經濟版 <附海鮮蛋花粥食譜>

昨日又到10月10日了，係袁生袁太結婚三週年，雖然今年唔係兩個人慶祝，因袁生公司要食飯，所以撞期了，我當然唔會介意喇，凡事都係工作最緊要呢，何況袁生公司食飯我都有份去，同埋袁生應承我過幾日一定會同我補慶祝結婚週年

由於昨晚食飯食得太多的原故，今日個小肚子依然有少少飽的感覺，所以晚餐決定煲啖粥仔食，前幾星期係九龍城食過一碗海鮮粥，簡直人間美味，粥底夠綿，真係無得頂，見冰箱有少許海鮮，雖然唔係咩貴價海鮮，但都可以做碗"經濟版海鮮粥"

味道一樣咁"正" !

今日放工的時候經過廚房用品店，又買左碗碗碟碟筷子匙羮，每次見到廚房用品都忍不住手，其實究竟我用唔用得晒佢地呢 ???

今次選擇簡單懷舊版，碗碗碟碟都係純白色，匙羹就一般鐡羹吧，由於屋企飯枱已俾袁生霸佔用來做公司野，唯有係書房攞張傳統摺枱用住先 !

海鮮蛋花粥

材料 : 白米<適量>，冬菇，鮮蝦<數隻>，日本帶子<5粒>，龍利柳<1條>，雞蛋<1隻>，蝦米<少許>，鳴門卷<1/3條>

做法 :

1. 冬菇浸水至軟身後切片，蝦米浸至軟身抹乾水份備用

2. 鮮蝦去殼，日本帶子，龍利柳切粒，鳴門卷切片

3. 燒紅鑊，爆香蝦米盛起，煲內放入適量水，滾後加入白米，蝦米及冬菇，待白米慢慢煮至熟透

4. 等白米煮至綿綿粥底後，加入日本帶子，龍利柳，鮮蝦及鳴門卷煮熟(約5-10分鐘)

5. 熄火蓋上蓋焗15分鐘，再將海鮮粥煮至滾起，加入已打發的蛋液成蛋花

6. 最後加入少許鹽，胡椒粉調味即可