涼拌水煮毛豆

毛豆呢款蔬菜經常係日本卡通都有見過 , 用來做送酒小食感覺唔錯 , 其實袁太同大家講 , ~毛豆~ 我食都冇食過 , 煮都冇煮過 , 所以買回來後應該如何烹調才好 ??? 係我的印象中 , 只記起雪菜毛豆或水煮毛豆兩款咁多多 , 今次就整住水煮毛豆先 ......



我呢邊的街市唔多蔬菜店有毛豆賣 , 數埋得個兩間先有得賣 , 12蚊就有一斤 , 兩斤就22蚊 , 不過一斤都好鬼多 , 所以就買左10蚊

其實烹調水煮毛豆唔太難 , 只係洗毛豆的時候要洗多幾次 , 都用左唔少時間 , 再煮下佢 , 浸下冰水 , 再加入調味料拌勻入雪櫃雪凍就食得 , 做法真係相當簡單 , 何況毛豆雪到凍一凍變成涼拌 , 最啱呢排熱到死的天氣就一定透心涼 , 而且毛豆甜甜地 , 味道唔錯 , 袁生指定要毛豆配啤酒做宵夜小食呢 ^^



材料 : 毛豆 , 八角 , 鹽 , 糖 , 黑胡椒碎 , 麻油 , 水 , 美的早餐機(MZ-DSY18A)

毛豆先用水沖洗 , 抹乾水份再用手撕去頭尾部份 , 再用水沖洗一次 , 再抹乾水份 , 將毛豆放入美的早餐機的煲仔內 , 加入八角 , 少許鹽及水(水的份量要蓋過毛豆) , 拌勻後蓋上蓋 , 早餐機按<蒸 / 煮>功能 , 先調較至5分鐘煮至出煙 , 將火力調低至300 , 時間調至10分鐘 , 微微開少少蓋繼續煮(如用明火製作 , 毛豆放入煲 , 加入八角 , 鹽及水拌勻 , 先用中火煮至出煙後蓋上蓋轉慢火煮10分鐘)

10分鐘後再焗3分鐘 , 將毛豆盛起瀝乾水份放入煲內(煮毛豆的八角留起) , 冰水加入毛豆內浸過面靜待10分鐘 , 10分鐘後將毛豆放入蒸隔內瀝乾水份 , 放入之前留起的八角及調味料拌勻 , 蓋上保鮮紙入冰箱冷藏1小時至入味即可

 
材料
毛豆$10 , 八角3粒 , 鹽 , 糖 , 黑胡椒碎 , 麻油 , 水 , 美的早餐機(MZ-DSY18A)

調味料
糖 , 麻油 , 黑胡椒碎



做法
1. 毛豆先用水沖洗 , 抹乾水份再用手撕去頭尾部份 

2. 再用水沖洗一次 , 再抹乾水份 

3. 將毛豆放入美的早餐機的煲仔內 , 加入八角 , 少許鹽及水(水的份量要蓋過毛豆) 

4. 拌勻後蓋上蓋 , 早餐機按<蒸 / 煮>功能 , 先調較至5分鐘煮至出煙 

5. 將火力調低至300 , 時間調至10分鐘 , 微微開少少蓋繼續煮
   (如用明火製作 , 毛豆放入煲 , 加入八角 , 鹽及水拌勻 , 先用中火煮至出煙後蓋上蓋轉慢火煮10分鐘)

6. 10分鐘後再焗3分鐘 

7. 將毛豆盛起瀝乾水份放入煲內(煮毛豆的八角留起) 

8. 冰水加入毛豆內浸過面靜待10分鐘 

9. 10分鐘後將毛豆放入蒸隔內瀝乾水份 , 放入之前留起的八角及調味料拌勻 

10. 蓋上保鮮紙入冰箱冷藏1小時至入味即可 

入冰箱雪到凍一凍做成涼拌小食 , 絕對係炎熱夏天之選 , 而且毛豆甜甜 , 配啤酒相當一流呢 ^^