咖哩薯仔炆雞扒肉

每當天氣熱的時候 , 袁生反而鐘意食辣野 , 咖哩永遠係佢的首選 , 佢話喜愛咖哩可以配搭多元化 , 可以配牛 , 配羊 , 配蔬菜 , 但袁生還是最愛配雞 , 不過佢唔喜愛雞中翼 , 唔喜愛雞全翼 , 亦唔喜愛新鮮雞 , 最愛用雞扒 , 話啖啖肉喎 ......

~OK OK~ 完全沒有問題 , 用雞扒咪用雞扒囉 , 仲好 , 雞扒平好多 , 去街市買左兩塊大雞扒 , 回家將雞扒切件醃下佢 , 再爆炒下 , 再加入薯仔 , 蕃薯 , 咖哩汁拌勻炆一炆佢再焗下佢就食得 , 做法絕對簡單 , 袁太用的咖哩汁當然例牌又係利川喇 , 用過一次利川整咖哩 , 簡直愛上了 , 喜歡它微辣 , 又香口的味道



講開煮咖哩用的配料 , 以往都係簡單加入傳統的薯仔 , 但最近幾次煮咖哩都愛上用了蕃薯 , 喜歡它甜甜的味道 , 配上咖哩都同樣地夾 , 連袁生平時唔太喜歡食蕃薯既 , 都大讚呢種做法好味 , 另外簡簡單單炒多碟菜就可以開飯 , 單單只用咖哩汁都可以送到幾碗飯的袁生 , 每次煮咖哩都要預袁生幾碗飯 , 因為佢一定會添飯呢 ^^

材料 : 雞扒 , 薯仔 , 蕃薯 , 利川咖哩汁 , 蒜頭 , 洋蔥 , 蔥段 , 蔥絲 , 酒 , 糖 , 胡椒粉 , 水

 

雞扒洗淨抹乾水份切件 , 放入大碗內加入醃料拌勻靜待1小時 , 期間蒜頭去衣切碎 , 洋蔥去衣切條 , 薯仔去皮切件 , 蕃薯去皮切件 , 分別用水沖一沖洗及瀝乾

燒紅鑊 , 將雞扒肉放入鑊中炒至轉色 , 先盛起備用 , 原鑊加入蔥段 , 洋蔥及蒜粒拌勻炒至洋蔥微軟 , 加入薯仔及雞扒肉回鑊拌炒數分鐘 , 加入利川咖哩汁及1杯水份量拌勻 , 用中火煮滾後蓋上蓋轉用慢火炆15分鐘

15分鐘後加入蕃薯拌勻 , 蓋上蓋繼續用慢火炆5分鐘 , 熄火再焗30分鐘即可

材料
雞扒2個 , 薯仔2個 , 蕃薯2個 , 利川咖哩汁1罐 , 蒜頭1/2個 , 洋蔥1個 , 蔥段 , 蔥絲 , 酒 , 糖 , 胡椒粉 , 水1杯

醃料
生抽 , 老抽 , 糖 , 生粉 , 麻油



做法
1. 雞扒洗淨抹乾水份切件 , 放入大碗內加入醃料拌勻靜待1小時 

2. 期間蒜頭去衣切碎 , 洋蔥去衣切條 

3. 薯仔去皮切件 , 蕃薯去皮切件 , 分別用水沖一沖洗及瀝乾

4. 燒紅鑊 , 將雞扒肉放入鑊中炒至轉色 , 先盛起備用 

5. 原鑊加入蔥段 , 洋蔥及蒜粒拌勻炒至洋蔥微軟 

6. 加入薯仔及雞扒肉回鑊拌炒數分鐘 , 加入利川咖哩汁及1杯水份量拌勻 

7. 用中火煮滾後蓋上蓋轉用慢火炆15分鐘  

8. 15分鐘後加入蕃薯拌勻 , 蓋上蓋繼續用慢火炆5分鐘 

9. 熄火再焗30分鐘即可




香濃的咖哩薯仔炆雞扒肉 , 一定要多多汁拌飯先好味呢 ^^