至粗鹽發出熱力(大約需時5分鐘) , 期間焗爐用250C預熱10分鐘 , 牛油紙剪成細塊 , 將雞翼放入焗爐紙內包好 , 再放在另一張焗爐紙內再包一次 



















焗盤放上錫紙 , 先舖上一層鹽 , 放上用焗爐紙包好的雞翼 , 再放入鵪鶉蛋 , 再鋪上餘下的粗鹽蓋上雞翼 , 放入焗爐用250C上下火焗20分鐘(焗5分鐘後將鵪鶉蛋先取出繼續焗雞翼) , 焗好後焗10分鐘 , 小心去除焗爐紙 , 最後將沙薑粉 , 熟油及麻油拌勻成沙薑汁即可




















材料
粗鹽1.5包 , 雞中翼10隻 , 鵪鶉蛋8隻 , 酒 , 五香粉1.5湯匙 , 鹽焗雞粉 , 沙薑粉 , 熟油 , 雞粉 , 焗爐紙 , 錫紙

醃料
生抽 , 酒 , 熟油 , 麻油



做法
1. 雞中翼及鵪鶉蛋用水沖一沖洗 , 分別抹乾水份 

2. 將雞中翼放入大碗內 , 加入雞粉 , 鹽焗雞粉及醃料拌勻靜待1小時 

3. 鑊中不需要加油 , 放入粗鹽及五香粉拌勻 

4. 用慢火慢慢炒至粗鹽發出熱力(大約需時5分鐘) 

5. 期間焗爐用250C預熱10分鐘 

6. 牛油紙剪成細塊 , 將雞翼放入焗爐紙內包好 , 再放在另一張焗爐紙內再包一次 

7. 焗盤放上錫紙 , 先舖上一層鹽 , 放上用焗爐紙包好的雞翼 , 再放入鵪鶉蛋

8. 再鋪上餘下的粗鹽蓋上雞翼 

9. 放入焗爐用250C上下火焗20分鐘(焗5分鐘後將鵪鶉蛋先取出繼續焗雞翼)

10. 焗好後焗10分鐘 , 小心去除焗爐紙 

11. 最後將沙薑粉 , 熟油及麻油拌勻成沙薑汁即可 




用焗的方法雞肉依然好嫩滑 , 味道實在Very Good , 我都好想食埋一份呢 ^^











20 則留言:

  1. 正正正!睇見都feel到有幾香~~

    回覆刪除
  2. 肥人好耐無食雞翼啦...等我又整下先..Hhaaaa

    回覆刪除
  3. 鵪鶉蛋好好味~不過有時唔覺又食太多~驚唔健康呢~!

    回覆刪除
  4. 好吸引啊!兩樣我都喜歡食😍

    回覆刪除
  5. 兩樣我都喜歡

    回覆刪除

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......