煎堆碌碌~~金銀滿屋 <附迷你煎堆仔食譜>

就快到新年，又係時候急急腳整賀年食品，前幾日嘗試第一次整年糕，賣相好滿意，但始終放係雪櫃仲未食，唔知味道得唔得呢 ???

本來諗住POST年糕食譜，但最衰相片還未處理好，所以暫時HOLD一HOLD先，今年袁太除左整年糕外，仲有一個新嘗試，就係自製煎堆仔

煎堆飲茶就食得多，自己整就一次都未曾試過，其實初初都冇諗過會整煎堆，因為整年糕的時候，糯米粉一定會有剩，如果唔諗辦法整其他野的話，包糯米粉一定會俾我掉左佢，咁又好似浪費左少少，所以就決定簡簡單單整個煎堆仔，仲要係迷你個隻，即係可以一啖食晒個款呢

不過今次暫時整空心煎堆先，點解 ??? 因為袁生唔喜愛有餡的煎堆，但反而我就喜愛南瓜餡，雖然係第一次整，但出乎意料之好好味，就連袁生都話好味，咁等我再整多D到時新年的時候，可以用黎招呼親朋戚友 !

迷你煎堆仔
材料 : 糯米粉<150g>，糖<65g>，梳打粉，泡汀粉<各1g>，白芝麻<適量>，水<90g>


做法 :
1. 糯米粉加入梳打粉，泡打粉拌勻，再加入其餘材料搓成粉糰(白芝麻除外)

2. 將粉糰搓成長條形，分成每粒約20g

3. 每粒沾上水，滾上白芝麻搓圓，靜置約10分鐘

4. 燒紅鑊，用中火將粉粒炸至浮起便輕輕按壓，邊炸邊壓，炸至金黃色即可