家鄉煎薄罉

又黎酒樓點心食譜 , 前陣子見到其他Blogger上傳既薄罉食譜 , 令袁太又心思思想整埋一份 , 開百寶箱又見到有韭菜同火腿的蹤影 , 個刻我決定都要整番碟薄罉食下 , 唔知大家去酒樓嘆茶的時候 , 多唔多會叫薄罉呢 ...... 

其實煎薄罉係非常普遍的一道中式點心 , 以往同爹地媽咪去飲茶必然會叫 , 點解 ??? 皆因媽咪非常喜愛吃 , 不過現在好少酒樓會做得好味 , 唔係太多粉就係油淋淋 , D油多到可以盛起再另外炒碟餸都得 , 真係好誇張



不過袁太廚房的百寶箱就只有火腿 , 有韭菜 , 仲有糯米粉同麵粉 , 唯獨係冇蝦米 , 不過發現有蝦皮 , 咁就用蝦皮代替蝦米 , 蝦皮本身比較鹹 , 所以粉漿就唔需要再落鹽 , 如果大家係用比較淡味的蝦米或其他材料 , 就要加少少鹽調味喇 , 自己在家動手做 , 絕對唔複雜唔難 , 記得媽咪講過 , 對薄罉的要求一定要夠薄身 , 而且大家都會爭邊邊位黎食 , 因為邊邊位煎得夠脆 , 係整塊薄罉最好味的地方



至於製作方面係絕對超簡單 , 將粉類同水拌勻成粉漿 , 再洗下材料切碎佢 , 再加入粉漿內拌勻就可以攞去煎 , 煎至兩面薄身脆脆微黃色 , 唔駛30分鐘已經有得食 , 不過大家謹記千萬唔好落太多油去煎 , 事關好鬼吸油 , 如果落得太多油 , 煎出來就會油淋淋 , 好難吃 , 所以袁太每煎一塊都係落約1茶匙油咁上下 , 咁煎出來就會好乾身好鬼脆 , 仲好味過酒樓呢 ^^

材料 : 糯米粉 , 麵粉 , 火腿 , 韮菜 , 蝦皮(預先浸水10分鐘 , 浸蝦皮水留用 , 蝦皮用白鑊炒乾身) , 浸蝦皮水 , 水 , 白芝麻(預先用白鑊炒香) , 胡椒粉 , 隔篩 , 美的早餐機(MZ-DSY18A)

韮菜切碎 , 火腿切細片 , 韭菜用水沖洗乾淨及瀝乾 , 糯米粉及麵粉放入大碗內 , 加入蝦皮水及200ml水拌勻至粉漿 , 再用隔篩將粉漿篩兩次除粉粒備用 

 
逐一將韮菜 , 火腿 , 蝦皮放入粉漿內 , 再加入少許胡椒粉調味拌勻靜待10分鐘 , 10分鐘後再加入白芝麻拌勻 , 落少許油入美的早餐機的煎pan內 , 按<煎餅>功能燒熱 , 倒入適量粉漿慢慢煎至一面微黃色不黏底 , 才反轉另一面 , 用鑊鏟壓一壓粉漿(令粉漿可以薄身d , 煎出來脆口d) , 繼續慢慢煎 , 煎至兩面微黃或金黃色 , 盛起切件即可

材料

糯米粉1/2杯 , 麵粉1 1/2杯 , 火腿2片 , 韮菜$5 , 蝦皮(預先浸水10分鐘 , 浸蝦皮水留用 , 蝦皮用白鑊炒乾身) , 浸蝦皮水50ml , 水200ml , 白芝麻(預先用白鑊炒香) , 胡椒粉 , 隔篩 , 美的早餐機(MZ-DSY18A)

做法
1. 韮菜切碎 , 火腿切細片 , 韭菜用水沖洗乾淨及瀝乾 

2. 糯米粉及麵粉放入大碗內 , 加入蝦皮水及200ml水拌勻至粉漿 

3. 再用隔篩將粉漿篩兩次除粉粒備用 

4. 逐一將韮菜 , 火腿 , 蝦皮放入粉漿內 , 再加入少許胡椒粉調味拌勻靜待10分鐘 

5. 10分鐘後再加入白芝麻拌勻 

6. 落少許油入美的早餐機的煎pan內 , 按<煎餅>功能燒熱 

7. 倒入適量粉漿慢慢煎至一面微黃色不黏底 

8. 才反轉另一面 , 用鑊鏟壓一壓粉漿(令粉漿可以薄身d , 煎出來脆口d) , 繼續慢慢煎 

9. 煎至兩面微黃或金黃色 , 盛起切件即可 




今次煎得夠薄 , 邊邊位又夠脆 , 令我食完一件又一件 , 另外燉左冬菇粟米肉片蛋花粥配薄罉做早點呢 ^^