足料碗仔翅

講開香港地道小食 , 除左之前上傳過的咖哩魚蛋外 , 碗仔翅亦係袁生袁太最喜歡的地道小食之一 , 不過而家出面一碗的價錢都唔便宜 , 而且冇咩料 , 何況街的一般都會加雞湯煮 , 大家都知袁太而家唔食得雞 , 所以雞湯絕對唔用得 ......



出面街的係咪會用雞絲 , 當然雞我又係唔得 , 既然唔用得雞同雞湯 , 咁就簡單用瘦肉水 , 浸菇水同水煮 , 何謂瘦肉水 ??? 其實只係將瘦肉出一出水 , 再將瘦肉放入大煲內加水煮半粒鐘 , 咁就係瘦肉水呢 , 而粉絲就轉用素翅代替 , 我比較鐘意用素翅 , 因感覺用粉絲 , 耐左就會變得淋pat pat , 但素翅就比較彈口 , 好味好多呢

 

起初怕冇用雞湯 , 仲驚俾袁生會投訴 , 驚佢話點解味道冇街的咁濃 , 點解咁稀 ??? 唔似出面咁杰身等等 ... 



不過出乎意料之外 , 袁生對呢個碗仔翅有讚冇彈 , 主動話味道好味過街買既 , 可能我只用瘦肉水 , 冬菇水及水的關係 , 味道俾出面既淡 , 不過就有濃濃的冬菇味 , 而且又有木耳 , 素翅 , 冬菇及豬肉絲 , 絕對夠足料 , 後來先發覺原來袁生唔係太鐘意出面杰撻撻的 , 所以雖然袁太呢個碗仔翅比較稀 , 但反而就得到袁生的喜愛 , 而我當然都十分喜歡喇 , 估唔到唔用雞湯煮出黎的碗仔翅都可以咁好味道 , 咁足料的碗仔翅 , 如果攞出街賣 , 可以賣到幾錢一碗呢 ^^



材料 : 瘦肉 , 素翅 , 冬菇(預先浸軟) , 浸冬菇水 , 木耳絲 , 薑 , 雞蛋 , 糖 , 胡椒粉 , 水 , 馬蹄粉 , 美的早餐機(MZ-DSY18A)

瘦肉放入早餐機的煲仔內 , 加水浸過面 , 蓋上蓋按<蒸 / 煮>功能 , 時間調至10分鐘出一出水 , 出水後的瘦肉用水沖一沖洗 , 將瘦肉轉放入大煲內 , 加入8杯水份量 , 蓋上蓋用中火煮30分鐘

冬菇切片 , 薑去皮切絲 , 冬菇片放入碗內加少許生抽及糖拌勻靜待10分鐘 , 木耳絲浸至軟身後稍切段 , 素翅用水沖一沖洗及瀝乾 , 調味料放入碗內拌勻備用 , 將薑絲及冬菇片放入早餐機的煎pan內炒至冬菇軟身及有香味 , 盛起冬菇片(薑絲去掉)

煲30分鐘的瘦肉盛起 , 瘦肉撕成絲 , 煲瘦肉的瘦肉水留起 , 之前用8杯水煲完瘦肉的瘦肉水只餘4杯水左右 , 逐一加入冬菇水 , 木耳絲 , 之前炒香的冬菇片及肉絲 , 加入2杯水份量拌勻 , 2茶匙馬蹄粉加1/2份量水拌勻 , 用中火煲至滾後再加入素翅 , 調味料及生粉水拌勻 

期間將雞蛋打成蛋液 , 用中火煲至滾起後熄火 , 逐少加入蛋液拌勻成蛋花即可 

材料
瘦肉$15 , 素翅 , 冬菇5隻(預先浸軟) , 浸冬菇水 , 木耳絲 , 薑 , 雞蛋2隻 , 糖 , 胡椒粉 , 水8杯 + 2杯 , 馬蹄粉2茶匙 , 美的早餐機(MZ-DSY18A)

調味料
蠔油 , 生抽 , 老抽 , 鹽 , 糖 , 胡椒粉 , 麻油 



做法
1. 瘦肉放入早餐機的煲仔內 , 加水浸過面 , 蓋上蓋按<蒸 / 煮>功能 

2. 時間調至10分鐘出一出水 , 出水後的瘦肉用水沖一沖洗 

3. 將瘦肉轉放入大煲內 , 加入8杯水份量 , 蓋上蓋用中火煮30分鐘

4. 冬菇切片 , 薑去皮切絲 , 冬菇片放入碗內加少許生抽及糖拌勻靜待10分鐘

5. 木耳絲浸至軟身後稍切段 , 素翅用水沖一沖洗及瀝乾 

6. 調味料放入碗內拌勻備用 

7. 將薑絲及冬菇片放入早餐機的煎pan內炒至冬菇軟身及有香味 , 盛起冬菇片(薑絲去掉)

8. 煲30分鐘的瘦肉盛起 , 瘦肉撕成絲  , 煲瘦肉的瘦肉水留起 

9. 之前用8杯水煲完瘦肉的瘦肉水只餘4杯水左右 

10. 逐一加入冬菇水 , 木耳絲 , 之前炒香的冬菇片及肉絲 , 加入2杯水份量拌勻

11. 2茶匙馬蹄粉加1/2份量水拌勻

12. 用中火煲至滾後再加入素翅 , 調味料及生粉水拌勻  

13. 期間將雞蛋打成蛋液 

14. 用中火煲至滾起後熄火 , 逐少加入蛋液拌勻成蛋花即可 




沒有用上湯或雞湯做的碗仔翅 , 除夠足料外 , 味道反而好過街買的 , 食時可加紅醋及胡椒粉拌食呢 ^^