大坑舞火龍2011

袁太好似咁多年都冇睇過舞火龍,係電視就睇得多,今年袁太決定同袁生講話想去大坑睇,其實袁太
打定輸數袁生唔會陪我去,但都問下袁生喇"老公,我想去大坑睇舞火龍呀!去吸下龍氣,想龍年同你生番個b呀,
陪我去喇"估唔到袁生一口就答應,睇黎袁生真係好想袁太同佢生番個龍b喎!

上海菜飯

呢個菜係袁生order叫袁太整架!
仲話偶然食下菜飯都唔錯喎!
以前叫袁生食多條菜都唔肯,
而家居然叫我整菜飯,真攪笑...

其實呢個飯我之前整個一次架喇!
不過上次整到好乾身,唔好食,

反而今次就好味道,
不過兩次的煮法都差唔多架,
點解上次會唔好食呢
而且做法簡單,
話咁易就煮左一碗香噴噴的菜飯!
最緊要係落order的人都話好食就得喇!

~上海菜飯~食譜

材料 : 白菜-半斤(洗淨切小件) / 百搭米-1 1/2杯(平時煮飯的份量) / 水-大約3杯 /
                                熟雞油或熟菜油-4湯匙 / 生抽-2茶匙 / 麻油-2茶匙 / 鹽-1 1/2茶匙

 

1.米洗淨隔乾水,加入熟油,鹽,生抽及白菜撈勻.

2.置煮飯寶飯煲內,加水,開火.
3.自動熄火後,繼續焗5分鐘,加入麻油拌勻,即可.

  

青木瓜眉豆花生薏米雞腳排骨湯

雖然袁生平時叫袁太如果煲湯的話,
最好唔好煲咁甜的湯,
但其實煲湯大多數都會加埋紅蘿蔔一齊煲,
所以一定會有少少甜,
何況袁太而家煲湯已經盡量唔落粟米架喇!
如果落埋粟米,d湯會仲更加甜...



不過袁太一直都好想煲青木瓜湯,
因為有一次出去食飯的時候曾經飲過,
袁太覺得太好味喇!
但街市好少見到有青木瓜賣,
係最近袁太行吉吉島的時候,
居然見到有青木瓜湯包賣,
雖然袁太而家好少會買湯包煲湯,
但難得見到,冇辦法喇!
買湯包的材料有青木瓜,眉豆花生,紅蘿蔔,
咁自己就另外加左生薏米,雞腳同排骨一齊煲,
當袁生放工番屋企的時候,
問袁太今晚煲咩湯,
袁太好大聲話"今晚煲青木瓜湯呀",
雖然味道同木瓜湯冇咩分別,
但我覺得用青木瓜好似冇咁甜,
同埋味道會清d,總知一句講晒~好味道喇!~



~青木瓜眉豆花生薏米雞腳排骨湯~食譜

材料 : 青木瓜-1個 / 紅蘿蔔-1條 / 眉豆花生-適量 / 生薏米-$2 / 雞腳-4隻 / 排骨-$25 / 蜜棗-2粒

做法:

1.眉豆,花生浸水1小時.

2.排骨飛水撈起備用.
3.雞腳剪去腳甲後出水,放入凍水30分鐘,木瓜去皮去籽切大件,備用.

4.煲內放入適量的水,滾後放入蜜棗,眉豆,花生,生薏米,排骨用大火煲30分鐘.
5.再加入青木瓜用大火煲30分鐘後,轉慢火煲約30分鐘,再下雞腳煲30分鐘,下少許鹽調味,即可

               

青紅蘿蔔猴頭菇鯊魚骨瘦肉湯

係時候又要煲湯俾袁生飲喇!
不過今日煲咩湯好呢
問過袁生架喇!但都係個句"你諗喇!"
唉...咁究竟煲咩好呀!
突然醒起廚房仲有包湯包,就今晚煲埋佢喇!
費時留咁耐!



平時袁太煲猴頭菇湯多數會落雞一齊煲,
因為落雞煲會香好多,濃味d!
但今次反而想清清地,所以唔落雞喇!
咁如果用青紅蘿蔔煲會唔會好怪呢?
因為以前都未試過咁樣煲,
不過煲湯就係咁,
咩材料都試下煲,話唔定可以煲出一碗靚湯呢!
袁太今次足足煲左2個幾鐘,
煲出黎真係好清,好好味!
袁生都覺得好好飲!
仲飲左兩碗咁多添!



~青紅蘿蔔猴頭菇鯊魚骨瘦肉湯~食譜

材料 : 猴頭菇鯊魚骨湯-1包 / 青蘿蔔-1條 / 紅蘿蔔-1條 / 瘦肉-$10

做法:

1.猴頭菇浸水15分鐘,紅蘿蔔,青蘿蔔去皮切件.

2.鯊魚骨出水,瘦肉飛水,備用.

 
3.煲內放入適量的水,凍水落蜜棗,待滾後,加入瘦肉,湯包的材料用大火煲30分鐘.
4.再加入紅蘿蔔,青蘿蔔煲30分鐘後,轉慢火煲1 1/2小時,下少許鹽調味,即可.