下午茶 <附碎蛋沙律辣肉腸熱狗食譜>

今日假期冇出街，係屋企休息休息充下電，每當假期的時候，袁太例牌一定會煲啖湯俾袁生飲，順便就清潔廚房呀雪櫃，清潔雪櫃的時候發現有包辣肉腸，應該係上次整pizza的時候用剩，而且廚房仲有高筋麵粉，咁不如即慶整個熱狗做下午茶

袁生放假係屋企一定要食下午茶，係腸仔上面唔想加芥末咁普通，就整左個碎蛋沙律放係腸仔上面，唔知呢個配搭得唔得呢 ???

不過自己整麵包都用左唔少時間，好彩今次發酵得好好，麵包好鬆軟，自家製新鮮出爐麵包之美味下午茶 : 碎蛋沙律辣肉腸熱狗完成了
 
熱狗完成的時間已差唔多六點先有得食，究竟係下午茶定係晚餐呢 ???



碎蛋沙律辣肉腸熱狗 
材料 : 高筋麵粉<160g>，牛奶<30ml>，鹽<少許>，糖<10g>，蛋黃<1隻>，無鹽牛油<20g>，水<50ml>，酵母<3g>，辣肉腸<2條>，雞蛋<2隻>，蛋黃醬，生菜<適量>

  
做法 :
1. 牛奶，鹽，糖，水及蛋黃拌勻，再加入高筋麵粉，酵母搓成光滑

2. 加入牛油搓至光滑麵糰，放入碗中蓋上保鮮紙進行第一次發酵60分鐘3. 發酵完將麵糰分成等份搓圓，再蓋上保鮮紙靜置20分鐘

3. 將麵糰搽上蛋漿再發酵45分鐘，放入焗爐用180C焗15分鐘即可

4. 焗好的麵包在中間位置切開，放上洗淨的生菜備用

5. 燒紅鑊，將辣肉腸煎至金黃色後放在麵包內

6. 煲內放入適量水，放入雞蛋用慢火煮5分鐘，待涼將蛋白切碎

7. 蛋白加少許鹽同適量蛋黃醬拌勻成碎蛋沙律，將沙律放在辣肉腸上即可