柱侯醬薯仔炆豬軟骨

唔知點解今日突然好想食豬軟骨,
所以就去左豬肉檔買左一條,
因為平時都係得兩個人食,
一條已經夠晒喇!
袁太覺得如果炆豬軟骨的話,
梗係要用柱侯醬喇!
另外發現雪櫃仲有一個細的薯仔,
一於用埋黎炆,
再加少少冰糖,
炆左大約20分鐘就攪掂喇,
鹹鹹地又甜甜地,
實在太好味喇,
不過袁太覺得今次買個條豬軟骨好似偏瘦左d,
如果肥番少少就perfect...
不過依然都係好好味,
最衰炆的時候收晒d汁,
如果用d汁撈飯仲正呀~~



~柱侯醬薯仔炆豬軟骨~食譜

材料 : 豬軟骨-1條 / 薯仔-1個 / 柱侯醬-1包 / 薑-3片 / 冰糖-適量
                      

 

1.薯仔去皮切件備用.

2.豬軟骨用少許生抽,糖醃約15分鐘後,再加入生粉,麻油拌勻.
3.燒紅鑊,爆香薑片,豬軟骨後,加入薯仔兜勻.

4.下柱侯醬炒香,加入清水至浸過所有材料,加入適量冰糖.
5.煮滾後蓋上鑊蓋用中火炆約20分鐘後,開蓋加少許生抽,糖調味即可.

粉葛綠豆薏米瘦肉湯

今日又黎煲粉葛湯,
不過今次就唔係用赤小豆煲,
而用綠豆薏米煲,
其實呢種煲法係袁太上網的時候,
無意中search到既,
因為好多人都話如果有肩頸背痛的話,
煲呢個湯可以去骨火喎,
唉...袁太成日唔係呢到痛就個度痛,
同埋有心情平靜的功效,
袁生成日都咁好火,
橫掂都未諗到煲咩湯,
一於煲黎飲下,
我諗呢個湯應該啱袁生袁太飲!



~粉葛綠豆薏米瘦肉湯~食譜

材料 : 粉葛-1個 / 紅蘿蔔-半條 / 綠豆,薏米-適量 / 瘦肉-$10 / 蜜棗-2粒

做法:

1.綠豆,薏米浸水30分鐘.

2.瘦肉出水備用.
3.粉葛,紅蘿蔔去皮切件,備用.

4.煲內放入適量的水,滾後放入蜜棗,綠豆,薏米,瘦肉用大火煲30分鐘.
5.再加入粉葛,紅蘿蔔用大火煲30分鐘後,再轉慢火煲1小時,下少許鹽調味,即可.

               

尖沙咀韓國街"濕平"

袁太最近睇飲食節目,
介紹過尖沙咀韓國街的美食,
已袁太咁愛食的性格,
梗係出去買番黎試下喇!
因為有時飲食節目話好味的野,
其實都係不外如事,
所以袁太就一個人出去買,
買番黎做晚餐,
咁就可以偷懶一日唔煮飯喇!
不過袁太買下買下都買左唔少,
夜晚的晚餐全部都係韓國食物,
袁生就最鍾意人參雞湯,
袁太雖然都鍾意人參雞湯,
但覺得魚片串同埋年糕串最好味...


第一站"新世界-韓國零食"

有好多款野食呀~~~

睇見都流口水

不過最後都淨係買左"芝麻葉煎餅"

第二站,去買"人參雞湯"

雖然有好多款,但最鍾意都係呢款!

好足料的人參雞湯,一包可夠兩個人份量,袁生袁太的至愛

第三站"韓國地道小食"

紫菜粉絲卷,袁太都買左番屋企試

最好食係魚片串同年糕串

節瓜眉豆花生鱆魚雞腳排骨湯

今日決定唔滾湯,煲d老火湯俾袁生飲,

於是打電話問袁生想飲咩湯喇!不過袁生個答案都係例牌個句,
就係"是但啦!"

唉...見平時袁生最鐘意飲節瓜煲的湯,
但冇理由成日都滾節瓜鹹蛋湯架!
見雪櫃仲有一塊鱆魚,
同埋袁生最近成日話隻腳痛,聽講雞腳可以補番d腳骨力,
所以就決定煲節瓜眉豆花生鱆魚雞腳排骨湯喇!



~節瓜眉豆花生鱆魚雞腳排骨湯~食譜

材料 : 節瓜-2個 / 鱆魚-1塊 / 雞腳-4隻 / 眉豆花生-少許 / 排骨-$22 / 蜜棗-2粒

做法:                      

1.排骨先出水備用.

2.雞腳飛水,沖洗乾淨後放在凍水30分鐘.

3.節瓜刮乾淨,眉豆,花生洗乾淨,鱆魚浸水一會備用.


4.煲內放入適量的水,落蜜棗,眉豆花生,排骨煲30分鐘,再加入節瓜,雞腳煲30分鐘.

5.再轉慢火煲1小時,下少許鹽調味,即可.