雪菜肉絲上海麵 <附食譜>

上星期五袁生公司Annual Dinner，所以袁太夜晚餐飯就自己攪掂，一個人費時煮飯，而且袁生唔番屋企食，我梗係食D平時袁生唔食，但我鐘意食的食物，例如 : 好似上海麵

袁生平時就一定唔會食上海麵，其實上海麵我可以話由細食到大，因為以前媽咪成日都煮上海麵，所以今次就決定照足媽咪以前咁整，簡簡單單用雪菜肉絲，不過印象中我以前唔太鐘意食雪菜，因為總是覺得好鹹，但食食下又覺得幾好味，係咪人越大，食野的味道同感覺會有所不同既呢 ???

簡簡單單一碗雪菜肉絲上海麵，再加一支甘旬蔬菜汁，袁太已經覺得好滿足了 !

雪菜肉絲上海麵
材料 : 上海麵<1個>，半肥瘦豬肉<$10>，雪菜<2棵>
 

做法 :
1. 雪菜浸水30分鐘後切粒，豬肉洗淨切絲用少許鹽醃10分鐘備用

2. 煲滾水後加入上海麵煮至軟身，盛起沖一沖水過冷河，隔去水份備用

3. 燒紅鑊，爆香豬肉絲後再加入雪菜兜勻 

4. 加入適量的水，下少許雞粉調味，大約煮20盛起沖一沖水過冷河

5. 大約煮10分鐘後加入上海麵，用慢火煮5分鐘即可

 

除左上海麵外，仲有支甘旬蔬菜汁，味道同橙汁完全冇分別