[娘惹菜] 蕉葉焗鯖魚柳

奶奶係印尼華僑 , 所以經常會去食印尼菜

大家知喇 , 印尼菜多數都係辣的

袁太就至愛辣的食物呢

記得上次食印尼菜的時候

袁生試左一樣叫蕉葉焗魚的物體 , 眼見紅卜卜

心想一定辣到飛起呢 , 果然不出所料 , 真係辣到漂眼水

個一刻真想大聲叫 , 嘩 。。。好。辣。呀。

但又好犯賤地覺得好好味喎

幾日前袁生又話想再去食焗魚 , 但又懶得出印尼餐廳食

所以袁太去左附近東南亞材料店兜個圈 (其實係兜左好多個圈先真 ^^)

順便問下職員點整叁巴醬 , 實行自家製呢 ^^

辣辣叁巴醬俾我想像中容易整呢 , 只需將材料切碎後放入攪拌機打成泥狀

再用鑊爆香 , 再加入蝦醬 , 鹽 , 糖調味就可以了

待涼後可以放入器皿內再放入雪櫃保存 , 留待日後再烹調

   

叁巴醬材料有 : 蒜頭 , 乾蔥 , 乾辣椒 , 指天椒 , 蝦米 , 洋蔥 , 蕃茄
 

當整好叁巴醬後 , 就要決定用咩魚焗

由於唔知印尼餐廳係用咩魚 , 所以就自己決定

經過一輪思考後 , 決定用鯖魚柳 , 應該唔錯呢

材料 (蕉葉焗鯖魚柳)

叁巴醬3湯匙 , 鯖魚柳2條 , 蕉葉半塊

做法

1. 鯖魚柳洗淨抹乾水份備用 , 叁巴醬放入鑊中加少許水再爆香煮至杰身後盛起

2. 蕉葉放入熱水中灼一灼盛起

3. 放上一塊蕉葉 , 抹上一層叁巴醬 , 再放上鯖魚柳 , 再抹上一層叁巴醬

4. 將蕉葉包實鯖魚柳 , 用竹簽在兩邊串好封口

5. 放入焗爐用200C焗20分鐘即可