[賀年糕點] 桂花馬蹄糕

明天就係大年初一 , 唔知大家整晒d賀年糕點未呢 ??? 袁太到而家都仲係度努力緊 , 真係好攰 , 成身散晒 , 回想十幾廿年前婆婆在世的時候 , 整成三十幾四十底都毫不說辛苦 , 兒時我只懂得食 , 完全唔知婆婆原來整得咁辛苦 ......



袁太媽咪今年話負責整蘿蔔糕 , 芋頭糕就例牌冇人食 , 可以省略 , 咁其餘的糕點就等袁太負責 , 其實所謂的糕點係大家都食既就只有椰汁年糕 , 奶皇年糕同馬蹄糕 , 不過今年唔整椰汁年糕喇 , 首先整的係~馬蹄糕~ , 馬蹄糕以往只會出外買 , 不過街買既真係得個少少馬蹄 , 我本人非常喜愛馬蹄 , 所以自家製一定要多多馬蹄粒



整整下先發覺 , 原來馬蹄糕非常容易整 , 唔駛一粒鐘就攪掂 , 不過要入雪櫃放一晚 , 等糕點變得實的時候先切再煎就得 , 呢個馬蹄糕甜度適中 , 夠彈牙 , 又煙煙un un , 最重要係有多多馬蹄粒 , 煎好上碟時再灑上糖桂花 , 賣相即時變得靚靚呢 ^^



材料 : 馬蹄 , 白砂糖 , 馬蹄粉 , 片糖 , 油 , 生粉 , 水 , 錫紙 , 錫紙盆 , 刮刀 , 隔篩 , 桂花糖 , 美的早餐機(MZ-DSY18A)

馬蹄用水沖一沖洗 , 去皮後再用水沖洗乾淨 , 將馬蹄拍碎 , 馬蹄粉放入碗內 , 加入2茶匙生粉 , 300ml水拌勻 , 用隔篩過去多餘粉粒 , 加2湯匙油拌勻備用

白砂糖 , 片糖放入煲內 , 加入餘下300ml水用慢火慢慢煮至片糖溶 , 期間將早餐機按<蒸 / 煮>功能 , 時間調至10分鐘至熱 , 將馬蹄粒及馬蹄粉混合物加入糖水內 , 繼續用慢火快手拌勻以免結塊 , 拌勻成幼滑糊狀 

錫紙盆掃上少許油 , 倒入麵糊 , 用刮刀抨平 , 用錫紙封口 , 放入美的早餐機內內蓋上蓋 , 按<蒸 / 煮>功能 , 時間調至35分鐘 , 再焗10分鐘 , 蒸好除去錫紙待涼放入雪櫃靜待一晚(一晚後會變得硬身) , 翌日將馬蹄糕切片 , 放入鑊中加少許油用慢火煎香 , 食時灑上少許桂花糖即可 

材料
馬蹄10粒 , 白砂糖50g , 馬蹄粉100g , 片糖50g , 油 , 生粉2茶匙 , 水600ml , 錫紙 , 錫紙盆 , 刮刀 , 隔篩 , 桂花糖 , 美的早餐機(MZ-DSY18A)



做法
1. 馬蹄用水沖一沖洗 , 去皮後再用水沖洗乾淨 , 將馬蹄拍碎 

2. 馬蹄粉放入碗內 , 加入2茶匙生粉 , 300ml水拌勻 

3. 用隔篩過去多餘粉粒 , 加2湯匙油拌勻備用 

4. 白砂糖 , 片糖放入煲內 , 加入餘下300ml水用慢火慢慢煮至片糖溶 

5. 期間將早餐機按<蒸 / 煮>功能 , 時間調至10分鐘至熱 

6. 將馬蹄粒及馬蹄粉混合物加入糖水內 

7. 繼續用慢火快手拌勻以免結塊 , 拌勻成幼滑糊狀  

8. 錫紙盆掃上少許油 , 倒入麵糊 , 用刮刀抨平 , 用錫紙封口  

9. 放入美的早餐機內內蓋上蓋 , 按<蒸 / 煮>功能 , 時間調至35分鐘 

10. 再焗10分鐘 

11. 蒸好除去錫紙待涼放入雪櫃靜待一晚(一晚後會變得硬身)

12. 翌日將馬蹄糕切片 , 放入鑊中加少許油用慢火煎香 , 食時灑上少許桂花糖即可




金金黃黃賣相靚靚的桂花馬蹄糕 , 好味的程度 , 就連平時唔喜愛食馬蹄糕的袁生都讚不絕口呢 ^^