桂花紫薯糕

新年前整紅棗千層糕時剩下木薯粉 , 後來買左幾個雞蛋黃蕃薯及紫蕃薯做手工地瓜圓 , 但包木薯粉依然未用完 , 而且整地瓜圓時用剩左幾個紫蕃薯 , 決定消滅佢 , 嘗試整下紫薯糕......



其實紫薯糕同紅棗千層糕製作方法都係差不多 , 一樣用上木薯粉 , 糯米粉 , 粘米粉製作 , 先將紫蕃薯去皮切片蒸熟 , 壓成蓉後加入椰漿糖水內拌勻 , 再用隔篩隔兩次至幼滑 , 顏色紫紫好靚靚 , 同樣用千層的方法去蒸 , 蒸好待涼切粒 , 放入鑊中用慢火慢慢煎至每面微黃色 , 喜歡桂花糖的朋友仔們 , 食時可灑上少許桂花糖同食



呢款糕點口感相當煙靭 , 袁生試味後大讚好味 , 好喜歡 , 而且好滿意袁太今次製作的新產品呢 ^^



材料 : 紫蕃薯 , 椰漿 , 白砂糖 , 鹽 , 木薯粉 , 粘米粉 , 水 , 油 , 叉 , 隔篩 , 錫紙盆 , 美的早餐機(MZ-DSY18A)

紫蕃薯去皮後切件放入碗內 , 放入早餐機蓋上蓋按<蒸 / 煮>功能 , 時間調至20分鐘 , 期間將白砂糖 , 鹽 , 椰漿及水放入煲內拌勻 , 用慢火慢慢煮至糖溶 , 待涼10分鐘

將蒸熟的紫蕃薯用叉壓成蓉 , 木薯粉及粘米粉放入大碗內拌勻 , 再加入已待涼的椰漿糖水拌勻 , 再加入紫蕃薯蓉拌勻 , 用隔篩隔兩次至幼滑冇粉粒 

錫紙蒸盆掃上少許油 , 倒入一層紫薯粉漿 , 蓋上蓋蒸5分鐘至熟 , 再放入一層紫薯粉漿 , 再蒸5分鐘 , 直至最後一層蒸25分鐘至全熟 , 焗10分鐘 , 如不做千層 , 可將粉漿放入模具內蒸1小時 , 蒸好的紫薯糕待涼60分鐘 , 切件或切粒放入鑊煎至微黃色 , 食時灑上少許桂花糖即可

材料
紫蕃薯去皮後100g , 椰漿200ml , 白砂糖80g , 鹽少許 , 木薯粉140g , 粘米粉50g , 水300ml , 油 , 叉 , 隔篩 , 錫紙盆 , 美的早餐機(MZ-DSY18A)



做法
1. 紫蕃薯去皮後切件放入碗內

2. 放入早餐機蓋上蓋按<蒸 / 煮>功能 , 時間調至20分鐘

3. 期間將白砂糖 , 鹽 , 椰漿及水放入煲內拌勻 , 用慢火慢慢煮至糖溶 

4. 待涼10分鐘

5. 將蒸熟的紫蕃薯用叉壓成蓉 

6. 木薯粉及粘米粉放入大碗內拌勻 , 再加入已待涼的椰漿糖水拌勻 

7. 再加入紫蕃薯蓉拌勻 , 用隔篩隔兩次至幼滑冇粉粒

8. 錫紙蒸盆掃上少許油 , 倒入一層紫薯粉漿 , 蓋上蓋蒸5分鐘至熟 

9. 再放入一層紫薯粉漿 , 再蒸5分鐘 , 直至最後一層蒸25分鐘至全熟 , 焗10分鐘

10. 如不做千層 , 可將粉漿放入模具內蒸1小時

11. 蒸好的紫薯糕待涼60分鐘 , 切件或切粒放入鑊煎至微黃色 

12. 食時灑上少許桂花糖即可 




靚靚紫色的紫薯糕 , 好重紫蕃薯及椰漿味 , 食時再加少許桂花糖 , 金金黃黃 , 感覺好靚好吸引呢 ^^