啫啫豬潤雞煲

袁生某日同袁太講話想食雞煲 , 雞煲 ??? 咪冇袁太份囉 , 不過大家知喇 , 袁太好鬼犯賤 , 袁生一有要求 , 我當然會照辦 , 講開雞煲 , 大家會喜愛咩雞煲呢 ??? 我家袁生首選就一定係豬潤雞煲 , 不過佢唔喜愛有骨雞 , 所以會轉用雞扒肉製作 ......



當買齊材料回來後 , 袁生話我知 , 其實點解佢想食雞煲 , 佢話訓醒突然好想食豬潤 , 起初想叫我煲豬潤粥 , 後來佢又想食豬潤麵 , 到最後決定又變成雞煲 ~哈~ 有時善變呢家野唔止女人 , 男人都好善變架 , 整啫啫雞對我來說最重要唔係雞 , 亦唔係豬潤 , 而係配料 , 即係洋蔥 , 乾蔥頭 , 蒜頭同蔥段個類呢 , 用來送飯真係好好味架



不過袁生成日都話我 , 見我成日只食配料 , 俾人睇到以為佢冇俾飽飯我食 , 一早炆好放入煲 , 食時再番熱就得 , 用煲上熱辣辣好味道，不過大熱天時食熱辣辣的煲仔菜，真係大汗疊細汗呢 ^^



材料 : 雞扒 , 豬潤 , 洋蔥 , 乾蔥頭 , 蒜頭 , 薑絲 , 薑汁 , 蔥 , 胡椒粉 , 鹽 , 糖 , 酒 , 雞蛋白 , 煲仔

雞扒解凍切大件放入大碗內 , 加入薑汁 , 雞蛋白及醃料拌勻靜待1小時 , 期間豬潤用水沖走血水後切片 , 放入碗內加入薑絲及醃料拌勻靜待1小時 , 洋蔥去皮切塊 , 蔥切段 , 蒜頭 , 乾蔥頭去衣拍扁

燒紅鑊 , 放入雞扒肉爆香至八成熟後先盛起 , 原鑊爆香乾蔥頭 , 蒜頭 , 一半蔥段及洋蔥炒數分鐘至洋蔥微軟 , 將雞扒肉回鑊贊少許酒 , 加入調味料及水拌勻快炒數分鐘 , 將蔥段盛起去掉

將全部材料轉放入細煲內 , 加入豬潤拌勻 , 蓋上蓋用慢火煮5分鐘至汁料半收乾 , 最後加入餘下蔥段拌勻即可

材料
雞扒1塊 , 豬潤$10 , 洋蔥1個 , 乾蔥頭4粒 , 蒜頭1/2個 , 薑絲 , 薑汁 , 蔥 , 胡椒粉 , 鹽 , 糖 , 酒 , 雞蛋白1隻 , 煲仔

醃料 (雞)
生抽 , 老抽 , 鹽 , 糖 ,粟粉 , 麻油 , 酒

醃料 (豬潤)
生抽 , 麻油 , 酒 , 胡椒粉

調味料
生抽 , 蠔油 , 糖 , 水



做法
1. 雞扒解凍切大件放入大碗內 , 加入薑汁 , 雞蛋白及醃料拌勻靜待1小時 

2. 期間豬潤用水沖走血水後切片 , 放入碗內加入薑絲及醃料拌勻靜待1小時 

3. 洋蔥去皮切塊 , 蔥切段 , 蒜頭 , 乾蔥頭去衣拍扁

4. 燒紅鑊 , 放入雞扒肉爆香至八成熟後先盛起 

5. 原鑊爆香乾蔥頭 , 蒜頭 , 一半蔥段及洋蔥炒數分鐘至洋蔥微軟 

6. 將雞扒肉回鑊贊少許酒 , 加入調味料及水拌勻快炒數分鐘 

7. 將蔥段盛起去掉

8. 將全部材料轉放入細煲內 , 加入豬潤拌勻 , 蓋上蓋用慢火煮5分鐘至汁料半收乾

9. 最後加入餘下蔥段拌勻即可 




熱辣辣原煲上 , 雖然雞扒肉嫩滑 , 豬潤又爽脆 , 不過我還是喜愛配料多一點呢 ^^