脆脆炸蠔餅

袁太爸爸係潮州人 , 蠔餅可以話由細食到大 , 而且好多時出外同老爺奶奶食飯 , 去潮州菜館都指定會叫蠔餅 , 雖然老爺奶奶都唔係潮州人 , 但每次見大家都食到唔停口 , 相信冇人不愛脆卜卜的炸蠔餅呢 ......



對我來說蠔餅主角唔係蠔仔 , 而係鴨蛋 , 相信好多朋友仔甚至餐廳整蠔餅都會用雞蛋代替 , 袁太唔係話用雞蛋唔好 , 不過當然比用鴨蛋差少少 



屋企附近街市只有一檔有鴨蛋賣 , 雖然只有一檔 , 但每日都會有鴨蛋供應 , 所以想買鴨蛋絕對唔係一件難事

所以有時突然想食蠔餅 , 買鴨蛋都唔係一件困難事 , 閒時好鬼鐘意買定幾隻放在家 , 一見到靚蠔仔的時候 , 整個脆卜卜蠔餅俾袁生做下午茶 ,  晚餐加餸或宵夜都可以 , 另外一般餐廳的蠔餅會分煎同炸兩種 , 炸的雖然夠香口夠脆口 , 但感覺真係好鬼熱氣



煎呢又覺得似普通蠔仔煎蛋 , 又唔太吸引喎 , 而且我同袁生都比較喜愛薄薄脆脆的蠔餅 , 所以俾我選擇 , 我會以半煎炸的方法去烹調處理 , 可以食到脆口邊邊位的同時 , 又可以有煎蛋的感覺 , win win雙嬴 , 而買蠔仔方面 , 一如以往選擇係超市買蠔仔 , 一向怕蠔腥味的我 , 自從某次係街市買過腥到想嘔的蠔仔後就怕怕 , 只係超市買的蠔仔 , 我先覺得唔會腥 , 而且係超市買感覺衛生少少 , 煎完後粒粒蠔仔依然肥嘟嘟 , 好味道呢  ^^


 
材料 : 蠔仔 , 鴨蛋 , 蕃薯粉 , 芫茜 , 魚露 , 鹽 , 生粉 , 胡椒粉 , 水 , 美的早餐機(MZ-DSY18A)

蠔仔加入生粉拌勻沖洗 , 再一次加入生粉用水沖洗乾淨 , 蠔仔放入碗內加入熱水將蠔仔灼熟 , 再瀝乾水份 , 蕃薯粉加80ml水拌勻至冇粉粒 , 芫茜洗淨切碎

兩隻鴨蛋放入大碗內拌勻 , 倒入蕃薯粉 , 逐一加入鹽 , 糖 , 魚露及胡椒粉調味 , 加入芫茜碎及蠔仔輕輕拌勻靜待10分鐘 , 期間將餘下一隻鴨蛋拌勻成蛋液

加油落美的早餐機的煎pan內按<煎餅>功能燒熱 , 放入適量粉漿 , 蠔餅開始膨脹後不停淋滾油上面 , 在邊邊位置加入蛋液 , 以半煎炸方式至兩面金黃色盛起 , 逐一將餘下粉漿放入鑊中半煎炸至金黃色 , 盛起隔去油份即可

材料
蠔仔1/2斤 , 鴨蛋3隻 , 蕃薯粉4湯匙 , 芫茜 , 魚露 , 鹽 , 生粉 , 胡椒粉 , 水80ml , 美的早餐機(MZ-DSY18A)



做法
1. 蠔仔加入生粉拌勻沖洗 , 再一次加入生粉用水沖洗乾淨 

2. 蠔仔放入碗內加入熱水將蠔仔灼熟 , 再瀝乾水份 

3. 蕃薯粉加80ml水拌勻至冇粉粒 , 芫茜洗淨切碎

4. 兩隻鴨蛋放入大碗內拌勻 , 倒入蕃薯粉 , 逐一加入鹽 , 糖 , 魚露及胡椒粉調味 

5. 加入芫茜碎及蠔仔輕輕拌勻靜待10分鐘 

6. 期間將餘下一隻鴨蛋拌勻成蛋液

7. 加油落美的早餐機的煎pan內按<煎餅>功能燒熱 , 放入適量粉漿 

8. 蠔餅開始膨脹後不停淋滾油上面 

9. 在邊邊位置加入蛋液 , 以半煎炸方式至兩面金黃色盛起 

10. 逐一將餘下粉漿放入鑊中半煎炸至金黃色 , 盛起隔去油份即可 




在家都可以輕輕鬆鬆做到美味的炸蠔餅 , 而且蠔仔肥嘟嘟 , 我最愛食邊邊的脆口位呢 ^^